داؤدخیل(نامہ نگار) فرض شناس ڈی پی او کے خلاف تحریکِ استحقاق پیش کرنا میانوالی کے شریف شہریوں کے مینڈیٹ کے توہین ہے۔ تحریک استحقاق دراصل مظلوموں اور عزت دار شریف لوگوں کے خلاف اور ڈاکوؤں ، بھتہ خوروں کو تحفظ دینے کے لیے تھی۔میانوالی بار ایسوسی ایشن کے جنرل سیکرٹری محمد ہمایوں علوی، سابق نائب ناظم لطیف اللہ خان آزاد ایڈووکیٹ اورمسلم لیگ یوتھ سرگودھاڈویژن کے نائب صدر منظور احمد خان نے کہاکہ ڈی پی او میانوالی سرفراز خان ورک جرائم پیشہ افراد، بھتہ خور،ڈاکوؤں، منشیات فروشوں کے خلاف ننگی تلوار بن چکے ہیں۔ ضلع بھر میں جرائم کی شرح بہت کم ہوچکی ہے۔ شریف شہری سکھ کا سانس لینے لگے ہیں لیکن تاجر سیاستدان ایک فرض شناس ڈی پی او کے خلاف پنجاب اسمبلی میں تحریکِ استحقاق پیش کرتے پھرتے ہیں۔ نام نہاد تاجر سیاستدان بھتہ خوروں، ڈاکوؤں اور منشیات فروشوں کے ساتھ مل کر ڈی پی او کے خلاف پروپیگنڈا مہم چلا رہاہے۔ انہوں نے کہاکہ مفاد پرست سیاستدانوں کو ناکامی ہوگی اور میانوالی کا دانش ور طبقہ اور شریف شہری ڈی پی او کے خلاف ہونے والی تمام چالوں کو ناکام بنا دیں گے۔ خادم اعلیٰ پنجاب اور پنجاب اسمبلی بھی فرض شناس ڈی پی او میانوالی سرفراز خان ورک کو مکمل طور پر سپورٹ کرے تاکہ پنجاب حکومت کی نیک نامی میں اضافہ ہو۔
