گلگت بلتستان کے بارے شروع دن سے ہی عوام کو یا تو بے خبر رکھا گیا یا عام عوام نے کبھی اپنی تاریخ کو جاننے کی کوشش ہی نہیں کی۔ریاست جموں و کشمیر کی عملداری میں آنے سے پہلے مقامی حکمرانوں نے گلگت کو مرکز بنا کر پورے خطے میں حکومت قائم کرنے کی کوشش کی لیکن دو حکمران راجہ گوہر آمان اور علی شیر خان انچن کے سوا کسی کو ایسا موقع نہیں ملا۔ ان دو حکمرانوں کو بھی مکمل طور پر پورے خطے میں حکمرانی نصیب نہیں ہوئی تھوڑی مدت کی حکمرانی کے یہ نڈر حکمران بھی اس خطے میں اپنی رٹ قائم نہ رکھ سکے۔۔ہر علاقے کا راجہ دوسرے علاقے کے راجے کو زیر کرنے کے پالیسی پر عمل پیرا ر ہا جس کے باعث اس خطے کے لوگوں کو ایک قوم بننے کا موقع ہی نہیں ملا۔تاریخ میں دو خطے دردستان اور بلورستان کا ذکر ملتا ہے اور ان کی حدود بھی کبھی پھیلی اور سکڑتی رہی ۔اسی کشمکش میں ہی کرسی اور اقتدار کی خاطر اس وقت کی سکھ شاہی لاہوری حکومت کو یہاں کے لوگوں نے تخت پر بیٹھا دیا اور چترال جو گلگت کا ہی حصہ تھا اس سے بھی ہاتھ دھو بیٹھے اور چترال مالا کنڈ انجنسی میں شامل ہوا۔استور لداخ بلتستان کے ساتھ گلگت وزارت کا قیام عمل میں لایا گیا ۔ انگریزوں اور مہارجہ کی منصوبہ بندی سے گلگت کے ملحقہ علاقہ جات چلاس پونیال ہنزہ نگر بھی مفتوحہ علاقے بن گئے اور ان کو پولیٹکل علاقہ جات کا نام دیا گیا ۔یاد رہے کہ انیس سو پینتیس میں جو معاہدہ انگریزوں کے ساتھ طے پایا تھا یہی علاقے ساٹھ سال کے پٹے میں دئے گئے تھے ۔اٹھارہ سو چھیالیس سے لیکر ۱۹۴۷ تک بلا شرکت مہارجہ جموں و کشمیر نے ان علاقوں پر حکومت کی ۔ان ستر سالوں میں جموں و کشمیر کے اس خطے کو ایک صوبے کی شکل دی گئی اور ریاست جموں و کشمیر کی پراچا اسمبلی میں نمائندگی دی گئی جو ۱۹۴۰ تک قائم رہی۔ڈاک خانے اور ٹیلی گراف، تعمیرات اور بندوبست اور تعلیم کے شعبے قائم ہوئے۔جب ہندوستان کی تقسیم کا وقت آیا تو ریاست جموں و کشمیر پاکستان اور بھارت کے درمیان وجہ تنازعہ بن گیا۔اس کے اثرات اس خطے میں پڑے یا نہ پڑے وہ ایک علحیدہ موضوع ہے اس کالم میں اس کا احاطہ مشکل ہوگا اس لئے ان کو ایک طرف رکھ کر یہاں کے ہیروز نے لوگوں سے جو باتیں چھپائی ان کی بات کرنا زیادہ مناسب معلوم ہوتا ہے۔یہ خطہ آزاد ہوا یا آزادی دلائی گئی یا یہاں بغاوت ہوئی اس بارے بھی حاصل سیر بحث ہو سکتی ہے یہ بھی اس کالم کا موضوع نہیں ۔سب سے پہلی بات یہ کہ نومبر میں گلگت سکاوٹس جس کا سربراہ میجر برون تھا اس کے ذریعے مہارجہ جموں و کشمیر کا گورنر گرفتار ہوا یا اسے حفاظت میں لیا گیا۔ یہاں کے لوگوں کو گلہ اس بات کا ہے کہ ان کو اندھیرے میں رکھا گیا اور اس اندھیرے میں غیر نہیں اپنے ہی لوگ تھے۔یہاں کے لوگوں کو یہ بتایا گیا کہ انقلاب لایا گیا ہے اور ایک عبوری حکومت بنائی گئی ہے۔۔۔دوسری بات یہ کہ یہ نہیں بتایا گیا کہ خطے کے انتظام کو سمبھالنے کے لئے اپنوں نے ہی پاکستانی نمائندے کو بلایا۔۔