داؤدخیل( نامہ نگار)تھانہ موچھ کے چھوٹے تھانیداروں نے رشوت کے بغیر صلح کرنے والے ملزمان کو رہاکرنے سے انکار کردیا۔ مجبوراََ لواحقین نے چودہ ہزار روپے میں ڈیل کرکے حوالات میں بند اپنے افراد کو رہائی دلائی۔ ہم ڈی پی او سرفراز خان ورک کے روبرو پیش ہوکر احتجاج کریں گے۔ مقصود خان درگئی خیل اور ملک سعید نے صحافیوں کو بتایاکہ ملک شفااللہ، ملک حنیف، حفیظ اللہ، سعیداللہ اور ہدایت اللہ وغیرہ کے جانور خان محمد والا کے ایک زمیندار کھیتوں میں گھس گئے۔ جس پر اُس نے تھانہ موچھ میں مونگی کی کھڑی فصل کو نقصان پہنچانے کی درخواست دے دی۔ پولیس نے مذکورہ افراد کو گرفتار کرلیا۔ دوسری طرف معززین علاقہ نے فریقین میں صلح کرادی مگر پولیس نے گرفتار شدگان کو چھوڑنے سے انکار کردیا۔ پولیس نے کہاکہ آپ کی صلح آپس میں ہوئی ہے پولیس کے ساتھ نہیں۔ جس پر مجبوراََ مقصودخان اور ملک سعید وغیرہ کو تفتیشی آفیسرز اے ایس آئی صاحب داد شاہ اور اے ایس آئی محمد اکرم کے ساتھ مُک مُکا کرنا پڑی۔ تھانیداروں نے تیس ہزارروپے ڈیمانڈ کی اور بالآخر بات چود ہ ہزار روپے پر طے ہوگئی۔ صاحب داد شاہ اور محمداکرم نے مقصود خان اور ملک سعید سے رشوت کی رقم وصول کی اور ان کے حوالات میں بند افراد کو رہا کردیا۔مقصود خان اور ملک سعیدنے ساری صورت حال کا ذکر مولوی عظمت اللہ خان سے کیا جس پر طے پایاکہ ہم ڈی پی او میانوالی سرفراز خان ورک کے روبرو پیش ہوکر احتجاج کریں گے۔ اور مذکورہ تھانیداروں کے خلاف ایف آئی آر درج کرنے اور گرفتار کرنے کا مطالبہ کریں گے ۔
