داؤدخیل(ذوالفقارخان) مسلم لیگ ن ایم پی اے انعام اللہ نیازی کی طرف سے پنجاب اسمبلی میں ڈی پی او میانوالی سرفراز خان ورک کے خلاف تحریک استحقاق پیش کرنے اور ضلع میانوالی کے حکومتی نمائندوں کی طرف سے اس تحریک کی حمایت کرنے کے خلاف داؤدخیل کی سول سوسائٹی نے گزشتہ روز بنک چوک پر جلسہ عام اور شیرشاہ سوری بازار میں ریلی نکالی۔ریلی کے شرکاء سے خطاب کرتے ہوئے سابق ناظم اور مزدور لیڈر غلام شبیر خان ، مزدور لیڈر محمدخلیل خان اور جمعیت علماپاکستان کے راہنما عبیداللہ خان شکورخیل نے کہاکہ ڈی پی او میانوالی سرفراز خان ورک ایک فرض شناس آفیسر ہیں۔ ان کے خلاف حکومتی نمائندوں کی طرف سے مخالفت شرم ناک فعل ہے۔عوامی نمائندے عوام کے تحفظ کے بجائے بھتہ خوروں اور سودخوروں کا تحفظ کرکے اپنے عہد سے بے وفائی کررہے ہیں۔ڈی پی او سرفراز خان ورک کی وجہ سے شرفا کو عزت کے ساتھ جینے کا حق ملنے لگاہے۔ اب سمگلرز، جواری، سودخور، بھتہ خور اوراشتہاریوں کو کوئی ٹھکانہ نہیں مل رہا۔ سیف اللہ خان ایڈووکیٹ اور سردار خان نے کہاکہ ڈی پی او سرفراز ورک کی جرائم کے خلاف کاوشیں قابلِ ستائش ہیں۔ مگر پولیس کے اندر موجود کالی بھیڑیں ہر تھانہ میں رشوت کا جو بازار گرم کیے ہوئے ہیں یہ ڈی پی او کے مشن کو نقصان پہنچانے کا باعث بن رہی ہیں۔ ان کالی بھیڑوں کو لگام دی جائے۔ ڈی پی او کے خلاف انعام اللہ نیازی کی تحریک استحقاق اور اس کی حمایت کرنے والی حکومتی نمائندوں کافعل انتہائی قابلِ مذمت ہے۔متحدہ پریس کلب کے صدر اکرم نیازی، سماجی ورکر عابد حسین عابدی اور پی ٹی آئی تحصیل میانوالی کے سابق صدر جاوید اقبال ملک ، سابق کونسلر حبیب اللہ بُڑا اور غلام شبیر حیدری نے کہاکہ ضلع بھر کی طرح داؤدخیل کے عوام بھی ڈی پی او کے ساتھ ہیں۔ڈی پی او سرفراز خان ورک کی بدولت ضلع بھر سے سودخوروں، بھتہ خوروں اور دیگر جرائم پیشہ افراد میں بہت زیادہ کمی واقع ہوئی ہے۔ اب شریف شہری سکھ کا سانس لینے لگے ہیں۔کاروباری حضرات اب کھل کے کاروباری سرگرمیاں سرانجام دے رہے ہیں۔سید سخاوت حسین کربلائی نے کہاکہ انعام اللہ نیازی ضلع میانوالی کی فکر چھوڑیں اور بھکر میں اپنے ضلع کے عوام کی خدمت کریں۔ ڈی پی او سرفراز ورک احسن طریقے سے اپنے فرائض سرانجام دے رہے ہیں البتہ ہماری ایجنسیوں کے مقامی اہلکار امام بار گاہ یا مساجد میں ہونے والے ہمارے چھوٹے موٹے اختلافات کو فی الفور ڈی پی او اور اُوپر کی سطح پر پہنچا کر زیادتی کرتے ہیں۔ہم اپنے یہ اختلافات مقامی سطح پر بہتر طریقے سے حل کرلیتے ہیں۔ میں ان ایجنسیوں کے اہلکاروں کو تنبیہہ کرتاہوں کہ وہ رپورٹنگ کے معاملہ میں محتاط رویہ اپنائیں۔ بعد ازاں بنک چوک سے نیشنل بنک تک شیرشاہ سوری بازار میں ڈی پی او سرفراز ورک کے حق میں اور انعام اللہ نیازی اور اس کے حمایتیوں کے خلاف ریلی نکالی گئی۔ ریلی میں زبردست نعرے بازی کی گئی۔ ریلی میں درجنوں عام شہری شریک ہوئے۔ اس موقع پر مقامی پولیس اور ایجنسیوں کے اہلکار بھی موجود تھے۔
