پپلاں ( محمد رضوان آکاش) ڈی پی او میانوالی سرفراز خان ورک کی طرف سے تعینات ہونے والے نئے ایس ایچ او پپلاں محمد افضال وڑائچ نے اپنے عہدے کا چارج سنبھال کر کام کا آغاز کر تے ہوئے اپنے پہلے حکم نامے میں انہوں نے تھانہ پپلاں میں ٹاؤٹوں کے علاوہ منشیات فروشوں جواریوں سود خوروں اور جرائم پیشہ افراد اور انکے سفارشیوں کا داخلہ بند کرکے تھانہ کے گیٹ پر بورڈ آویزاں کرنے کی تاکید کر دی۔پپلاں تعیناتی کے بعد میڈیا کے نمائندوں سے تعارفی ملاقات میں ایس ایچ او محمد افضال وڑائچ نے گفتگو کرتے ہوئے کہا کہ میڈیا مملکت کا ایک طاقتور ستون اور معاشرہ کی آنکھ اور کان ہیں اور اس کے نمائندے معاشرتی برائیوں کے خاتمہ کے لیئے پولیس کا ساتھ دیں تو کوئی وجہ نہیں کہ علاقہ سے جرائم کا خاتمہ نہ ہو میرا وعدہ ہے کہ انشاء اللہ علاقہ سے جرائم کا مکمل خاتمہ کرونگا اور ڈی پی او میانوالی سرفراز خان ورک کے وژن کے مطابق تھانہ پپلاں سے منشیات فروشوں سود خوروں جواریوں ، چوری ڈکیتی کی وارداتوں سمیت ناجائز اسلحہ ، رشوت کا خاتمہ اور مختلف مقدمات میں مطلوب اشتہاری ملزمان کی گرفتاری میری اولین ترجیع ہے اس لیئے میڈیا اور سول سوسائٹی سے اپیل ہے کہ وہ جرائم کے خاتمہ میں اپنا اپنا کردار ادا کریں اور ہمارا ساتھ دیں۔ انہوں نے کہا کہ جرائم پیشہ افراد چاہے کتنے ہی طاقتور یا با اثر کیوں نہ ہوں اُنکے خلاف بھر پور اقدامات اٹھائے جائیں گے اور کسی بھی ایسے شخص سے کوئی رو رعایت نہیں برتی جائے گی۔ محمد افضال وڑائچ نے کہا کہ محرر تھانہ اور تمام تفتیشی افسران کو سختی سے ہدایت کی ہے کہ انصاف کے حصول کی خاطر تھانہ میں آنے والے لوگوں سے حسن سلوک سے پیش آئیں اور زیر تفتیش مقدمات کی تفتیش میرٹ پر کر کے انکے چالان جلد عدالتوں میں جمع کرائے جائیں اور کسی بھی کیس میں غیر ضروری تاخیر کو برداشت نہیں کیا جائے گا۔ انہوں نے مزید کہا کہ مختلف مقدمات میں نامزد ملزمان جودوران تفتیش تھانہ کی حوالات میں بند ہیں اُنکی کی ذہنی تربیت کے لیئے بھی خصوصی اقدامات کیئے ہیں اور انہیں اس بات کا پابند بنایا جائے گا کہ وہ پورا دن وضو کی حالت میں رہیں اور نماز پنجگانہ پابندی سے ادا کریں کیونکہ جب وہ اللہ اور اسکے پیارے نبی ﷺ کا ذکر کریں گے تو نہ صرف تھانہ میں برکات کا نزول ہو گا بلکہ ایسے لوگوں کے دلوں میں جرائم سے نفرت ہو گی اور وہ ایک شریف شہری بن کر اپنی زندگی سنوارنے کی کوشش کریں گے۔
