داؤدخیل رُورل (سیاسی رپورٹ: ذوالفقارخان) ۔ یوسی رُورل داؤدخیل میں تین گروپس آمنے سامنے ہیں۔ مسلم لیگ ن کی طرف سے ابھی تک کسی کوٹکٹ جاری نہیں کیاگیاجبکہ پی ٹی آئی نے پرویزاختر (چیئرمین )اور محمد مستفیق کو(وائس چیئرمین) کا ٹکٹ جاری کردیاہے۔دوسرے دوگروپس میں سیدالیاس شاہ(چیئرمین)، طارق اقبال (وائس چیئرمین) اور ملک سرفراز خان(چیئرمین) اور سید کاشف شاہ ( وائس چیئرمین) کے اُمیدوار ہیں۔ تاحال مقابلہ سیدالیاس شاہ اور ملک سرفراز خان گروپ کے درمیان دکھائی دے رہاہے۔ ان دونوں گروپس کو مسلم لیگ ن کی ضلعی قیادت کی حمایت حاصل ہے۔ ضلعی قیادت نے مبینہ طور پراسی لیے ان دونوں میں سے کسی گروپ کو ٹکٹ جاری نہ کرنے کا فیصلہ کررکھاہے۔ان کاخیال ہے کہ جو بھی جیتا وہ مسلم لیگ ن کے ضلعی چیئرمین کے اُمیدوار کو سپورٹ کرے گا۔سیدالیاس شاہ کے گروپ کو سب سے بڑی سپورٹ سیدساجد شاہ کی طرف سے ہے، اس کے ساتھ ساتھ ایم این اے عبیداللہ خان شادی خیل کا رجحان بھی ان کی طرف ہے۔جبکہ ان کاوائس چیئرمین کا امیدوار ملک طارق اقبال نووارد ہے البتہ مالی طور پر بہت مستحکم ہے۔سیدالیاس شاہ خود بھی پہلی بار طبع آزمائی کررہاہے البتہ اسلام آباد میں پی ٹی سی ایل میں دورانِ ملازمت یونین میں حصہ لینے کا تجربہ ان کے پاس ہے۔ملک سرفرازخان گروپ کو سب سے بڑی سپورٹ خود اپنی شخصیت کی حاصل ہے۔ ایک بار نائب ناظم اور ایک بار ناظم منتخب ہوچکے ہیں۔ چمک کا فائدہ بھی ان کو حاصل ہے۔ سابق وزیرمملکت ملک عمادخان وغیرہ کی آشیرباد بھی حاصل ہے۔اس کے ساتھ سابق صوبائی وزیر گل حمیدخان روکھڑی بھی مبینہ طور پر ملک سرفراز خان کو ترجیح دیتے ہیں۔خیرآباد سے سید حسن رضا شاہ گروپ کی حمایت بھی ان کو حاصل ہوچکی ہے۔ان کے وائس چیئرمین کے اُمیدوار سید کاشف شاہ بھی نووارد ہیں البتہ یہ سیدالیاس شاہ کے رشتہ دار ہونے اور ایک ہی شہرکا ہونے کی وجہ سے سیدالیاس شاہ کے ووٹ بنک کے لیے مسائل پیدا کرسکتے ہیں۔مذکورہ دونوں گروپس کو کسی وارڈ میں شادی خیل کی تو کسی میں روکھڑی اور کسی میں ملک فواد خان کے ساتھیوں کی حمایت حاصل ہے۔زیادہ تر لوگ مقامی طور پر خود فیصلے کررہے ہیں۔حتیٰ کہ پی ٹی آئی کے کئی نوجوانوں اور برادریوں نے بھی ان گروپس کو سامنے یا درپردہ حمایت دے رکھی ہے۔پی ٹی آئی کے الیکٹیبل اُمیدواروں کی عدم دلچسپی اور پی ٹی آئی کے کچھ ورکرز کی سخت تنقید اور جارحانہ رویہ کی وجہ سے الیکٹیبل کے سامنے نہ آنے سے پی ٹی آئی کے کچھ ورکرز نے بالکل نئے اُمیدوار سامنے کردیئے ہیں جو قدرے غیرمعروف ہیں۔ابھی تک پی ٹی آئی کی مقامی قیادت اور ضلعی قیادت کی طرف سے مہم میں دلچسپی نظر نہیں آرہی۔ ہوسکتاہے محرم الحرام کے پہلے عشرہ کے بعد سیاسی سرگرمیوں میں تیزی آئے اور پی ٹی آئی کی ضلعی قیادت کی طرف سے کوئی پیش رفت ہو۔ ملک سرفرازخان گروپ کے وائس چیئرمین سید کاشف شاہ خود کو پی ٹی آئی کا حصہ شمار کرتے ہیں البتہ وہ گروپ کی وجہ سے آزاد اُمیدوار کے طور پر الیکشن میں حصہ لے رہے ہیں۔ اگر پی ٹی آئی کے اُمیدوار کھڑے رہے تو اس کا نقصان ملک سرفراز خان کو اُٹھانا پڑسکتاہے۔جبکہ پی ٹی آئی کے ساتھ اگر کسی بات پر سمجھوتہ ہوجاتاہے تو ان کی پوزیشن بہت مضبوط ہوجائے گی۔ اس وقت تک سید الیاس شاہ اور ملک سرفرازخان گروپ ہی مقابلے میں دکھائی دیتے ہیں۔ بظاہر بہت سخت مقابلہ دکھائی دے رہاہے۔ جہاں ملک سرفراز خان گروپ کو سید حسن رضاشاہ کی حمایت سے کافی ریلیف ملا ہے تو وہیں پی ٹی آئی والی تلوار ابھی ان کے سر پر لٹک رہی ہے۔جبکہ سیدالیاس شاہ کو نئے نائب ناظم کی وجہ سے بھی بہت سپورٹ ملی ہے۔ بلکہ اس مقابلے کے آغاز کے دنوں میں بہت سے لوگ سیدالیاس شاہ گروپ کو فیورٹ کہتے دکھائی دیتے ہیں۔ اگر عوام کی نمائندگی کی بات کی جائے تو ملک سرفرازخان اور سید الیاس شاہ اکثرو بیشتر راولپنڈی اسلام آباد میں رہتے ہیں۔البتہ ملک سرفراز خان سماجی حوالے سے ایک مقام رکھتے ہیں مگر سیدالیاس شاہ بھی اپنے سرپرست سیدساجد شاہ کی سماجی خدمات کا فائدہ حاصل کرسکتے ہیں۔ان کے وائس چیئرمینز طارق اقبال اور کاشف شاہ نووارد ہیں۔ طارق اقبال کو برادری کے ساتھ ساتھ چمک کا فائدہ بھی حاصل ہے جبکہ سید کاشف شاہ سابق سینئر سول جج مرحوم سید ظفر شاہ کے صاحبزادہ ہونے اور برادری کا فائدہ حاصل کرسکتے ہیں۔ عوامی مسائل کے حل کے حوالے ابھی تک کوئی ایسا اُمیدوار دکھائی نہیں دیتا۔ سب اُمیدوار ذاتی تعلقات، سرمایہ، پبلیسٹی، سفارشوں، منت سماجت وغیرہ جیسے حربے استعمال کرکے ووٹ لینے میں مصروف ہے۔ کسی کو عوامی مسائل سے دلچسپی نظر نہیں آتی۔ اس یوسی میں پاکستان کی دو بڑی فیکٹریاں موجود ہیں جن سے مقامی آبادیوں کو بہت سے تحفظات ہیں مگر کسی اُمیدوار میں یہ جرات دکھائی نہیں دیتی کہ اس طرف کوئی بیان تک دے سکیں۔تعلیم اور صحت، تھانہ ، سیوریج، واٹرسپلائی جیسے مسائل پر ابھی تک کسی طرف سے کوئی بات نہیں کی جارہی۔ مذکورہ اُمیدواروں کا کوئی منشور سامنے نہیں آیا۔ البتہ پی ٹی آئی کے اُمیدواروں کو اپنی پارٹی کا بنابنایا منشور ٹکٹ کے ساتھ مل گیاہے۔ اس تجزیے کو حتمی نہ سمجھا جائے۔ معلومات میں غلطی کا امکان ہوسکتاہے اور اس کے ساتھ ساتھ ابھی بہت دن باقی ہیں ، آنے والے دنوں میں موجودہ صورت حال میں کئی ڈرامائی تبدیلیاں واقعی ہوسکتی ہیں۔
