زمانہ بدل گیا ہے۔ وقت کی روانی نے ہمارے دریا، ماحول آب وہوا ہر شے کو گہنا دیا ہے ۔کسی بھی قومی شاہراہ پر عازم سفر ہوں تو دل یہ سوچنے پر مجبورکرتا ہے کہ ترقی کے گھومتے پہیے کی رفتار کا تعاقب کرتے ہوئے ہم مٹی کے مادھوؤں نے کیا کھویا اور کیا پایا ۔حساب کے معاملے میں ہم شروع سے ہی بڑے کچے ہیں۔ چند سڑکیں بنانے کے علاوہ ہم نے کیا ہی کیا ہے۔ ان تارکول کی بنی کالی ناگنوں نے چند گھنٹوں کی سفری بچت کے سوا دیا ہی کیا ہے۔ بارہ گھنٹوں کا سفر دس گھنٹوں میں طے کرلینا ہی ہماری ترقی ہے۔ بڈھے راوی کے بڑھاپے تک بات رہتی تو قصور قدرت کا تصور ہوتا لیکن گدلے راوی کے اوپر غول در غول اڑتے اور آلودگی کے ڈھیروں میں سے خوراک تلاش کرتے گدھ اور چیلیں کچھ الگ ہی داستان بیان کر رہے ہیں۔ میٹرو کی خوبصورتی کے قصہ گر اور تعریف میں جھومتے پجاری چند منٹ کے لئے جاکر ذرا راوی کے پل پر کھڑے ہوکر سوچیں کہ اس برباد راوی کی آبادی ضروری تھی یا پھر پورے لاہور کی سڑکوں کے اوپر اپنی خواہشات کا لینٹر ڈالنا ضروری تھا۔ لاہور میں بھلے ہی آپ کسی طرف سے داخل ہونے کی کوشش کریں وقت کی دیوی آپ کے سامنے بین کرتی بال کھولے آن موجود ہوتی ہے۔ چیخ چیخ کر آپ کی توجہ فیکٹریوں کے زہریلے دھوئیں کوڑے کرکٹ کے ڈھیروں اور آلودہ پانی کے زہریلے جوہڑوں کی طرف دلانے کی ناکام سی کوشش کرتی ہے ۔ہم بے حس آگے نکلنے کی دوڑ میں ماضی کو کوسوں پیچھے چھوڑ کر آئے ہوئے انسان آلودہ مناظر کو کسی اور سیارے کا کریہہ بصری بوجھ قرار دے کر ایکسیلیٹر پر دباؤ بڑھاتے ہوئے اپنے پھیلائے ہوئے گند سے دور بھاگنے کوشش کرتے ہوئے شہر کی پناہ میں داخل ہوجاتے ہیں۔ آ ج سے کوئی پندرہ برس قبل جب میں لاہوری بننے کے لئے انجینئرنگ کی ڈگری چرانے اس شہر کی دہلیز پر پہنچا تھا تب حالات قابل قبول تھے۔ دیواروں پر صرف اشتہاری آلودگی کے نشانات نظر آتے تھے وہ بھی مختلف کمزوریوں کو دور کرنے اور بگڑے حالات کو سدھارنے کے دعویدار حکیموں اور سنیاسی بابو کے آستانو ں کا پتہ دینے کے لئے لکھے جاتے تھے یا پھر شائد ہم جیسے چھوٹے شہروں سے آنے والے پینڈؤں کے جذبہ شوق کو مہمیز لگانے کے لئے لکھے جاتے تھے۔ میں اور میرے یار اکثر ویک اینڈ پر لاہور ایکسپلور کرنے نکل جایا کرتے تھے۔ اسی آوارہ گردی کے دوران راوی اور کامران بارہ دری دیکھنے کی خواہش جاگی ۔یقین جانئے آج تک راوی کے پانی کی بدبو اور سڑاند ٹھیک اسی طرح نتھنوں کے دہانوں پر پھیلی ہے جیسا کہ منشی پریم چند کی تحریروں کو پڑھتے ہوئے گوبر کی بو نتھنوں میں گھسنے لگتی ہے ۔کشتی ایک سیاہی مائل پانی کی دلدل میں چلتی ہوئی بارہ دری تک جا پہنچی ملاح چپو کیا مارتا یوں لگتا جیسے کسی نے درجنوں گٹروں کے ڈھکن کھول دیے ہوں۔ ہم یاجوج ماجوج کی طرح اپنے ارد گرد کی قدرتی خوبصورتی کو وقت کے ساتھ اجاڑتے چلے جارہے ہیں۔ ہماری رفتار بڑی توبہ شکن ہے اور ہم اس پر اترا رہے ہیں۔ وقت دور نہیں جب ہم خود کو کوسیں گے ۔کون سی آلودگی کی قسم ہے جو ہم پھیلانے میں مگن نہیں ہیں۔ صحت اور ماحول ہماری ترجیحاتی فہرست میں کہیں جگہ حاصل کرپارہے۔ ہمارے ہمسائے ترقی کی دوڑ سے ہٹ کر ماحولیات اور آلودگی کے بارے میں بھی سوچ رہے ہیں۔ ہم ابھی ان سے ٹیکنالوجی جھپٹنے کی فکر میں نڈھال ہیں ۔وہ بھی بڑے استا د ہیں ابھی ترقی کے لالچ میں الجھا کر آلودگی کے غار میں دھکیلیں گے پھر چند سالوں بعد مسیحا بن کر پوچھیں گے کہ صاف ہوا میں سانس لینا چاہتے ہو تو آؤ پھر سے ہمارے تلوے چاٹو۔ بڑے شہروں میں آلودگی اس قدر عام ہوچکی ہے کہ لوگ دھڑا دھڑ سانس کی بیماریوں کا شکار ہوتے چلے جارہے ہیں۔ ایک طرف ہم درخت لگانا بھول چکے ہیں دوسری طرف ہماری میٹروز رہے سہے سڑکوں کے کنارے اگے درختوں کی بیلٹوں کو اجاڑتی چلی جارہی ہیں۔ سونے پہ سہاگہ یہ کہ ہمارے پاس اپنی صحت کے بارے میں سوچنے کا وقت ہی نہیں ۔اعداد شمار کا کھیل چند جھلکیوں کی صورت میں پیش خدمت ہے چائنہ نے انوائرمنٹل لا میں تبدیلی و ترامیم کا فیصلہ کرلیا ہے اور آلودگی پھیلانے والوں پر سخت سے سخت پنلٹی لگانے کا عندیہ دیاہے ۔نئے قانون میں 70آرٹیکل ہیں جب کہ پرانے لا ء میں 47تھے۔ قانون توڑنے والی کمپنیوں کو فضائی آلودگی پھیلانے کے جرم میں بھاری جرمانوں کا سامنا کرنا پڑ رہا ہے۔ جبکہ متعلقہ ذمہ دار افراد کی سزا کم سے کم پندرہ دن جیل کی ہوا کھانا مقر رہے ۔اس سے پہلے ماحولیاتی آلودگی پھیلانے کے جرم میں جرمانے اتنی کم مالیت کے تھے کہ لوگوں کو جرمانہ بھرنا آسان محسوس ہوتا تھا۔ ان تمام اقدامات کو ان کے صدر موصوف نے “وار آن پولوشن” کے نام سے ایڈریس کیا تھا ایک رپورٹ کے مطابق چائنہ کی 20 فیصد زمین آلودگی کی وجہ سے تباہ ہوچکی ہے۔ 60 فیصد زیر زمین پانی آلودہ ہوچکا ہے یہ تو تھا چائنہ کا حال۔ ذرا لگے ہاتھوں سپر پاور کی بے چارگی کا حال بھی سن لیجئے ۔ امریکہ کی آدھی آبادی مضر صحت آلودہ ہوا میں سانس لینے پر مجبور ہے 148ملین امریکی شہری ایسے علاقوں میں رہتے ہیں جہاں کی آب و ہوا سانس لینے کے لئے مضر ہے۔ یہ ہے ان ممالک کا حال جہاں ہیلتھ سیفٹی انوائرمنٹ مضمون کے طور پر نہ صرف پڑھایا جاتا ہے بلکہ ہر انڈسٹری میں اسے اپلائی بھی کرایا جاتا ہے ۔ہم جاہلوں کا انجام کس قدر بھیانک ہوگا یہ ہم سوچ ہی نہیں سکتے۔ کیا موج ہے ای پی اے نام کا ایک ادارہ قائم ہے جس کا کام ماحول کو آلودگی سے پاک رکھنے کے لئے چیک اینڈ بیلنس قائم رکھنا ہے۔ اول تو عوام کو اس ادارے کا علم ہی نہیں شائد اس ادارے کو خود بھی اپنے وجود کا علم ہے کہ نہیں یہ بھی پتا لگانے کی ضرورت ہے۔ اگر اس ادارے کو اپنے وجود کا علم ہے تو پھر اپنے فرائض جاننے کے لئے متعلقہ منسٹری سے رابطہ مستقل بنیادوں پر استوار کرنا چاہیے ۔اگر سب کچھ اوکے ہے تو پھر مطلب سسٹم آٹو پر لگا ہواہے۔ آلودگی پھیلانے والے اور کنٹرول کرنے والے دونوں ہی طوائف اور تماش بین کا روپ دھارے ہوئے ہیں۔ اس کمینے کھیل کو دیکھ کر عوام کی سانسیں بھلے ہی اکھڑتی رہیں کسے پرواہ ہے ۔جیبوں کا بھرنا زیادہ ضروری ہے۔ کس نے کہہ دیا کہ ہوا بھی آلودہ ہوسکتی ہے۔ ہواکے آلودہ ہوجانے کاڈر پالنا ،ماحولیات کا خیال رکھنا ،جانوروں کے حقوق یہ امیر ملکوں کے چونچلے ہیں ۔جہاں دو وقت کی روٹی آلودہ پانی سے اگنے والی گندم سے پکائی جاتی ہو اور اس روٹی کے لئے بھی خود کشیاں ہو رہی ہوں وہاں صحت سے متعلق فضول پراجیکٹس پر پیسا جھونکنا بھلا کہاں کی دانش ہے۔ ابھی ترقی کو لونڈی بنا لینے کا بھوت سر چڑھ کر بول رہا ہے۔ ایک دفعہ یہ نگوڑی قابو میں آجائے پھر فارغ وقت میں سانس اور تازہ ہوا کے کھیل کا بھی جائزہ لینگے۔ رہا بڈھا راوی تو اس کا بھی ہمارے نام ایک پیغام ہے” جب تمام درخت کاٹ چکوگے۔ جب تمام جانوروں کو ہلاک کردوگے۔ جب تمام دریاؤں کو آلودہ کر لوگے۔ جب تمام ہوا سانس لینے کے لئے ناکارہ بنا دو گے تب یہ دریا فت کر پاؤ گے کہ
You can not eat money
