لاہور(ایف یو نیوز)یوم یکجہتی کشمیر کے موقع پر کالمسٹ کونسل آف پاکستان کے سنیئر نائب صدر عقیل خان نے کہا کہ کشمیر کی آزادی تک پاکستان اور بھارت کے تعلقات کبھی بھی اچھے نہیں ہوسکتے۔ کشمیر پاکستان کی شہ رگ ہے اور کوئی بھی انسان اپنی شہ رگ دشمن کے ہاتھ میں نہیں دے سکتا۔ انہوں نے کہا کشمیر میں بھارت کی جانب سے ڈھائے گئے ظلم وستم کسی سے پوشیدہ نہیں۔ اگر کشمیر بھارت کا حصہ ہوتا تو بھارت کبھی بھی اپنے ہم وطنوں پر اتنا ظلم نہ کرتا۔ عقیل خان نے کہا کہ حکومت پاکستان اور آرمی چیف کو بھارت سے فیصلہ کن مذاکرات کرنے چاہییں۔ اگر کشمیر پر بھارت مذاکرات نہیں کرتا تو پھر اس سے دوستی کی پینگیں بڑھانے کی کیا ضرورت ہے؟ کشمیر ایسا علاقہ ہے جو قیام پاکستان سے آج تک ظلم کی دلدل میں پھنسا ہوا ہے۔کشمیر سے یکجہتی کی تقریب رفیق ماڈل گرلزایلیمنٹری سکول جمبر میں منعقد ہوئی ۔ تقریب سے خطاب کرتے ہوئے رفیق ماڈل گرلزایلمنٹری سکول کے پرنسپل شفیق احمد خان نے کہا کہ کشمیر پاکستان کا حصہ ہے اور یہ بھارت اور انگریزوں کی بددیانتی کی وجہ سے ہم سے الگ ہوا۔کشمیری عوام کے دل آج بھی پاکستان کے ساتھ دھڑکتے ہیں۔ تقریب سے سکول کے شکیل احمد خان ٹی ای قصور نے خطاب کرتے ہوئے کہا کہ کشمیر کی آزادی پر کوئی سمجھوتہ قبول نہیں۔ کشمیر کی آزادی ہماری آزادی ہے۔ کشمیر ی عوام کو اس کا حق بھارت کو دینا ہوگا۔ بھارت اگر کشمیر ی بھائیوں سے اسی طرح ظلم وستم کرتا رہا تو وہ دن دور نہیں جب بھارت روس کی طرح بکھرا ہوا ہوگا۔ تقریب کے آخرمیں کشمیر ی بھائیوں کی آزادی کے لیے دعا بھی کرائی گئی۔
