پپلاں ( محمد رضوان آکاش) تحصیل پپلاں کی محرومیوں اور پسماندگی کے ازالہ کے لئے نئے الیکشن میں میانوالی کے حلقہ این اے72 کا اُمیدوار تحصیل پپلاں سے لانے کے لیئے جوڑ توڑ اور مشاورت کا عمل شروع ،عیدالفطر کے بعد تحصیل پپلاں کے تینوں تھانوں کندیاں ہرنولی اور پپلاں کی اہم سیاسی سماجی شخصیات سابق ناظمین نائب ناظمین اور تاجروں تنظیموں کے نمائندوں کا مشترکہ اہم اجلاس ہونے کا امکان ۔ انتہائی با ثوق ذرائع سے معلوم ہوا ہے کہ تحصیل پپلاں کی مقتدر اور اہم سیاسی شخصیات نے آئندہ جنرل الیکشن کے لیئے حلقہ این اے72 پر چند سیاسی خاندانوں کی اجارہ داری اور65سالہ محرومیوں کے خاتمہ سمیت تحصیل پپلاں کی ترقی و خوشحالی کے لیئے تحصیل پپلاں سے متفقہ طور پر قومی اسمبلی کا اُمیدوار سامنے لانے کے لیئے سنجیدگی سے غور وخوض شروع کردیا ہے اور اس سلسلہ میں تحصیل بھر کی اہم سیاسی شخصیات کا ایک اہم مشاورتی اجلاس عید الفطر کے بعد بلائے جانے کا امکان ہے جس میں موجودہ اور سابقہ منتخب ایم پی ایز سابقہ الیکشن میں حصہ لینے والے تمام اُمیدواروں کو بھی دعوت دی جائے گی اور اجلاس میں شامل تمام شرکاء سے مشاورت کے بعد آئندہ کے لائحہ عمل کی حکمت عملی تیار کی جائے گی۔یہ بھی معلوم ہوا ہے کہ اس بات کا فیصلہ آئندہ جنرل الیکشن میں سابق ایم این ایز انعام اللہ خان نیازی، حمیر حیات خان روکھڑی ممبر قومی اسمبلی امجد علی خان، سابق اُمیدوار قومی اسمبلی حاجی خورشید انور خان اور ملک سجاد بھچر کی طرف سے اس حلقہ سے اگلا الیکشن لڑنے بارے مسلسل گردش کرنے والی خبروں اور تبصروں کے بعد تحصیل پپلاں کی کچھ مقتدر سیاسی شخصیات نے سنجیدگی سے اس بات پر سوچنا شروع کر دیا ہے کہ اس حلقہ کی نمائندگی کا حق آج تک کبھی بھی تحصیل پپلاں کو نہیں مل سکا جس کی وجہ سے اس حلقہ کے عوام کے ووٹوں سے منتخب ہونے والے تمام ممبران اسمبلی نے ہمیشہ تحصیل پپلاں کے عوام سے سوتیلی ماں جیسا سلوک روا رکھا ہے اور تحصیل بھر کے لاکھوں لوگ ابھی تک بنیادی سہولتوں سے بھی محروم چلے آ رہے ہیں جبکہ قومی اسمبلی کے الیکشن سمیت ضلعی ناظم یا چئیرمین ڈسٹرکٹ کونسل کے انتخابات میں بھی تحصیل پپلاں کا اہم اور کلیدی کردار ہوتا ہے اجلاس میں اس بات پر بھی سنجیدگی سے غور کیا جائے گا کہ ممبر صوبائی اسمبلی و ڈپٹی اپوزیشن لیڈر پنجاب سردار محمد سبطین خان اور سابق ایم پی اے ملک فیروز جوئیہ صرف اپنے ذاتی اقتدار اور مفاد کی بجائے علاقہ اور تحصیل کے عوام کے مفاد کو مقدم رکھیں اور جنرل الیکشن میں گزشتہ ساٹھ سالوں سے اس حلقہ کے عوام پر مسلط چند مخصوص خاندانوں کا ساتھ دینے کی بجائے ایک پلیٹ فارم پر متحد ہو جائیں اور علاقہ کی ترقی و خوشحالی کے لیئے اپنی تحصیل پپلاں کے عوام کا ساتھ دیں تو تحصیل پپلاں کے عوام کو ہمیشہ سے استحصالی ٹولہ سے نجات مل سکے گی اور پوارا علاقہ ترقی کی راہ پر گامزن ہو جائے گا ۔

QR Code: