داؤدخیل(ذوالفقارخان)پنجاب بیراجز امپروومنٹ فیز ٹو پراجیکٹ بحالی و تجدید جناح بیراج میں شامل جناح پبلک پارک کے سنگ بنیاد کے موقع پر منعقدہ تقریب سے خطاب کرتے ہوئے حلقہ این اے اکہتر سے مسلم لیگ ن کے ایم این اے حاجی عبیداللہ خان شادی خیل نے کہاکہ میانوالی کا سو کالڈ وزیرِ اعظم میانوالی سے راہداری روٹ کی مخالفت کررہاہے۔ میانوالی میں ایک بات کرتاہے اور روالپنڈی میں الگ۔ پشاور میں جا کر الگ بولی بولتاہے۔میانوالی کے نوجوان پی ٹی آئی کے چیئرمین کو ایک ایک مسیج ضرور کریں کہ میانوالی کے پراجیکٹس میں رکاوٹ نہ ڈالے۔ جناح پبلک پارک ڈویژن بھر میں سب سے شاندار پارک ہوگا۔ غریب عوام کے لیے پنجاب حکومت کا یہ عظیم تحفہ ہے۔نام نہاد نواب آف کالاباغ مسلم لیگ ن کو فراڈ کہتے ہیں مگر حقیقت میں خود اخباری لیڈری کے سوا کچھ نہیں۔ مسلم لیگ ن کی حکومت صرف دعوے نہیں عمل کرکے دکھاتی ہے۔ اب ہر مہینے میانوالی کے عوام کو خوشخبریاں ملیں گی۔اٹھارہ جولائی کو خواجہ آباد تا داؤدخیل ہائی وے کی تعمیر شروع ہوجائے گی۔کیڈٹ کالج عیسیٰ خیل میں تین چار ماہ میں افتتاح کے ساتھ ہی کلاسز کا باقاعدہ آغاز ہوجائے گا۔ جون کے بعد میانوالی کے ہر چھوٹے بڑے دیہات کو بلاامتیاز اسفالٹ روڈ ملیں گے۔پائی خیل اسٹیشن تا موچھ اسفالٹ روڈ اور سیوریج کا سسٹم کا افتتاح جولائی میں ہوگا۔ داؤدخیل کو تحصیل کا درجہ اور شہر کا سیوریج سسٹم بھی بتدریج وقت آنے پر ہوجائے گا، ابھی گنجائش نہیں ہے۔مسلم لیگ ن کے ووٹر او سپورٹرز شادیوں پر فائرنگ جیسے غیرقانونی کاموں سے مکمل اجتناب کریں ۔ اپنے علاقے میں ہونے والے تعمیراتی کاموں کی خود نگرانی کریں تاکہ کوئی ٹھیکیدار کرپشن نہ کرسکے۔ڈائریکٹر سوشل انوائرنمنٹ بیراجز سید ناظم حسین شاہ نے کہاکہ جناح پبلک پارک ساڑھے آٹھ ایکڑ رقبے پر مشتمل ہوگا۔ اس میں بچوں اور خواتین کے لیے بہت سے جھولے اور تفریح کے دیگر لوازمات لگائے جائیں گے۔ اکیس ہزار مربع فٹ پر چنبیلی و دیگر پھولوں کا باغ ہوگا۔ یہ اس سال کے اختتام تک مکمل ہوجائے گا۔یہ پاکستان کے جدید ترین پارکس میں سے ایک ہوگا۔مقامی کمپنی کے ترجمان میجر (ر) عصمت اللہ خان نے کہاکہ میں مسلم لیگ ن کے ایم این اے عبیداللہ شادی خیل کا ساتھی ہوں۔ اور یہاں کمپنی کا ایک ادنیٰ کارکن۔جناح بیراج ری ہیبلی ٹیشن کا تین سال پر پراجیکٹ دو سال میں مکمل کیا۔ دوسکولز او ر ایک ہسپتال اور ایمبولینس سروس مہیا کی گئی ہے۔ رانا محمد ادریس نے کہاکہ پی ٹی آئی کے ایم این اے کا کوئی فون تک نہیں سنتا۔کالاباغ ہسپتال کی اپ گریڈیشن نواب آف کالاباغ کی وجہ سے نہیں بلکہ مسلم لیگی ایم این اے کی مرہون منت ہے۔انہوں نے کہاکہ اب ہر ماہ فرزند میانوالی شادی خیل کے ہاتھوں ترقیاتی کاموں کا افتتاح ہوتا دیکھیں گے۔انہوں نے کہاکہ اگر بارہ اکتوبر انیس سو ننانوے کو بدترین اور بزدل جنرل پرویز مشرف حکومت پر قبضہ نہ کرتا تو آج میان نواز شریف پاکستان کو ایشیا کا ٹائیگر بنا چکے ہوتے۔آج دہشت گردی اور لوڈشیڈنگ نہ ہوتی۔ضمنی الیکشن میں حلقہ کے عوام نے عمران خان کی چھوڑی ہوئی سیٹ پر پی ٹی آئی کے بجائے مسلم لیگی راہنما کو جتوا کر بہت اچھا فیصلہ کیا۔عمران خان نے اپنی آبائی سیٹ چھوڑ کرمیانوالی کی مٹی سے غداری کی ہے۔ تقریب کے آغاز سے پہلے پارک کی افتتاحی تختی کی نقاب کشائی کی گئی۔ مہمانِ خصوصی اپنی پارٹی کے درجنوں ساتھیوں سمیت پنڈال میں پہنچے۔ شرکاء نے کھڑے ہو کر استقبال کیا۔ شاہ جہان خان نے تلاوتِ قرآن کی سعادت حاصل کی۔رانا محمد ادریس نے نعتیہ اشعار اور تمام شرکاء سے درود شریف پڑھوا کر تقریب کا آغاز کیا۔ تقریب کے اختتام پر شرکاء واپس چلے گئے جبکہ مہمان خصوصی اور ان کے قریبی احباب، محکمہ انہار اور کمپنی کے آفیسرز اور صحافیوں کو کمپنی کے سائٹ ایریا میں ضیافت دی گئی۔
