یہ دوسرا موقع تھا جب مجھے زندگی کی قدروقیمت کا بھرپور احساس ہوا۔ کم ہی ایسے مواقع ہماری زندگیوں کے افق پر ابھرتے ہیں جب ہم جیسے جلد باز قوم کے سطحی افراد زندگی جیسی نعمت کا ادراک کر پاتے ہیں ۔مصیبتیں اتنی بڑھ چکی ہیں کہ زندگی خود ہم سے رخصتی طلب کرتی نظر آتی ہے اور ہم بھی اسے جسم کے پنجرے میں مزید قید رکھنے سے بیزار ہوتے جارہے ہیں ۔ خیر ڈرائیور نے بریک لگائی میرے ساتھیوں نے شور و غل برپا کیا تو میری آنکھیں بھی کھل گئیں۔ہم جس ہائی وے پر عازم سفر تھے موسم سہانا تھا دوپہر بارہ بجے کا وقت ہوگا آنکھ کھلنے کے بعد میں نے بائیں جانب گاڑی کے شیشے سے باہر نظر ڈالی تو ایک عورت کو بیچ سڑک جھٹکے کھاتے دیکھا ۔سر اور منہ سے خون جاری تھا اور عورت بڑی تکلیف سے تڑپ رہی تھی ۔کچھ فاصلے پر ایک چاند گاڑی رکی ہوئی تھی میرا دوست اترا اس نے عورت کو اٹھایا اسکے منہ میں پانی کے چند گھونٹ ڈالے عور ت نے جھٹکے کھانا بند کئے نیم بے ہوشی کی حالت میں ادھر ادھر بے حس عوام کو تکنے لگی۔ میں نے بھی حواس باختہ ہو کر 1122کاڈائریکٹ نمبر ڈائل کر دیا۔ مجھے نہیں معلوم تھا کہ بنا کوڈ کے بھی یہ نمبر ڈائریکٹ مل جاتاہے ۔خلاف توقع کال مل گئی میں نے لوگوں سے پوچھ کر جائے حادثہ کی لوکیشن بتائی۔ کال ڈس کنیکٹ ہوگئی عورت کے سر سے بلیڈنگ جاری تھی لیکن وہ قدرے ہوش و حواس میں تھی ہم صورتحال کو تسلی بخش پاکر روانہ ہوئے۔ ابھی ایک کلومیٹر بھی طے نہ کر پائے تھے کہ 1122کی وین کو جائے حادثہ کی طرف جاتے دیکھ کر جہاں اطمینان ہوا کہ اس نفسا نفسی سے بھرپور ملک میں ایسے لوگ ہیں جو آج بھی انسانی جان بچانے کے لئے نہ صرف سیریس ہیں بلکہ دن رات مستعد بھی ہیں۔ ان لوگوں کے لئے دل سے جہاں دعا نکلی وہیں محترم پرویز الہی کا ذکر نہ کرنا اور ان کیلئے دل سے دعا نہ کرنا بھی حد درجہ کی زیادتی اور نا انصافی ہوگی ۔اس ملک کے اندھیرے آسمان پر 1122پرویزالہی کا ٹانکا ہوا وہ ستارہ ہے جو نہ صرف جگ مگا رہا ہے بلکہ ان کے وژن کا بھی منہ بولتا ثبوت ہے۔ حکومت کو ان کے اس ستارے کی چمک سے کافی تکلیف بھی ہے۔ دعا تو حکومت پنجاب کے سرپرست اعلی کے لئے بھی بنتی ہے کہ جنہوں نے میٹرو نامہ تحریر کرنے کے علاوہ اپنے رقیبوں کے چلائے ہوئے پروجیکٹس کے لئے بھی اونٹ کے منہ میں زیرے جتنی ہی سہی رقم تو بحرحال مختص کر رکھی ہے۔ سروس کا معیار بھلے ہی گرتا جا رہا ہے جس کا واضح ثبوت ریسکیو وینز کی میک اور کوالٹی کو دیکھ کر ہی لگایا جاسکتاہے ۔ میرے ایک دوست میری اس ریسکیو سروس سے محبت کو شک کی نظر سے دیکھتے ہیں۔ اکثر تو اس کی مخالفت میں کمر بستہ ہوجاتے ہیں ایک دن آخر تنگ آکر میں نے اس سروس کے دفاع کے لئے اپنے دلائل کے ترکش میں سے سب سے نازک مگر کارآمد تیر کا استعمال کر ہی دیا ۔ میں نے ان صاحب سے عرض کی کہ خدا دشمن کو بھی برے وقت سے بچائے لیکن فرض کیجئے ہزار بار میرے منہ میں خاک لیکن زندگی حادثات اور آزمائشوں کا گھر ہے اگر کبھی آپ کسی حادثے کا شکار ہو جائیں اور اسی طرح زندگی اور موت کی شاہراہ پر سانسوں کی گنتی کے عمل سے گزر رہے ہوں ۔ہر گزرتی سانس کے ساتھ 1122کے سائرن کی آواز بلند سے بلند تر ہوتی جارہی ہو تو آپ کو زندگی کی طرف لے جانے والی یہ سروس کیسی محسوس ہوگی ۔ آپ کی جگہ آپ کا بیٹا بیوی بھائی کوئی بھی عزیز ہوسکتا ہے۔ اس وقت دل پر ہاتھ رکھ کر بتائیں کیا 1122ڈائل کرنا آپ کی پہلی اور آخری امید نہیں ہوگی ۔