پپلاں ( محمد رضوان آکاش) نویں خبر آئی اے، مخدوم ساڈا بھائی اے، بلدیاتی الیکشن کے لیئے نئی صف بندیوں اورنئے اتحاد کے لیئے جوڑ توڑ کا آغاز ہو گیا، ملک فیروز جوئیہ نے اپنے انتہائی قریبی ساتھی معروف سیاسی شخصیت سید اقبال شاہ آف کچہ گجرات کو لال جھنڈی دکھا کر اُمیدوار برائے چئیرمین یو سی کچہ گجرات مخدوم زادہ سید قیس شاہ آف بلوٹ شریف کی غیر مشروط حمایت کا اعلان کر دیا،نئے سیاسی اتحاد سے سیاسی حلقوں میں کھلبلی مچ گئی۔ مختلف قسم کی قیاس آرایوں اور سیاسی تبصروں کا بازار گرم۔انتہائی با وثوق ذرائع سے معلوم ہوا ہے کہ سابق مسلم لیگی ایم پی اے ملک محمد فیروز جوئیہ کی رہائش گاہ نصیر والہ پر مخدوم زادہ سید قیس شاہ آف بلوٹ شریف نے گزشتہ دنوں ملاقات کی جسمیں ملک محمد فیروز جوئیہ گروپ کے سابق کونسلر یو سی کچہ گجرات ملک محمد امین محرم خیل کے علاوہ دیگر افراد بھی موجود تھے۔ اس موقع پر مخدوم زادہ سید قیس شاہ آف بلوٹ شریف اور سابق ایم پی اے ملک فیروز جوئیہ نے نئے بلدیاتی الیکشن کے انعقاد اور حلقہ کی سیاسی صورت حال پر تفصیلی گفتگو کی اور اپنے اپنے بزرگوں کے سابقہ تعلقات کو بحال کرنے کے عزم کا اعادہ کیا۔ سابق ایم پی اے ملک محمد فیروز جوئیہ نے اس موقع پر مخدوم زادہ سید قیس شاہ آف بلوٹ شریف سے گفتگو کرتے ہوے کہا کہ میرے والد سابق ایم پی اے ومشیر وزیر اعلی پنجاب حاجی ملک غلام شبیر جوئیہ مرحوم کے بلوٹ شریف کے مخدوم خاندان سے انتہائی قریبی مراسم اور برادرانہ تعلقات رہے ہیں لیکن چند ناگزیر وجوہات کی وجہ سے ہمارے درمیان غلط فہمیاں پیدا ہوئی تھیں جس پر مخدوم زادہ سید قیس شاہ آف بلوٹ شریف نے متوقع بلدیاتی الیکشن میں انکی حمایت طلب کی جس پر سابق ایم پی ملک محمد فیروز جوئیہ نے انہیں یقین دلایا کہ وہ آئندہ بلدیاتی الیکشن میں انکی غیر مشروط حمایت کریں گے اور مقامی اخبار کے صحافیوں سے فون پر رابطہ کر کے اس بات کا ا علان کیا گیا۔ بعد ازاں اس نئے سیاسی اتحاد بارے جب صحافیوں نے مخدوم زادہ سید قیس شاہ آف بلوٹ شریف سے رابطہ کر کے اسکی تصدیق کی تو انہوں نے صحافیوں سے گفتگو کرتے ہوئے کہا کہ یہ بات سچ ہے اور ملک فیروز جوئیہ اور میری ملاقات انکی رہائش گاہ پر ہوئی تھی جس میں ہمارے مرحوم بزرگوں کے پرانے تعلقات کو بحال کرنے کا اعادہ کیا گیا اور بلدیاتی الیکشن میں غیر مشروط طور پر ملک فیروز جوئیہ نے میری حمایت کا اعلان کیا ہے جس پر میں اُنکا تہہ دل سے مشکور ہوں۔ پرانے تعلقات بحال ہونے پرمخدوم زادہ سید قیس شاہ آف بلوٹ شریف کی رہائش گاہ پر سینکڑوں افراد نے انہیں مبارکباد پیش کرتے ہوئے نئے بلدیاتی الیکشن میں کامیابی کی ایڈوانس مبارکباد پیش کی جس پر انہوں نے تمام دوستوں اور ساتھیوں کا شکریہ ادا کیا۔ مبینہ اطلاعات کے مطابق کچہ گجرات کی معروف سیاسی شخصیت سید اقبال شاہ نے بھی بدلتی ہوئی اس نئی سیاسی صورت حال پر سابق وزیر معدنیات پنجاب اور ڈپٹی اپوزیشن لیڈر پنجاب سردار محمد سبطین خان سے اپنے دیرینہ سیاسی تعلقات بحال کرنے کے لیئے اپنے دوستوں کے ذریعے رابطوں کاآغاز کر دیا جس کی تصدیق کے لیئے صحافیوں نے ڈپٹی اپوزیشن لیڈر پنجاب سردار محمد سبطین خان سے رابطہ کر کے صورت حال معلوم کرنے کی کوشش کی لیکن ان سے رابطہ نہ ہو سکا۔ اس نئے سیاسی اتحاد سے سیاسی حلقوں میں مختلف قسم کے تبصرے کیئے جا رہے ہیں اور حلقہ پی پی46 میں اپ سیٹ کا امکان ظاہر کیا جا رہا ہے جبکہ حلقہ میں سیاسی سرگرمیوں میں بھی دن بدن اضافہ ہو رہا ہے آنے والے چند دن میں مزید نئے اتحاد بننے کا امکان ظاہر کیا جا رہا ہے