تیسرا یہ بتایا گیا کہ اس خطے کا الحاق پاکستان سے کر دیا گیاہے۔چوتھی بات یہ کہ یہاں کے ہیروز نے معمولی ملازمتیں قبول کیں ۔عبوری کونسل کے صدر محترم نے سی ایس او کی۔اور کمانڈر انچیف اور دیگر نے آزاد کشمیر ریگولر فورس میں شمولیت اختیار کی۔کہنے کا مطلب یہ ہے کہ یہ سب ایک سوچے سمجھے منصوبے پر عمل پیرا تھے اور جس مقصد سے ایسا کرایا گیا تھا اسی مقصد کو سمجھنے کی ضرورت ہے۔اوپر مذکورہ چیزوں میں حقیقت نام کی کوئی چیز تھی نہیں ۔اگر ہوتی تو مقامی حکومت کا کمانڈر انچیف مرکز کو چھوڑ کر ایک پلاٹون کا لیڈر نہ بنتا اور آزاد کشمیر ریگولر فورس میں شامل نہ ہوتا۔صدر سی ایس او نہیں بنتا۔میجر برون گلگت سکاوٹس کا کمانڈر نہ ہوتا۔اور سب سے بڑی بات آزاد کشمیر حکومت اور پاکستانی حکومت کے درمیان انیس انچاس کا معاہدہ نہ ہوتا۔یہ علاقے اس وقت بھی آزاد کشمیر کے ساتھ شمار کئے گئے اور جس کی تصدیق آج تک قائم معاہدہ کراچی کر رہا ہے۔اگر آج ہی حکومت پاکستان اور آزاد کشمیر حکومت اس معاہدے کو منسوخ کر دیں تو یہ خطہ جسے گلگت بلتستان کہا جاتا ہے از خود آزاد کشمیر کا حصہ بن جاتا ہے۔حکومت پاکستان کے آئین میں بھی ان خطوں کو متنازعہ بتایا گیا ہےایک ہم ہی نادان تھے جو آنکھیں بند کر کے جھوٹی کہانیوں کو دہراتے رہے۔غلطیاں ہم سے سرزد ہوتی رہئیں اور ہم ہر غلطی کو چھپاتے رہے اور عوام کو بیوقوف بنا کر کشمیریوں سے متنفر کرانے میں بھرپور کردار ادا کیا۔چلیں مان لتے ہیں کشمیریوں اور جی بی کے عوام میں دوریاں پیدا کرنے میں کامیابی تو ملی کیا ایسا کرکے ہم نے اپنے آپ کو محکوم رکھنے کا جواز فراہم نہیں کیا؟۔اب بھی لوگوں کو بیوقوف بنایا جا رہا ہے حقیقت جان کر بھی اس سے منہ موڑا جا رہا ہے۔اور چند نام نہاد لیڈر جو ملک سے باہر ہیں لوگوں کے دلوں میں شکوک و شہبات بڑھا رہے ہیں ۔یہاں کے لوگ علحیدہ پسند تحریکوں میں شامل نہیں یہاں کے لوگوں کو جان بوجھ کر گھسیٹا جا رہا ہے۔پاکستان کا موقف صاف اور واضح ہے جس کی یہاں کے لوگ تائید کرتے ہیں ۔کشمیر ایک متنازعہ خطہ ہے جس کا حل ہونا باقی ہے ۔ اب یہاں موجود تمام اکائیوں اور سیاسی پارٹیوں کو چاہئے کہ وہ پاکستان کے اس اصولی موقف کو مزید تقویت پیدا کرنے کے لئے گلگت بلتستان کو ریاست جموں و کشمیر کا حصہ قرار دیتے ہوئے گلگت بلتستان اور آزاد کشمیر کا الحاق کرکے ایک مضبوط اور طاقتور کشمیر اسمبلی کا درجہ دلوانے میں اپنا کردار ادا کریں ۔یہاں کے عوام اور سادح لوح لوگوں کو صوبہ اور آئینی حقوق کے جھوٹے وعدے اور دلاسے دے کر ان کا مزید استحصال نہ کیا جائے اور وہ تمام لوگ جو اس خطے کی تاریخ سے نا بلد ہیں ان کے لئے اتنا عرض ہے کہ گلگت بلتستان کے مسائل کا واحد حل اس خطے کو کشمیر کا حصہ بنانے اور یہاں ریاست کشمیر کے قوانین نافذ کرنے میں ہی ہے ۔اور ایسا کرنا پاکستان کے لئے کوئی مشکل کام نہیں اور نہ ہی اس کے لئے کسی آئینی ترمیم کی ضرورت ہے
