تحریر: محمد سجاول نواز
اپنی رحمت وبرکات سمیٹے ماہِ رمضان ہماری زندگی میں آرہا ہے۔جس طرح سے جمعہ کے دن کو تمام تر ایام سے افضل قرار دیا گیاہے،ایسے ہی تمام تر مہینوں سے افضل ماہِ رمضان کو کہا گیاہے۔ یہ واحد مہینہ ہے جوکہ صبرکرنا،برداشت کرنا،مستقل مزاجی،عاجزی،انکساری،ایثار،تقویٰ اورپرہیزگاری کا درس دیتا ہے۔انسان کئی دفعہ اپنی عقل کو علم کی بنا پر بروئے کار لاکر کام کرتاہے تو کئی دفعہ اپنی طبیعت کے مطابق اپنے زندگی کے کام سرانجام دیتا ہے۔کئی دفعہ وہ عقل کے تا بع ہوتا ہے اسی کی ریاضت اور مشق کرنے کا محتاج ہوتا ہے۔اس بنا پر وہ روزے جیسے اچھے عمل کا ارادہ کرتا ہے۔پھر اپنی طبیعت کو روزے کا پابند بناتا ہے،اپنے اس عہد کو اپنے اوپر لازم کر لیتا ہے۔یہاں تک کے اسے طبیعت کوعقل کے تابع کرنے کا مطلوبہ کام حاصل ہو جاتا ہے۔کئی دفعہ انسان خود کو کچھ روزے رکھنے کا پابند بھی کرتا ہے جو کہ اس نے سوچاہوتا ہے ، اگر میرا فلاں کام ہو گیا تو میں اتنے روزے رکھوں گا۔بعض اوقات اگر انسان سے غلطی سرزدہو جائے تو تب بھی انسان روزے رکھتا ہے ،تاکہ کسی طریقے سے اس کا ازالہ ہوسکے۔روزہ ایک ایسی نیکی ہے جو کہ انسان کو مضبوط بناتی ہے،اس کی بہیمتی کو با ہمت بناتی ہے۔چہرے کو نو رانیت بخشتی ہے،طبیعت کے تقاضوں کومغلوب کرتی ہے۔حضورپاکﷺکا ارشاد ہے کہ: روزے دار کے منہ کی خوشبو اللہ کے نزدیک مشک کی خوشبوسے بھی زیادہ پاکیزہ ہوتی ہے۔رمضان المبارک میں اللہ تعالیٰ شیاطین کو جھکڑ لیتا ہے ، جہنم کے دروازے بند کردیتا ہے اور جنت کے دروازے کھول دیتا ہے۔اتنا افضل برکات سمیٹِ ماہِ صیام ہماری زندگی میں دوبارہ آرہا ہے ۔ہمیں چاہیے کہ ہم ماہِ صیام میں کثرت سے درودِ پاکﷺ پڑھیں ،ہم کم از کم ایک دفعہ ماہِ صیام میں قرآن مجید مکمل کریں۔آجکل تقریباََ سارے مسلمان ہی قرآن مجید پڑھیں ہوئے ہیں ،لیکن چند ایسے بھی ہیں جن کو قرآن مجید پڑھے بہت عرصہ ہو گیا اور صحیح طریقے سے نہیں تلاوت کر سکتے ان کو چاہیے کہ وہ لوگ زیادہ سے زیادہ ذکرو اذکار کریںاور زیادہ بہتر ہے کہ اس مسجد میں ترایح ادا کریں جہاں قرآن مجید کے ساتھ تراویح پڑھائی جاتی ہو۔تراویح میں کم از کم ایک مرتبہ قرآن مجید پڑھنا یا سننا سنت مﺅ کدہ ہے۔جب انسان اپنے نفس کی خواہشات کو دباتا ہے اور اس کی پست عادات کو ختم کرتا ہے۔ اس کے اس عمل کی عالَمِ مثال میں ایک صورت صورتِ تقدیسیہ وجود میں آتی ہے۔صرف بھوکا ،پیاسا رہنے کا نام ہی روزہ نہیں بلکہ جھوٹ،باطل،لغواور جھوٹے سماجی معاہدے سے اعراض کرنا بھی روزہ ہے۔ان تینوں برائیوں کا تعلق انسانی نفس،قلب اور عقل سے ہے۔انسانی نفس کی سب سے بڑی خرابی جھوٹ کو فروغ دینا ہے۔حضرت عمر ؓ فرماتے ہیں کہ: انسان میں روزے کی حالت میں باطل کے خلاف اس کے قلب کے اندر جرات اور ہمت پیدا ہو۔مزاحمت پیدا ہوجائے۔حق قبول کرے ۔ اس کی نیت حق اور اس کا عزم درست ہوجائے۔ اس نیت اور عزم کی اساس پر حق پر مبنی معاشرت ،سیاست اور بہتر سماج پیدا کرنے کی جدوجہد کرے ۔اس کی ضد باطل ہو ۔انسانیت کی تباہی کی سیاست، معیشت، معاشرت اور معاملات سے اس کا قلب برات اعلان کردے۔ماہِ رمضان کے بابرکت مہینے میں ہمارے واعظین جو ممبر پر واعظ کرتے ہیںتو ان کویہ بھی چاہیے کہ وہ اندازہ کریںکہ جو فرد اس معاشرے میں رہ رہا ہے،وہ جس محلے میں رہ رہا ہے، وہ محلہ جس علاقے میں موجود ہے ،وہ علاقہ جس شہر میں ہے،وہ شہرجس ملک میں موجود ہ ہے۔وہ ملک جس بین الاقوامی نظام اور معاہدوں کے تابع ہے، اس کے جھوٹ،باطل اور لغو کے خلاف بھی واعظ کرنی چاہیے۔ روزہِ کے متعلق ارشاد ِ باری تعالیٰ ہے کہ: روزہ میرے لیے ہے اور میں ہی اس کا اجردوں گا۔رمضان المبارک میں اللہ تبارک وتعالیٰ کی رحمیتں اور شفقتیں انسانیت کی طرف متوجہ ہوتی ہیں۔رمضان کاموسم انسانی دلوں ،دماغوں اور نفسوں کو معتدل اور مہذب بنانے کا موسم ہے۔لیکن یہ تبھی مہذب ہوتے ہیں،جب ہمارے دل اللہ کی طرف متوجہ ہوں۔اللہ کی رحمت تو متوجہ ہے کیا ہمارے دل بھی متوجہ ہیں؟وہ بھی پوری طرح سے اللہ تعالیٰ کی رحمتوں کو سمیٹنے کے لیے متوجہ ہیںکیا؟ہمیںاپنے دلوں کوٹٹولنا ہے ۔اپنی عقلوں کو پر کھنا ہے۔اپنے نفسوں کی حالت کا جائزہ لینا ہے کہ کیا ان میں کوئی طلب اور تڑپ ہے؟جذبہ ہے؟کہ وہ رحمت کے اس موسم میں ،برکت کے اس مہینے میں اللہ کی طرف متوجہ ہوکر اپنے نفس کومہذب بنا لیں۔
رمضان کی تمام تر برکات کو سمیٹیں نیک نیت ،خلوص دل سے ہر قسم کے شر سے بچ کر عبادات ادا کریں۔ماہِ صیام کے بعد بھی ہم باقی ماہ میں بھی اسی طرح سے اللہ تعالیٰ کے احکامات کو بجا لائیں۔
