کچھ روایات یا رواج ایسے ہوتے ہیں جو وقت کے ساتھ اپنی افادیت کھو دیتے ہیں یا حالات اور واقعات ان روایات اور رواج کو ترک کرنے پر مجبور کر دیتے ہیں ۔گلگت بلتستان میں ہمیشہ سے شین قوم کا غلبہ رہا شائد یہی وجہ ہے کہ گلگت دردستان میں ہر چیز شینوں سے ہی منسوب ہوئی۔جیسے شینو گلاب، شینو بزونو، شینا کھوئی، شینو بلوگون، شینو شوکہ(چوغہ) کہا تو یہی جاتا ہے کہ یہاں کی مقامی آبادی بروشو تھی اور شین ایک فاتح قوم کے طور پر ان علاقوں میں وارد ہوئی شین اپنا تعلق عرب قبیلے سے جوڑتے ہیں ۔بحر حال جو بھی ہے ان کے رسوم و رواج میں کچھ چیزیں ایسی ہیں جو اب تک چلی آرہی ہیں اور کچھ متروک ہو چکی ہیں۔ ایسا ہی ایک رواج مکھن کو جمع کر کےاس کو ایک خاص قسم کے درخت جسے اردو میں بھوج پتر کہا جاتا ہے اور اس کی چھال تہہ در تہہ لیپٹی ہوئی ہوتی ہے اس درخت کو مقامی زبان میں جوں زی اور اس کی چھال جو بالکل کاغذ کی طرح ہوتی ہے جسے مقامی لوگ ژوش کہتے ہیں میں پیک کیا جاتا تھا ۔قدیم وقتوں میں دودھ سے لسی اور لسی سے حاصل ہونے والے مکھن کو جوں زی درخت(بھوج پتر) کی چھال زوش میں رکھا جاتا تھا۔لسی سے جو مکھن جس کی مقدار تھوڑی ہوتی ہے اسے شینا میں مَنی کہا جاتا ہے جب بہت ساری مکھن کی مَنیاں جمع ہو جاتی جو عموماً پانچ کلو یا دس کلو کی ہوا کرتی تھیں وہ جوزیئے مَنو کہلاتے تھے ۔پھر ژوش میں پیک شدہ ان پانچ یا دس کلو کے مَنوں کو زمین میں دفنایا جاتا تھا۔ ایسا بھی نہیں تھا کہ اس گھی کو جہاں مرضی دفن کیا جائے۔ اس کا ایک خاص طریقہ تھا ۔اس گھی کو ہمیشہ ندی یا نہری والی زمیں کے قریب جہاں اس چھال کو نمی میئسر ہو دفن کے لئے چنا جاتا تھا جہاں وہ سارا سال پڑا رہتا تھا اور نمی کے باعث اس گھی میں تازگی برقرار رہتی تھی ۔ یہ گھی سالوں تک نہیں نکال جاتا سوائے خوشی اور غمی کے دنوں کے ۔شین قوم سے متعلق یہ کہاوت بھی مشہور ہے کہ شین زمینر گھی اجی ۔لفظی ترجمہ یوں ہے کہ شین زمین کے نیچے گھی زمین سے اوپر یعنی یہ گھی کسی کے مرنے پر ہی زمین سے نکالا جاتا تھا۔۔گھی جتنا زیا دہ پرانا ہوتا اتنی اس خاندان کی تعریف ہوتی تھی ۔ کہیں کہیں اب بھی ایسا دیکھنے میں آتا ہے لیکن بیشتر علاقوں میں یہ رواج ختم ہوا ہے ۔اس کی ایک وجہ یہ بھی ہے کہ لوگوں کو تجارت کے مواقع میئسر آگئے اور دوسری طرف میڈیکل سائینس کی رو سے کڑوا گھی انسانی صحت کے لئے مضر سمجھا جانے لگا۔ اور جدید بیماریاں جس میں ہائی بلڈ پریشر گیسٹیک، اور موٹاپا شامل ہیں نے بھی لوگوں کواس روایت کو ترک کرنے پر مجبور کر دیا ہے ۔ اب ژوش میں پیک گھی نظر تو آتا ہے لیکن یہ دفن ہونے کے لئے نہیں بلکہ پیکنگ اور فروخت اوراسے مارکیٹ پہنچانے کے لئے جہاں اسے بڑے کنستروں میں منتقل کیا جاتا ہے اور برائے فروخت پیش کیا جاتا ہے۔ گلگت بلتستان میں اب بھی دو موقعوں پر دیسی گھی کا زیادہ استعمال ہوتا ہے ایک ماہ رمضان میں اور دوسرا اس وقت جب کسی کے ہاں بچہ یا بچی کی ولادت ہوتی ہے ۔ ان دو موقعوں پر آنے والے مہمانوں کی تواضح خاطر مدارت دیسی حلوہ جسے مقامی زبان میں مُل کہا جاتا ہے سے کی جاتی ہے جس میں دیسی گھی انڈیل کر مہمانوں کے لئے پیش کیا جاتا ہے
