واں بھچراں (ایف یو نیوز)واں بھچراں و گردونواح میں جہاں عید الاضحی کی تیاریاں عروج پر اورجانوروں کی قیمتیں آسمان سے باتیں کرر ہی ہیں وہیں سبزیوں و پھلوں کی قیمتوں کو بھی پر لگ گئے ہیں۔جس کے پیش نظر شہر یوں میں پنجاب حکومت و ضلعی انتظامیہ کے خلاف شدید غم و غصہ پایا جاتا ہے ، غریب اور متوسط طبقہ سے تعلق رکھنے والے خریدار پریشان ہیں کہ کہیں مہنگائی کے باعث شاید بچوں کے ساتھ عید نہ کرسکیں اور عید کے روز بھی بچوں کی روزی روٹی کے لئے محنت کرنا پڑے۔ تفصیلا ت کے مطابق عید الاضحی قریب آتے ہی جہاں چاقو چھریوں کو تیز کیا جارہاہے، وہیں سبزی و پھل فروشوں نے بھی اپنی چھریاں ٹوکے تیز کر لیے ہیں۔واں بھچراں میں سبزیوں کی قیمتیں آسمان پر پہنچ گئی ہیں،نرخوں میں اضافے کے بعد شہری شدید پریشان ہیں۔ عید قربان پر پیاز، ٹماٹر، دھنیا، ادرک، لہسن کا زیادہ استعمال کیا جا تا ہے لیکن حیرت کی بات یہ ہے کہ انہی اشیاء کی قیمتوں میں خود ساختہ اضافہ کیا گیاہے۔ سبزیوں کی قیمتوں میں اضافے پر ضلعی حکومت مکمل خاموش دکھائی دے رہی ہے۔نہ کوئی قیمتوں پر قابو رکھنے والا ہے اور نہ ہی سبزی فروشوں نے نرخ نامے آویزاں کیے ہوئے ہیں ، شہریوں کا کوئی پرسان حال نہیں۔اشیائے خوردونوش کی قیمتوں میں اضافے کے بعد لگتا یہ ہے کہ عید قربان پر قربانی کرنے والے چٹ پٹے کھانوں کا مزہ کم ہی اٹھا سکیں گے۔ شہریوں نے وزیر اعلیٰ پنجاب میاں شہباز شریف، ڈی سی او میانوالی اور اے سی میانوالی سے نوٹس لینے کا مطالبہ کیا ہے۔
