بھرے بازار میں موٹرسائیکل جلانے اور لڑائی جھگڑا کے واقعہ سے ہمارا کوئی تعلق نہیں: بلال فاروق اور مشتاق پراچہ
داؤدخیل (نامہ نگار) بھرے بازار میں موٹرسائیکل جلانے اور لڑائی جھگڑا کے واقعہ سے ہمارا کوئی تعلق نہیں۔ ہمیں سیاسی انتقام کا نشانہ بنایاجارہاہے۔ کالاباغ کی ایک اہم سیاسی شخصیت کی ایما پر ہمارے نام ایف آئی آر میں ڈالے گئے ہیں۔ ہم ہر پلیٹ فارم پر ثبوتوں کے ساتھ اپنی بے گناہی ثابت کرسکتے ہیں۔ یہ باتیں انجمن تاجران کالاباغ کے جیتنے والے گروپ کے دو اہم ساتھیوں بلال فاروق اور مشتاق پراچہ ہمراہ سماجی شخصیت تاج محمد پریس کانفرنس کے دوران میڈیا سے گفتگو کے دوران کہیں۔ انہوں نے کہاکہ کچھ عرصہ قبل انجمن تاجران کالاباغ کے الیکشن ہوئے۔ ہمارے گروپ نے مخالف گروپ کو تاجروں کی حمایت سے شکست دے کران کی کئی عشروں سے قائم اجارہ داری ختم کردی۔ چند روز قبل کالاباغ بازار میں داؤدخیل کے کچھ لوگوں کا دکاندار سے جھگڑا ہوگیا۔ اس دوران چند شر پسندوں نے موٹرسائیکلز کو آگ لگا دی۔ فریقین کے خلاف تھانہ کالاباغ میں درج کرائی گئی ایف آئی آر میں ہم دو افراد کا نام بے گناہ دے دیا گیا۔لڑائی جھگڑا کرنے والے اور موٹر سائیکلز کو آگ لگانے والوں کی تصاویر اور ویڈیوز سوشل میڈیا پر موجود ہیں۔ ہم دوافراد کی جھگڑے والی جگہ اور موٹرسائیکل جلانے والی جگہ پر موجودگی بھی ثابت ہوجائے تو ہم ہر سزا کے لیے تیار ہیں۔ مشتاق پراچہ نے کہاکہ یہ ساری کارروائی ہارنے والے گروہ کے راہنما اور شہر کی اہم سیاسی شخصیت کی منصوبہ بندی کا نتیجہ ہے۔گزشتہ روز اس شخصیت نے ایف آئی آر میں نامزد ملزمان کو بلوایا مگر ہم دو کو دعوت نہیں دی۔ ہم ہر جگہ اپنی بے گناہی ثابت کرنے کو تیار ہیں۔ ان کے ساتھ موجود سماجی راہنما تاج محمد نے کہاکہ وقوعہ کے وقت بلال اور مشتاق میرے پاس بازار کے دوسرے کونے پر موجود تھے۔ لڑائی جھگڑے کا ان کو اور ہمیں پتا ہی نہیں تھا۔ان کے نام ایف آئی آر میں دلوانا صرف اور صرف مقامی تاجر سیاست کا شاخسانہ ہے۔ انہوں نے کہاکہ اگر تفتیشی ٹیم سوشل میڈیا اور لوگوں کے پاس موجود تصاویر اور ویڈیوز کو چیک کریں تو اصل ملزمان سامنے آجائیں گے۔انہوں نے کہاکہ اگر ہمارے ساتھ انصاف نہ ہوا اور اصل ملزمان کو بچانے کی کوشش کی گئی تو ہم اپنے بیوی بچوں سمیت ضلعی اور صوبائی انتظامیہ تک اپنا احتجاج ریکارڈ کرائیں گے۔
Leave a Reply