پپلاں ( محمد رضوان آکاش )ماہ مقدس رمضان المبارک میں شدید ترین گرمی اور بجلی کی طویل ترین غیر اعلانیہ لوڈشیڈنگ نے روزہ داروں کی مت مار دی ۔سورج سوا نیزے پر آکر آگ برسانے لگا۔بجلی کی بندش اورحبس کی وجہ سے ہسپتالوں میں داخل بیمارا ور ضعیف مریض اور شہری گرمی کی شدت سے بلبلانے لگے مساجد اور گھروں میں وضو اور پینے کے لئے پانی نایاب کاروبار اور معمولات زندگی ٹھپ ہو کر رہ گئے ،کئی افراد گرمی کی شدت اور حبس کی وجہ سے بے ہوش ہوگئے۔شہریوں کا شدید ترین گرمی میں بجلی کی بندش پر حکومت کے خلاف شدید احتجاج ۔اس موقع پر شہریوں نے اپنے تاثرات میں کہا کہ موجودہ حکمرانوں نے الیکشن مہم کے دوران ملک سے اندھیروں اور بجلی کی لوڈشیڈنگ کے چھ ماہ، ایک سال اور ڈیڑھ سال میں مکمل خاتمہ کے لئے بلند و باند دعوے تو بہت کئے لیکن دو سال سے زیادہ عرصہ گزرنے کے باوجود لوڈشیڈنگ میں کمی کی بجائے مزید اضافہ ہوگیا ہے جبکہ سحری اور افطاری کے وقت بھی لوڈشیدنگ نہ کرنے کے دعوے بھی دوسرے دعووں کی طرح جھوٹے ثابت ہوئے اور ان اوقات میں بھی بجلی کی لوڈ شیڈنگ جاری ہے جس کی وجہ سے روزہ دار شدید مشکلات سے دو چار ہیں۔انہوں نے کہا کہ چشمہ کے پاور پروجیکٹوں سے ہزاروں میگاواٹ بجلی پیدا ہورہی لیکن پوری تحصیل کے لوگ لوڈشیڈنگ کا شدید ترین عذاب جھیل رہے ہیں نہ تو علاقہ کے لوگوں کو ان پروجیکٹوں کی کوئی ریالٹی دی جارہی ہے اور نہ ہی غریب لوگوں کو ان پروجیکٹوں پر چھوٹی چھوٹی ملازمتوں تک میں کوئی کوٹا دیا جا رہا ہے جو اس علاقہ کے عوام کی حق تلفی ہے اور کوئی انکے حق کے لیئے آواز بھی بلند نہیں کرتا اور یہ سب کچھ اس علاقہ کے لوگوں کو پی ٹی آئی کو ووٹ دینے کی وجہ سے حکومت کی انتقامی کاروائی کا نتیجہ ہے شہریوں نے حکومت سے مطالبہ کیا کہ اس علاقہ میں بیس بیس گھنٹے تک کی لوڈ شیڈنگ کا فوری نوٹس لیا جائے اور اس سلسلہ کو فوری بند کروایا جائے۔
