ہاتھی کے دانت کھانے کے اور دکھانے کے اور؟

تحریر: شفقت اللہ
قرآن کریم میں ویسے تو ہر قسم کے جرائم کے خاتمے کیلئے سزا بیان کی گئی ہے اور ایک بہترین اور مکمل امن و اخلاقی اقدار سے لبریز معاشرہ قائم کرنے کی بھی تعلیمات موجود ہیں لیکن سب سے بڑی سزا میری نظر میں جھوٹ بولنے کی ہے کیوں کہ قرآنی آیات کا مفہوم ہے کہ جھوٹ بولنے والے پر اللہ تعالیٰ خود لعنت فرماتے ہیں اور جس شخص پر اللہ کی لعنت ہو اس کی کیا دنیا اور کیا آخرت ؟؟حدیث کا مفہوم ہے کہ نبی کریم ﷺ نے فرمایا کبھی مذاق میں بھی جھوٹ مت بولو کہ یہ گناہ کبیرہ ہے ‘اور میری نظر میں سب سے بڑی اخلاقی و معاشرتی برائی ہے ۔سقراط کلاس میں بیٹھا تھا کہ اس کے استاد نے سوال کیا کہ کیا برائی کا وجود ہے ؟تو سقراط نے جواباََ سوال کیا کہ کیا اندھیرے کا وجود ہے ؟ تو استاد نے جواب دیا کہ ہاں لیکن سقراط نے منفی کرتے ہوئے کہا کہ اندھیرے کا کوئی وجود نہیں یہ روشنی کی عدم دستیابی کی ایک شکل ہے اور ہم فزکس میں روشنی کے متعلق علم حاصل کرتے ہیں نہ کہ اندھیرے کا !سقراط نے پھر سے سوال کیا کہ کیا ٹھند کا وجود ہے تو استاد نے اثبات میں جواب دیتے ہوئے کہا کہ جی ہے !تو سقراط نے پھر سے منفی کرتے ہوئے جواب دیا کہ نہیں ٹھنڈ کا وجود نہیں ہے یہ حرارت کی عدم موجودگی کی ایک شکل ہے اور کتب میں ہم حرارت کا علم سیکھتے ہیں نہ کہ ٹھنڈ کا اسی طرح برائی کا بھی کوئی وجود نہیں بلکہ یہ اچھائی کی عدم موجودگی کی ایک صورت ہے ۔اگر دیکھا جائے تو اچھائی اور برائی کی طرح ہی جھوٹ اور سچ بھی ایک ہی سمند رکے دو کنارے ہیں جو کبھی ایک نہیں ہو سکتے ۔جھوٹ اس صورت میں پیدا ہوتا ہے جب سچ کو چھپانے کی کوشش کی جاتی ہے اور پھرایک جھوٹ کو چھپانے کیلئے کئی جھوٹ بولنے پڑتے ہیں جیسا کہ ماضی قریب میں ایک پاناما لیکس نے سر اٹھایا جس میں میاں محمد نواز شریف کی فیملی مؤرد الزام ٹھہرائی گئی اور الزام مسترد کرنے کیلئے میاں صاحب نے تین دفعہ قوم سے خطاب کیا اور ہر بار ان کی بات پچھلی کی گئی بات سے مماثل نہ تھی اسی طرح انکے بیٹوں اور بیٹی اور دیگر فیملی ممبران کوبھی جھوٹ کا سہارا لینا پڑا اور ہمیشہ سوال روپیہ کا جواب روٹی ملتا اور جب ان کے جھوٹ پکڑے گئے تو میاں صاحب کے درباریوں نے جواباََ یہ دلیل دی کہ وہ محض سیاسی بیان تھے ۔یہاں یہ ثابت ہوتا ہے کہ اگر آپ پاکستان میں ہیں اور با اثر سیاسی لیڈر ہیں تو آپ کے سامنے تمام اخلاقی و قانونی اقدار پست ہیں !آپ اگر دولت مند ہیں اور اچھے کرپشن میں کسی بھی قسم کی مہارت رکھتے ہیں تو کوئی ضروری نہیں کہ آپ علیم و شجیع ہیں یا نہیں آپ کو حکومتی تخت پر بلا حجت برا جمان کیا جا سکتا ہے ۔یہ باتیں کوئی نئی نہیں ہیں بلکہ ماضی بعید میں نہ جائیں ماضی قریب میں ہی دیکھیں تو 2013 کے عام انتخابات سے پہلے جس طرح تمام سیاسی جماعتیں عوام کے سامنے وعدے کرتی نظر آئیں یوں لگا کہ جیسے پاکستان کی معیشت کی کایا پلٹنے والا ہے کچھ ایسا انقلاب آنے والا ہے جس کا انتظار رعایا کو بہت دنوں سے تھا جیسے میاں محمد شہباز شریف کہتے تھے کہ اگر دو سال میں لوڈ شیڈنگ کا خاتمہ نہ کر دیا تو میرا نام بدل دینا ، پیپلز پارٹی کے دور حکومت میں جتنی کرپشن ہوئی ریکارڈ ٹوٹ گئے ،قرضوں کے ریکارڈ ٹوٹ گئے اگر میں نے انہیں سڑکوں پر نہ گھسیٹا تو میرا نام بدل دینا ،میاں نواز شریف صاحب کہتے تھے پیپلز پارٹی نے ملک و قوم کو لوٹا ہے یہ لوگ عوام کے مجرم ہیں اور ہم ثابت بھی کریں گے اور ملک و قوم کیلئے ان کا احتساب بھی کریں گے ان دونوں کے بیانات کے مدنظر اگر دیکھا جائے تو میاں شہباز شریف صاحب کو تو اپنا نام اب بدل لینا چاہئے الف ،بے ، جیم، دال کچھ بھی رکھ لیں لیکن اب شہباز شریف اور خادم اعلیٰ نہیں رکھیں !!