داؤدخیل( ذوالفقارخان) ضلع میانوالی پی ٹی آئی کا لاڑکانہ ہے۔ عمران خان اور ریحام خان جلد میانوالی کا دورہ کریں گے۔ دوہزار پندرہ انتخابات کا سال ہے۔ ورکرز کمر کس لیں۔راہداری روٹ میانوالی کا حق ہے۔اب این اے اکہتر کی دھاندلی بھی کھلے گی۔ یہ باتیں پی ٹی آئی کے ایم این اے امجدعلی خان نے گزشتہ رات عمران خان کی طرف سے عبدالغفار خان لمے خیل کے بیٹوں، بھتیجوں کی شادی کی مبارک باد کا پیغام پہنچانے کے لیے داؤدخیل میں منعقدہ تقریب سے خطاب اور بعد ازاں صحافیوں سے گفتگو کے دوران کہیں۔ امجدعلی خان نے کہاکہ این اے 125 کے بعد 122 میں بھی مسلم لیگ ن کا دھڑن تختہ ہونے والا ہے۔ اب این اے 71 سمیت لاتعداد حلقے کھلیں گے جس سے مسلم لیگ ن کی ناجائز حکومت کے سارے پول کھل جائیں گے۔انہوں نے کہاکہ ہمارے ورکرز نظریات کی سیاست کریں اور آپس میں تمام اختلافات بھلا دیں۔انہوں نے کہاکہ چائنہ راہداری روٹ اور پپلاں میں پُل ضلع میانوالی کا حق ہے، جسے مسلم لیگی حکومت غصب کرنے پر تُلی ہوئی ہے۔ضلع میانوالی کے حکومتی سیاستدان انتقامی سیاست میں مصروف ہیں۔انہوں نے کہا کہ 2015ء انتخابات کا سال ہے۔ پارٹی ورکرز کمر کس لیں۔سلیم گل خان نے کہاکہ امجدعلی خان کو حکومت کا ساتھ دینے کے لیے بہت سے لالچ دیئے گئے مگر یہ اپنے نظریات پر ڈٹے رہے۔امجدعلی خان نے کہاکہ گندم کی فصل کا ژالہ باری سے ہونے والا اربوں روپے کے نقصان کا حکومت نوٹس لے۔لفٹ سکیم تری خیل سمیت تمام لفٹ سکیمز کو لوڈشیڈنگ سے مستثنیٰ قرار دیاجائے۔ پی ٹی آئی داؤدخیل کے سینئر راہنما عبدالغفار خان لمے خیل نے کہاکہ پی ٹی آئی عام آدمی پارٹی ہے ۔غریبوں کی جماعت ہے۔ نظریہ پاکستان کی حقیقی ترجمان پارٹی ہے۔آئندہ انتخابات میں پی ٹی آئی ملک بھر سے واضح اکثریت سے کامیابی حاصل کرے گی۔جاوید عباس خان ایڈووکیٹ نے کہاکہ عمران خان نے انٹرا پارٹی انتخابات کو کالعدم قرار دے کر نظریاتی اور پرانے ورکرز کے دل جیت لیے۔ اب پارٹی نچلی سطح پر حقیقی جمہوری پارٹی بن کر اُبھرے گی۔ تقریب میں ریحان ہاشمی نے تلاوت کی سعادت حاصل کی۔ مبارک باد کی اس تقریب میں انسپکٹر (ر) سیف اللہ خان، ڈاکٹر نصر اللہ خان، یار محمد قریشی،ذیشان عباس نقوی، عطااللہ خان،حبیب اللہ خان، خلاص خان جھنگے خیل، محمد خان،فیض اللہ خان، محمد اکبر خان، عنایت خان و دیگر درجنوں ورکرز اور شہریوں نے شرکت کی۔تقریب کے اختتام پر پُرتکلف عشائیہ کا انتظام کیا گیا۔
