برطانیہ میں پولیس کا کہنا ہے کہ دارالحکومت لندن میں سنیچر کی شب دہشت گردی کے دو مختلف واقعات پیش آئے ہیں جن میں چھ افراد ہلاک اور 30 زخمی ہو گئے ہیں جبکہ تین مشتبہ افراد کو بھی لاک کیا گیا ہے۔ حکام کا کہنا ہے کہ ممکنہ طور لندن بریج کے علاقے میں ایک وین نے راہگیروں کو کچل دیا جبکہ بورو مارکیٹ میں لوگوں پر چاقو کے وار بھی کیے گئے۔
عینی شاہدین نے بتایا ہے کہ لندن برج پر لوگوں کو کچلنے کے بعد چاقوؤں سے مسلح کم سے کم تین افراد کو گاڑی سے نکل کر لوگوں کو زخمی کرتے ہوئے بورو مارکیٹ کی جانب دوڑتے ہوئے دیکھا گیا۔
پولیس کا کہنا ہے کہ ان مشتبہ افراد کو 10 بج کر آٹھ منٹ پر ملنے والی پہلی مدد کی کال کے آٹھ منٹ کے بعد ہی مار دیا گیا تھا۔
پولیس کے مطابق ان افراد نے جعلی خود کش جیکٹس پہنی ہوئی تھیں۔ تاحال ان افراد کی شناخت ظاہر نہیں کی گئی۔
پولیس کی جانب سے ان دو واقعات کو دہشت گردی کے واقعات قرار دیے جانے سے کچھ ہی دیر قبل وزیراعظم ٹریزامے کی جانب سے جاری بیان میں کہا گیا تھا کہ لندن میں پیش آنے والے واقعات کو ‘ممکنہ دہشت گردی’ کے واقعات کے طور پر دیکھا جا رہا ہے۔
خیال رہے کہ اتوار کو کوبرا کمیٹی کی میٹنگ ہوگی۔
