داؤدخیل(ذوالفقارخان) ایک سال سے مزدور آدھی تنخواہ پر کام کرنے پرمجبور۔مراعات بھی چھین لی گئیں۔ آفیسر لاکھوں روپے تنخواہ اور بے انتہامراعات سے لطف اندوز ۔مزدوروں کو دل کے دورے پڑنا شروع ہوگئے۔ مزدوروں کے بچے تعلیم سے محروم ہونے کے قریب۔آفیسرز کے بچے ہرقسم کی سہولیات لے رہے ہیں۔آفیسرز نے اپنی مراعات کے بجائے غریب مزدور سے روٹی کا نوالہ چھین لیا۔ ایگری ٹیک فرٹیلائزر فیکٹری داؤخیل اپوزیشن رہنماملک جاوید اقبال نے ساتھیوں احمدخان ،لطیف اللہ خان ،ملک نعمت اللہ ،منور حسین ،وقار یونس سنبل ،ناصر حسین ،طارق حیات اور طارق علی کے ہمراہ پریس کانفرنس سے خطاب کرتے ہوئے بتایاکہ ایگری ٹیک فرٹیلائزر فیکٹری سال کے دوران60ہزار ٹن پیدوار دے چکی ہے جبکہ تیار شدہ کھاد رکھنے کی جگہ بھی فیکٹری میں دستیاب نہیں اسکے باجود مزدوروں کو ابھی تک نصف تنخواہ دی جارہی ہے اور انکی تمام مراعات بند کررکھی ہیں جبکہ فیکٹری ایگزیکٹو خود پر تعیش مراعات سے لطف اندوز ہو رہے ہیں۔افسران کو گاڑیاں دی جارہی ہیں جبکہ ہر ماہ ایک سو ساٹھ لٹر پیٹرول فری ،گاڑیوں کی مرمت ،ٹائروغیرہ فری دئیے جارہے ہیں جبکہ افسروں کے بچوں کو ٹیوشن فیس کی مدمیں ایک ہزار روپے تا پانچ ہزار دیا جارہاہے جبکہ ایک ہزار روپے سے لیکر پانچ ہزار روپے تک فون کی مد میں دئیے جارہے ہیں جبکہ افسرکالیں پی ٹی سی ایل سے کر کے اس رقم کو بھی بچا لیتے ہیں۔ تجربہ کار،ہنرمند مقامی ایگزیکٹو کو فارغ کردیاگیا۔انکی جگہ دوبارہ ہیڈ آفس میں آفیسر بھرتی کئے گئے جنکی تنخواہ فارغ کئے گئے افسروں کے برابر بنتی ہے۔ فیکٹری مفاد میں ان تجربہ کار ایگزیکٹو کو فوری طور واپس لیا جانا چاہیے کیونکہ انکی جگہ جو اوور ٹائم لگ رہا ہے اسکی مالیت فارغ کئے جانے والے ایگزیکٹو کی تنخواہوں کے برابر بنتی ہے۔انہوں نے مزیدبتایا کہ حساس ترین پلانٹ ہے جبکہ ملازمین تنخواہیں نصف ہونے کی وجہ سے شدید دباؤ اور ذہنی ٹینشن کا شکا ر ہیں اسی ٹینشن کی وجہ سے ایک ملازم احسان اللہ نامی دل کا دورہ پڑنے سے انتقال بھی کر چکا ہے جبکہ دو مزدوروں گلزار ،ثناء اللہ کو دل کے دورے پڑ چکے ہیں۔اگر کسی مزدور نے ذہنی دباؤ میںآکرپلانٹ کے ساتھ کچھ کردیا تو تما م تر ذمہ داری فیکٹری انتظامیہ پر عائد ہوگی۔ مزدور وں کو مالی بدحالی کی وجہ سے بازار سے قرض پر سودا سلف نہیں ملتا جبکہ سکول فیسیں ادانہ کرسکنے کی وجہ سے ورکروں کے بچے نفسیاتی مسائل کا شکار ہو رہے ہیں۔ملک جاوید اقبال نے ضلع بھر کے ایم این ایز اور ایم پی ایز ،میڈیا اور ضلعی انتظامیہ سے پرُ زور مطالبہ کرتے ہوئے کہاکہ اس احساس مسلے کا نوٹس لیں اور فیکٹری انتظامیہ سے کہیں کہ ورکروں کی تنخواہیں فی الفور بحال کی جائیں۔انہوں نے سی ای او ایگری ٹیک فرٹیلائزر داؤدخیل خالد میر سے مطالبہ کیا کہ ورکرزکی تنخواہیں پوری کی جائیں تاکہ وہ بھرپورطریقے سے فیکٹری پروڈکشن پر توجہ دے سکیں۔ایگر ی ٹیک فرٹیلائزر فیکٹری داؤدخیل کے جنرل منیجرایم ایم محمدنعیم سے انکاموقف معلوم کیاگیا توانہوں نے بتایا کہ فیکٹری ایک ماہ مسلسل چلے گی تو تمام ورکرزکی تنخواہیں پوری بحال کر دیں گے۔ سیزن آف ہونے کی وجہ سے تیا رشدہ کھاد فروخت نہیں ہو رہی جبکہ گیس کی پے منٹ ایڈوانس دینا پڑ رہی ہے اگر پے منٹ ایڈوانس نہ دیں تو فیکٹری بند کرنا پڑے گی۔ انہوں نے بتایاکہ ورکرزکو ٹرانسپورٹ،کینٹین ،فری میڈیکل کی سہولت حاصل ہے جبکہ فےئرپرائس شاپ پرنصف راشن دیا جارہا ہے پورا راشن بھی جلد بحال کر دیا جائے گا۔

QR Code: