داؤدخیل(نامہ نگار) گزشتہ روز اسکندرآباد میں پی ٹی آئی کے نوجوانوں حسیب نیازی، بدرحبیب، مستفیق اعوان،ملک طارق، پرویزاختر،کامران،عدنان ودیگر کی طرف سے دی گئی دعوت اورپریس کانفرنس میں یوسی موچھ کے چیئرمین مولوی عظمت اللہ خان نے کہاکہ ضلع میانوالی کو جان بوجھ کے نظرانداز کیاجارہاہے۔حکومتی نمائندے عوامی نہیں انتقامی سیاست کی دیواریں کھڑی کررہے ہیں۔خواجہ آباد تا جناح بیراج ہائی وے کے کھنڈرات ان کی ذہنی پستی کے آئینہ دار ہیں۔اس سڑک کانام شادی خیل روڈ رکھ دینا چاہیے۔ہم جلد پی ٹی آئی کے ایم پی ایز اور ایم این اے اور دیگر ضلعی ذمہ داران کے ساتھ مل کر تاریخ کا ایک اہم احتجاج شروع کررہے ہیں جوحکومتی نمائندوں اور انتظامیہ کو ہلا کے رکھ دے گا۔ انہوں نے کہاکہ ہم عوام کا استحصال برداشت نہیں کریں گے۔ ہائی وے پر ہونے والے جانی و مالی نقصان پر حکومت اور متعلقہ ادارے کے خلاف عدالتی کارروائی کریں گے۔مقامی سیمنٹ اور کھاد فیکٹریزکو ملکی قوانین اور لیبر لاز کی پابندی کرنا ہوگی۔مقامی ہنر مند افراد کو ترجیح بنیاد پر ملازمت دیں اور تنخواہ میں بھی مقامی اور غیرمقامی ملازموں میں تفریق کی بداخلاقی ختم کریں۔ فیکٹریز کی آلودگی سے گردونواح کی آبادیاں متاثر ہورہی ہیں مگر یہ صحت اور تعلیم کی سہولت سے محروم ہیں۔مولوی عظمت اللہ خان نے کہاکہ پی ٹی آئی کے تمام عوامی نمائندے ہر وقت عوام کی پہنچ میں ہیں۔ ہمارے ایم پی ایز اور ایم این اے ہروقت عوام کو دستیاب ہیں۔انہوں نے کہاکہ پی ٹی آئی کے نوجوان اپنی صفوں میں اتحاد برقرار رکھیں اور اپنی جماعت کو مضبوط بنانے میں اپنا کردار ادا کریں۔مولوی عظمت اللہ خان نے کہاکہ ضمنی الیکشن میں حمزہ شہباز اور عبیداللہ شادی خیل نے وعدہ کیا تھاکہ داؤدخیل کو تحصیل کا درجہ دلوائیں گے مگر اب اُنہیں یہ وعدہ یاد نہیں۔ داؤدخیل کا شناختی کارڈ آفس بھی یہاں سے شفٹ کردیاگیاہے۔ موچھ گرلز کالج کئی سال سے مکمل ہونے کا منتظر ہے۔گڈ گورننس والوں نے عوام خصوصاََ نوجوانوں کو فرسٹریشن میں مبتلا کردیاہے۔ انہوں نے کہاکہ اگر پی ٹی آئی کی قیادت نے اُنہیں ضلعی چیئرمین کے لیے نامزد کیاتو وہ ضلع میانوالی کو ایک مثالی ضلع بنائیں گے جہاں صرف قانون کی حکمرانی ہوگی۔ عوام و خواص کی تفریق ختم اور ہر شہری کو برابر حقوق ملیں گے۔