کیا آپ پرویز الہی کے وژن کی داد اور ان کو دعا دیئے بغیر رہ سکیں گے ۔کسی نے اپنے وژن کے مطابق ایلیٹ فورس بنائی لیکن وہ جس دن اور جس وقت کے لئے بنائی گئی کام نہ آسکی ۔کسی نے ریسکیو سروس بنائی اور اس سروس نے نہ جانے کتنی جانیں بچالیں۔ بچائے جانے والے افراد نے عملے اور سروس کے لانچر کو نجانے کب تک دعائیں دی ہونگی یاد ے رہے ہوں گے۔ بات ترجیحات کی ہے بات وژن کی ہے آئی ٹی سٹی کا قیام بھلے ہم جس اینگل سے جائزہ لیں لیپ ٹاپ بٹوارہ اسکیم سے لاکھ درجے بہتر تھا یونیورسٹیز میں سولہ سال پہلے بھی اتنی سہولتیں تھیں کہ طلبا اپنے کمپیوٹر کے متعلق کام باآسانی labs اور یونیورسٹی نیٹ کیفے میں کر لیا کرتے تھے ہاں کمروں میں فلمیں دیکھنے کی سہولت سے بے زار تھے۔ اس علم دوست ایکٹویٹی کو لیپ ٹاپس کے ذریعے بخوبی پورا کردیا گیا ہے کہ جہاں بیٹھو بھلے بس ہو یا گارڈن من پسند فلم کا مزہ اٹھاؤ۔ ترقیاتی کا م کریں ضرور کریں دل لگا کر جی جان سے کریں ۔ ایک گناہ نہ کریں کہ کوئی بے چارہ بھوک سے مر رہا ہو اور آپ اس کو برگر آفر کرتے رہیںیا اس کے سر کے نیچے پراٹھے ڈھونڈنے کی مشقیں کرتے رہیں ۔ یہ قوم آج بھی اندھیروں میں اپنا مستقبل ٹٹول رہی ہے ۔ گرمی میں ترقی کی کھجلی کررہی ہے سٹریٹ پرسنز نشے کا شکار افراد مزدور ہر روز سینکڑوں کی تعداد میں گرمی سے مر رہے ہیں لیکن حکومتیں میٹرو ریس میں مگن ہیں ایک نے بنالی دوسرے نے بھی اسکیم تیار کرلی تیسرے نے بنی بنائی سڑکوں کو پھر سے اکھیڑ ڈالا۔ خدارا اپنے مغلیائی ٹھرک کو پورا کرنے کے لئے ایسا نہ کریں ۔ غریب عوام اور خزانہ ہمیں اپنے مغل آباؤاجداد کے نقش قدم پر چل کر ہاتھیوں کو شاہی قلعے کے شاہی بیڈ رومز تک لے جانے کی اجازت دینے کا متحمل نہیں ہو پا رہا ۔جن سڑکوں کو دفن کرکے اوپر میٹرو کا تاج محل بنایا جا رہا ہے ابھی ماضی قریب میں ہار چوروں نے بڑی محنت اور اعلی ذہنی صلاحیتیں لگا کر ان کو بنایا تھا ۔ ابھی تو ان کی افتتاحی تختیاں بھی نہیں ٹوٹیں کہ پھر سے ان کو ادھیڑ ڈالا گیا ۔ یہ وہ سڑکیں ہیں کہ ٹھیکیداروں اور سرکاری افسروں میں یہ بات مشہور ہے کہ جس نے چند کلومیٹر سڑک بنانے کا ٹینڈر حاصل کرلیا اس کے وارے نیارے ہوگئے پھر اسے پیچھے مڑ کر دیکھنے کی ضرورت نہیں پھر اسے کوئی ملک ریاض بننے سے نہیں روک سکتا ۔اب اس میٹرو کی تعمیر سے نجانے مزید اور کتنے بزنس ٹائیکون اور چوٹی کے کنٹریکٹرز برآمد ہونگے یہ خدا ہی بہتر جانے ۔ بھار ت کو تو ہم نے ملک دشمنی کے لئے ویسے ہی نمائشی اور علامتی طور پر رکھا ہواہے اس کام کیلئے تو خود کفیل ہیں ۔ ہماری حکومتیں اور ان کے چلائے گئے میگا پراجیکٹس ہی اس کام کے لئے سوفیشنٹ ہیں ۔
رہے جیالے تواوٹووان بسمارک نے کیا خوب کہا تھا ” میں جب دام بچھا دیتا ہوں تو اکیلے ہرن کو نشانہ نہیں بناتا بلکہ انتظار کرتا ہوں جب پورا ریوڑ دام میں پھنس جاتا ہے تو پھر نشانہ باندھتاہوں “۔ جیالوں کا پوراریوڑ پھنس چکا ہے یا خالی ہرن کا نشانہ لگے گا ۔ یہ سر دست ہم کچھ نہیں کہہ سکتے ۔ اتنا ضرور کہہ سکتے ہیں کہ یہ سارا ریوڑ خود اپنے بچھائے ہوئے جال میں پھنستا جارہا ہے الزام دوسروں پر لگا رہے ہیں کہ ان کو پھنسایااور دیوار کے ساتھ لگایا جارہا ہے ۔ تھوک کر چاٹ لینا ویسے بھی ہمارے سیاستدانوں کا من پسند کھیل رہا ہے بڑھک مارنے کے بعد تھپڑ سے بچنے کے لئے پاؤں پکڑ لینا ان کی پرانی عادت رہی ہے۔
