داؤدخیل(نامہ نگار)جناح ری ہیبلی ٹیشن پروگرام کے تحت بنائے گئے بنیادی ہیلتھ یونٹ کا چارج محکمہ ہیلتھ پنجاب ضلع میانوالی کے حوالے کردیاگیا۔ اس کے علاوہ بی ایچ یو کودو ایمبولینسزاور توشیباکمپنی کا تقریباََ نصف کروڑ مالیت کا جدیدترین ایکسرے پلانٹ بھی دے دیاگیا۔ ڈسکون کمپنی کے سائٹ منیجر محمد ندیم نے ای ڈی او ہیلتھ شاہد نذیر کو تقریباََ پونے دوکروڑ روپے مالیت کی دو ایمبولینسز کی چابیاں پیش کیں جبکہ ڈائریکٹر ایس اینڈ ای ایری گیشن ناظم حسین شاہ نے بی ایچ یو کینال کالونی داؤدخیل کی فائلز محکمہ ہیلتھ پنجاب ضلع میانوالی کے ڈی ایچ او رفیق احمد کے ساتھ باقاعدہ طرفین کے دستخط کے ساتھ تبادلہ کیا۔ اس موقع پر ای ڈی او ہیلتھ میانوالی شاہد نذیر نے کہاکہ جلد ایکسرے مشین فنکشنل ہوجائے گی۔ ابھی ہم نے ہسپتال میں تمام عملہ عارضی طور پر تعینات کیاہے۔ چند ماہ تک باقاعدہ نئی بھرتی کے ساتھ یہاں مستقل ڈاکٹرز، ڈسپنسرز اور دیگر عملہ تعینات کردیاجائے گا۔ انہوں نے کہاکہ ایمبولینسزابھی یہاں استعمال نہیں ہونگی کیونکہ یہاں ڈرائیورز نہیں ہیں۔ صحافیوں نے کہاکہ جہاں دیگر عملہ تعینات کیا ہے تو ڈرائیورز بھی تعینات کردیں تاکہ اس علاقہ کے مریض استفادہ کرسکیں جس کا ای ڈی او ہیلتھ تسلی بخش جواب نہ دے سکے۔انہوں نے کہاکہ ہم تمام سہولیات بتدریج مہیا کریں گے۔ اس موقع پر سی آر ای میجر غلام رضا، ڈسکون کمپنی ایڈمن محمد وارث، سب انجینئر تبریز، عمیر لئیق، سپروائزر علی کے علاوہ بی ایچ یو کینال کالونی داؤدخیل کے ڈاکٹر ظفرکمال، ڈاکٹر امیراحمد خان، ڈسپنسر جاوید اقبال خان، محمد پرویز، فضل الرحمن ودیگر عملہ بھی موجود تھا۔
