داؤدخیل(ذوالفقارخان) نواب آف کالاباغ کے اسٹیٹ منیجر ملک عامر کے قتل میں نامزد ملزمان اور مقتول کے لواحقین کے درمیان صلح ہوگئی۔ صلح کی تقریب ملک عامر کے گھر واقع لاری اڈا کالاباغ پر منعقد ہوئی۔ تفصیلات کے مطابق اسٹیٹ منیجر ملک عامرمحمود کو سات اگست دوہزار پندرہ کو تری خیل لفٹ اسکیم کے قریب دونامعلوم موٹرسائیکل سواروں نے فائرنگ کرکے قتل کردیاتھا۔ جس پر مقتول کے بھائی ملک اویس نے پہلے نامعلوم افراد اور بعدازاں نوابزادہ ملک وحیدخان، اسٹیٹ کے ملازم محمدغلام، صحافی اور کونسلر مشتاق حسین، ضیااللہ خان نمبردار آف سلطان والا اور محمدماجد خان آف مستی والا کو نامزد ملزم درج کرا دیا۔ ملک وحیدخان نے قبل ازگرفتاری ضمانت کرالی جبکہ باقی ملزمان کو پولیس نے گرفتار کرکے شامل تفتیش کرلیا۔ ملزمان نے کئی بار مقتول کے لواحقین کو ہر قسم کی اپنی بے گناہی پیش کرنے کی یقین دہانی کرائی مگر معاملہ لٹکا رہا۔بالآخر حمیدخان مہار آف کمرمشانی،ملک امیرمحمدخان، حبیب اللہ خان ہندال خیل، نمبردار اکرام اللہ خان، ملک احمد شاہ و دیگر کئی معززین کی کوششوں سے فریقین میں غلط فہمیاں دُور کرکے گزشتہ روز صلح کرادی گئی۔ صلح کی تقریب میں سابق ناظم رورل داؤدخیل ملک سرفرازخان، نائب ناظم سید شمیم عباس ، عامرحیات خان،ملک محمد جاویدآف پکی شاہمردان، ثنااللہ خان ترگ، ملک محمدزمان اعوان نئی آبادی پکی شاہمردان، علی خان ماما، ملک انصاراللہ خان، ملک سردارخان،ماسٹرظفراقبال، مظفرخان سلطان خیل اور دیگر درجنوں افراد فریقین کی طرف سے شریک ہوئے۔ صلح کی تقریب سے خطاب کرتے ہوئے چیئرمین یوسی موچھ مولوی عظمت اللہ خان نے کہاکہ صلح کرانا کئی مقبول حج کے برابر اجر والا کام ہے۔ صلح سے شیطان کو تکلیف اور رحمن کو خوشی ہوتی ہے۔ صلح سے معاشرے میں امن اور بھائی چارے کو فروغ ملتاہے۔جن لوگوں نے صلح میں کردار ادا کیا ہم اُن کی عظمت کو سلام کرتے ہیں۔ سابق ناظم رورل داؤدخیل حاجی ملک سرفراز خان نے کہاکہ صلح انسانیت کی پہچان ہے۔ صلح تباہی سے بچانے کا عمل ہے۔ انہوں نے کہاکہ صلح سے غلط فہمیاں اور کدورتیں ختم ہوتی ہیں۔ حبیب اللہ خان ہندال خیل نے کہاکہ ہم ملزمان کی طرف سے مقتول ملک عامر محمود کے گھر پوری برادری اور جرگے سمیت حاضر ہوئے ہیں۔ہم ہر قسم کی اپنی بے گناہی پیش کرنے کے لیے حاضر ہیں۔ اس کے باوجود ہم مقتول کے لواحقین سے معافی کے بھی طلب گار ہیں۔ ہمیں بھی مقتول ملک عامر کے قتل کا دُکھ ہے۔ مقتول کے بھائی ملک اویس خان نے کہاکہ ہم اپنے بھائی کے قتل میں نامزد ملزمان کو اللہ کے واسطے معاف کرتے ہیں۔ اس پر شرکاء نے مقتول کے لواحقین کا شکریہ ادا کیا۔ آخر پر مقتول کے بھائیوں ملک طاہر اور ملک اویس سے ملزمان کے لواحقین کو گلے ملوایا گیا۔
