اگر پارٹی نے ضلع چیئرمین بنایا تو ایسی نمائندگی کریں گے کہ پچاس سال سے مسلط استحصالی ٹولہ منہ چھپاتا پھرے گا: عظمت اللہ خان
داؤدخیل(نامہ نگار) خادم میانوالی مولوی عظمت اللہ خان چیئرمین نے ہائی وے کی تعمیر میں تاخیر کے خلاف احتجاجی مہم کے دوران اسکندرآباد میں پی ٹی آئی ورکرز و دیگر شہریوں سے خطاب اور پریس کانفرنس کے دوران کہاکہ اگر پارٹی نے ضلع چیئرمین بنایا تو ایسی نمائندگی کریں گے کہ پچاس سال سے مسلط استحصالی ٹولہ منہ چھپاتا پھرے گا۔ انہوں نے کہاکہ ہم چیئرمین بن کر تحریکِ حقوقِ میانوالی کے مطالبات کو حکومت کے ایوانوں تک پہنچائیں گے۔ انہوں نے کہاکہ خواجہ آباد تک جناح بیراج جان بوجھ کر ہائی وے کی تعمیر کو تاخیر کاشکار کیاگیاہے۔ کئی سالوں سے عوام کا جانی و مالی نقصان ہورہاہے۔ حکومتی نمائندے اس کی تعمیر میں روڑے اٹکا رہے ہیں۔ اگر قانون کے مطابق ایک ہفتے تک ورک آرڈر جاری نہ کیاگیا تو پی ٹی آئی کے ایم پی اے ڈاکٹر صلاح الدین نیازی کے ساتھ مل کر داؤدخیل پُل دس ہزار پر بھرپور دھرنا دیں گے۔ خادم میانوالی نے کہاکہ عمران خان نے قوم سے جو وعدہ کیا پوراکیا۔ نمل کالج ، کینسر ہسپتال پشاور، کرپشن سے پاک سیاست، سسٹم کی اصلاح جیسے وعدے عملی شکل اختیار کر چکے ہیں۔انہوں نے کہاکہ ضلع میانوالی میں پی ٹی آئی بلدیاتی الیکشن میں سب سے بڑی جماعت بن کے اُبھری ہے۔ اس لیے حکومت بنانے کا حق بھی ہمیں ملنا چاہیے۔ ہمارے پاس حکومت بنانے کے لیے تعداد پوری ہے جبکہ مسلم لیگ ن صرف آٹھ سیٹیں جیت سکی ہے۔
Leave a Reply