لاہور: ورلڈکونسل آف ریلیجنز (پاکستان) کی جانب سے پنجابی کمپلیکس آڈیٹوریم،قذافی سٹیڈیم لاہور میں بین المذاہب امن کانفرنس کا انعقاد کیا گیا۔ جس میں ملک کے نمایاں مذہبی علماء، دانشوروں،صحافیوں، سیاستدانوں اوروزراء نے شرکت کی۔کانفرنس کی صدارت ورلڈکونسل آف ریلیجنز (پاکستان) کے چیئرمین اور وفاق المدارس العربیہ کے ناظم اعلیٰ مولانا محمد حنیف جالندھری نے کی۔ کانفرنس کے شرکاء اورمقررین نے پاکستان میں بد امنی کی مختلف وجوہات پر تبادلہ خیال کیا اور کہا کہ پاکستان میں موجودہ بد امنی کی صورتحال کو ختم کرنے کے لیے ایک دوسرے سے تعاون کرنا چاہئے۔ انہوں نے کہا کہ مذہبی انتہا پسندی اور تشدد کے واقعات کے پیچھے کوئی مذہبی گروہ نہیں ہوسکتا کیونکہ دنیا کا کوئی بھی مذہب انتہا پسندی اور دوسرے مذاہب کی بے حرمتی کی قطعی اجازت نہیں دیتا۔ سانحہ یوحنا آباد کی مذمت کرتے ہوئے انہوں نے کہاکہ دہشت گرد کسی بھی مذہب سے تعلق نہیں رکھتے، جوعبادت گاہوں کونقصان پہنچائیں، اس کے بعدکے ردعمل میں زندہ لوگوں کوجلایا جانا بھی انسانیت کی توہین ہے جس میں مذہبی تعصبات کوہوادی گئی،جوقابل مذمت ہے۔ مسلمانوں کوجلایاجانا،مسیحیوں کودھماکے میں مارنا، دونوں ہی واقعات انسانیت کیساتھ ظلم ہے، کیونکہ انسانیت کااحترام مذہبی بنیادوں سے بالاترہے۔ کوئی سکھ ہو، مسلمان ہو،ہندو ہویامسیحی، سب انسان ہونے کے ناطے قابل احترام ہیں۔ اس طرح کے واقعات پاکستان میں امن کوخراب کرنے کی سازش ہے، تاکہ لوگوں کوآپس میں مذہبی اورمسلکی تفرقات میں مبتلا کرکے لڑوایا جائے جس سے پاکستان کے وقار اور استحکام کو نقصان پہنچایا جاسکے۔ پاکستان میں امن کی خراب صورتحال کے پیش نظر کاروباری طبقہ یہاں پیسہ لگانے کو تیار نہیں، نوجوان نسل اپنے لیے بیرون ملک وسائل ڈھونڈنے کوترجیح دے رہی ہے، جوپاکستان کے استحکا م اورترقی کیلئے ناقابل تلافی نقصان ہے۔وطن عزیز کی ترقی کیلئے پاکستان میں ا من کا ہوناناگزیرہے جس کیلئے ہم سب کومل کرکوشش کرنا ہوگی۔اس کانفرنس کا مقصد یہ ہے کہ یہا ں پر موجود ہر طبقہ فکرکے لوگ جواپنے اپنے حلقوں میں نمایاں حیثیت رکھتے ہیں ان کی ذمہ داری بنتی ہے کہ جہاں تک ممکن ہوسکے مصالحت اورلوگوں میں شعور بیدار کرکے اس طرح کے واقعات کوروکیں۔ہمیں مسلمان، مسیحی، ہندو یاسکھ بن کرسوچنے کی بجائے پاکستانی کی حیثیت سے سوچنا ہوگاکہ شرپسندوں کوکیسے شکست دی جائے اور تعصبات کونظراندازکرکے استحکام پاکستان کیلئے مل کر کام کیا جا سکے کیونکہ پاکستان میں امن ہوگاتوہی ترقی ہوگی۔ لوگوں کے جان و مال کے تحفظ سے ہی لوگوں میں پاکستان کی ترقی کیلئے کام کرنے کاجذبہ ابھرے گا۔ کانفرنس کے مقررین میں چیئرمین ورلڈ کونسل آف ریلیجنز (پاکستان) مولانا محمد حنیف جالندھری،وفاقی وزیربرائے مذہبی اموروبین المذاہب ہم آہنگی سردارمحمدیوسف، صدررابطۃالمدارس الاسلامیہ (پاکستان )مولاناعبدالمالک، سیکرٹری جنرل وفاق المدارس السلفیہ (پاکستان )مولانا محمدیٰسین ظفر، وفاق المدارس الشیعہ پاکستان سے علامہ سید محمد نجفی، بشپ عرفان جمیل(بشپ آف لاہور)، سیکرٹری محکمہ اوقاف و مذہبی امور (پنجاب) محمدشہریارسلطان، ڈائریکٹرجنرل محکمہ اوقاف ومذہبی امور (پنجاب) ڈاکٹر طاہر رضا بخاری، مرکزی رہنما جمعیت علماء اسلام پاکستان مولانا محمد امجد خان، سیکرٹری اطلاعات جمعیت علماء( پاکستان) مولانا محمد خان لغاری، بشپ آرچ ڈائیوسس لاہورآرچ بشپ سبسٹین فرانسزشا، ڈائریکٹرآف دی پیس سنٹر (لاہور) فادر جیمز چنن، پنڈت بالمیک مندر بھگت لال کھوکھر، ریورنڈ ڈاکٹر مجید ایبل اورپادری ایمانویل کھوکھرشامل تھے۔ سٹیج سیکریٹری کی خدمات حافظ محمد نعمان حامد (کو آرڈینیٹر: ورلڈ کونسل آف ریلیجنز پاکستان) نے سرانجام دیں۔ کانفرنس کے آخر میں شرکاء نے مشترکہ اعلامیہ کی منظوری دی۔