اور میاں نواز شریف صاحب کی تو کیا بات ہے وہ تو شہنشاہ ،مغلیہ سلطنت کے تخت پر براجمان ہیں ان سے تو کوئی سوال بھی نہیں کر سکتا اور رہی احتساب کی بات تو احتساب ہمیشہ وہی کرتے ہیں جن کا کردار خود صاف ہو ۔الیکشن کے بعد عمران خان اور طاہرالقادری نے جب دہائی ڈالی تو عوام نے سوچا کہ شاید تحریر سکوائر لکھی جائے اور ہمارا مستقبل بدل جائے لیکن دونوں کے دعوے دھرے رہ گئے سوائے اس کے کہ اپنے سیاسی مستقبل اور مشہوری کیلئے عوام کو استعمال کیا !اور حال ہی میں پاناما کیس تو اپنی جگہ جیسے ہی جنرل راحیل شریف ریٹائرڈ ہوئے محترم آصف علی زرداری جو ہمیشہ مسکراتے رہتے ہیں اور ان کی مسکراہٹ کا راز میری نظر میں یہ ہے کہ وہ اس قوم کی قسمت اور اپنی قسمت پر ہنستے ہیں کہ ایک شخص جس کو اسی قوم اور اسی ملک نے سات سال جیل میں رکھا اسی قوم نے اسے بلا حیل و حجت اسی ملک کے تخت پر بٹھا دیا نے بھی اب عوام کو با لکل ویسے ہی بے وقوف بنا نے کا سوچا ہے ۔جیسے 2013کے عام انتخابات سے پہلے شریف برادران پیپلز پارٹی کی کرپشن کے رونے روتے تھے اور بڑے بڑے وعدے کرتے تھے اسی طرح اب زرداری صاحب بھی بالکل ویسے ہی وعدوں سے عوام کا دل محظوظ کرتے نظر آئیں گے جو کہ وہ حقیقی معنوں میں کبھی بھی وفا نہیں کرنا چاہتے کیونکہ اسی پر ہی تو ان کی سیاست اور کاروبار منحصر ہے اور وہ طاقت ور ہیں میری نظر میں پاکستان اس وقت جتنے بھی بحرانوں سے نبرد آزما ہو رہا ہے وہ سب مصنوعی پیدا کردہ ہیں کیونکہ ان کی جھوٹی شان و شوکت کے ستون بھی یہی روٹی ،کپڑا ،مکان اور لوڈ شیڈنگ کے خاتمے کے جھوٹے دعوے ہی ہیں اور اس جھوٹ کو میں پاکستان فول کانام دیتا ہوں ۔کیونکہ یہ ایک ایسا جھوٹ ہے جو آپ کبھی بھی کسی بھی وقت بول سکتے ہو اور آپ پر کسی قسم کا کوئی فتویٰ یا کورٹ نوٹس نہیں لیا جائے گا اس کی کھلی چھٹی ہے اخلاقی طور پر بھی اور معاشرتی طور پر بھی اب تو عوام کی بھی عادت ہو گئی ہے جب تک یہ جھوٹ نہ سنیں تب تک انہیں بھی اعتبار نہیں آتا کہ یہ سیاسی نمائندہ ہے یا نہیں !!ویسے تو ایک بات پاکستانی عوام کی ماننی پڑے گی کہ یہ وقت ضائع کرنے میں بڑے ماہر ہیں وقت سے کچھ بھی نہیں سیکھتے پاکستان کو آزاد ہوئے ستر سال گزر گئے اور ان کی عمریں بھی اب ہو چکیں ہیں کہ دنیا کی ساری رنگینیاں دیکھ لیں لیکن پھر بھی عبرت پکڑنے کی بجائے اسی آگ سے بار بار کھیلتے ہیں جس سے بارہا یہ بری طرح جھلس چکے ہیں ۔اپریل فول تو پاکستانی علماء اور دیگر سماجی اور صحافتی طبقے کو بڑی شکایت ہوتی ہے بڑے بڑے فتوے جاری ہوتے ہیں لیکن یہ لوگ پاکستان فول پر اس قدر کیوں خاموش ہیں ؟؟ کیا اخلاقی اقدار صرف دوسرے مذاہب اور دوسرے ممالک کی حکومتوں کو آڑے ہاتھوں روکنے تک ہی محدود ہیں یا امور خانہ پر بھی اثر انداز ہوتے ہیں ؟؟کیا ہمیں وقت سے عبرت حاصل کر کے پاکستان کی عزت و سالمیت کو خطرے میں ڈالنے والے جھوٹوں لوگوں سے چھٹکارا نہیں پانا چاہئے ؟؟ وقت قریب ہے اور عوام اس پاکستان فول سے بیدار ہو کر کچھ حقیقی زندگی گزارنے کی کوشش کرے ۔