طنز گھڑنے میں ہم ہر طرح سے طاق ہو چکے ہیں ذرا ملاحظہ فرمائیں موجودہ ملکی صورتحال لوٹ مار غدر کو پیش نظر رکھ کر اسے پڑھیں تو آپ کوہنسی بھی آئے گی اور طنز کی کاٹ بھی محسوس ہو گی۔ علامہ اقبال کو اگر پتا ہوتا کہ نواز شریف پاکستان کا وزیراعظم اور آصف زرداری صدر بنے گا تو جس رات وہ پاکستان کا خواب دیکھ رہے تھے اس رات وہ کوئی فلم دیکھ لیتے۔ اس طرح کا ادب آج کل مارکیٹ میں بڑی تیزی سے نہ صرف پروان چڑھ رہا ہے بلکہ بڑی شہرت بھی حاصل کر رہا ہے۔ اس طنز کا اگر ذرا بغور جائزہ لیں تو یہ آپ کو ہمارے زوال کی سب سے تلخ حقیقت محسوس ہو گا ۔ ایک مرتبہ ایک صاحب مجھ سے اس بات پر الجھ پڑے کہ سیاسی ورکرز ،سیاستدانوں کا پڑھے لکھے ہونے سے زیادہ ضروری ہے کہ عوام کے ساتھ تعلق مظبوط ہو ۔ میں باجود کوشش کے ہنسی نہ روک سکا۔ کیا ان کے عوام سے تعلق ،کیا ان کے بے چاری عوام سے رابطے ۔ ان صاحب کو میں نے فورا رابطہ کا مشورہ دیا کہ اپنے حلقے کے ایم این اے یا ایم پی اے صاحب سے ملنے کا ٹائم لیں تو سب صورتحال واضح ہوجائے گی ۔ سیاستدان کا کام گلیاں بنوانا ٹائیلیں لگوانا ہر نئی تعمیر شدہ سڑک کی افتتاحی پھٹی کا پردہ کھینچنا علاقے کی ہر شادی میں شرکت کا کارڈ حاصل کرنا تو ہمارے ہونہار سیاستدانوں نے خود ڈیفائن کیا ہوا ہے ان کا کام تو آئین سازی ہے۔ آئین سازی کرنے کے لئے آئین قانون دستور اردگرد کی دنیا کا نالج ہونا ضروری ہے بات کہاں سے کہاں نکل گئی۔ بات مٹی سے شروع ہوئی تھی ہم میں سے کتنے ہیں جن کو یقین ہے کہ ہم نے واپس مٹی میں جانا ہے ۔ ہم مٹی سے بنے ہوئے ہیں یہ سب فساد کیوں ہے ۔ کیوں ہر طرف آہ و بکاہ مچی ہے ۔ دھرنے پہ دھرنا دیا جا رہا ہے ایک وہ مٹی کے انسان تھے جن کو خلیفہ بنایا گیا تو ممبر پر چڑھ کر انکار کردیا یہ کہہ کر یہ بہت بڑی ذمہ داری ہے میرے ناتواں کندھے یہ بار نہیں اٹھا سکتے پھر عوام نے ڈھارس بندھائی تو راضی ہوگئے ۔ گھر لوٹے تو بیٹے نے کہا کہ عوام کی امانتیں تو لوٹا دیں بولے کہ آج تھکا ہوا ہوں کل نبٹا لونگا۔ صاحبزادے نے عرض کی کہ کسے معلوم کہ کل کی صبح کون دیکھے ۔ فورا اٹھ کھڑے ہوئے۔ خیمہ پر سے دربان ہٹا دیئے شاہی پروٹوکول جو پرانے خلفاء نے رائج کیا ہوا تھا سب ترک کردیا جب انسان کو دل سے یقین ہو کہ مٹی نے آخرمٹی میں ہی مل کر مٹی ہو جانا ہے تو انسان سرکاری دیئے کو بھی جلا کر ذاتی کام انجام دینا کرائم سمجھتا ہے ۔ سرکاری کاغذ ذاتی استعمال میں لائے تو اس کی پے منٹ خود پر فرض سمجھتا ہے۔ ان سب باتوں کا خیال رکھنے والے عمر ثانی تھے ۔ زمانہ بدل گیا لیکن جب طرز حکمرانی کی بات ہوتی ہے تو لوگ جھٹ سے حضرت عمرؓ اور حضرت عمر بن عبدالعزیز کا ریفرنس کوٹ کرتے ہیں ۔ چلئے ایک اور مٹی کے آدم کا قصہ سن لیں ۔ اہل حمض کا ایک وفد فاروق اعظمؓ کے دور میں مدینہ آیا ہوا تھا۔ آپؓ نے شہر حمص کے حاجت مند افراد کی فہرست بنانے کا آرڈر دیا تاکہ ان کی مدد کی جاسکے۔ جب حاجت مند افراد کی فہرست حضرت عمر فاروقؓ کے سامنے پیش کی گئی تو آپ نے عمیق نگاہوں سے اس کا جائزہ لیا ۔ نظر ایک نام پر جا کر ٹھہر گئی پوچھا یہ سعید بن عامر کون ہے جواب ملا ہمار ا گورنر ۔ فرمایا کیاتمھارا گورنر فقیر ہے ۔ رعایا نے عرض کی ہاں اللہ گواہ ہے کہ کئی کئی دن گزر جاتے ہیں اور ان کے گھر آگ نہیں جلتی۔ عمر فاروقؓ بے اختیار رو پڑے روتے روتے داڑھی مبارک آنسوؤں سے تر ہوگئی ۔وفد کو بیت المال سے ایک ہزار دینار دیئے کہ اپنے گورنر کو میرا سلام پہنچا کر کہنا کہ امیرالمومنینؓ نے آپؓ کی ضروریات کے خیال سے یہ ہدیہ ارسال کیا ہے۔ وفد حمص پہنچا گورنر سے ملا عمر فاروقؓ کا پیغام اور امانت پیش کی ۔ حضرت سعیدؓ نے گھر جا کر بیوی سے کہا گھر میں فتنہ داخل ہوگیا ہے۔ بیوی نے کہا فتنہ سے نجات ضروری ہے چناچہ تمام دینار آپ نے سائلین اور غربا ء میں تقسیم کردیئے۔دل میں آخرت کا خوف اور اپنے آدم گل ہونے کا یقین ہو تو ہر سال سیلاب میں نہتے عوام کا لانگ شوز پہن کر جائزہ لینا کافی مشکل ہو جائے۔ مگر یہاں تو جعلی کیمپ لگائے جاتے ہیں بادشاہ سلامت کی رخصتی کے بعد فورا ہی کیمپ بھی اکھڑ جاتے ہیں ۔چھوٹے بادشاہ سلامت نے کیمپ نصب کرنے والوں سے یہ شکائت کی ہے میرے جانے کے فورا بعد ٹینٹ اور کیمپ وائنڈاپ نہ کر لیا کریں ذرا چند گھنٹے گذر لینے دیا کریں ۔ چلیں چند گھنٹے عوام کی آنکھوں کو کیمپ دیکھنے کی ٹھنڈک تو نصیب ہو ۔ کیمپوں کے اندر کوئی چیز ہوتی بھی ہے یا نہیں یہ اندر کی کہانی ہے ۔ظلم اتنا ہے اس ملک میں یہ آپکی سوچ سے بھی زیادہ ہے۔ سیلاب کی آمد کے ساتھ ہی اکثر لوگوں کی لاٹریاں نکل آتی ہیں ۔ نیا بجٹ نئے بل نئے کام نئی سڑکیں موج ہی موج کوئی جان سے گیا اور کسی کی عید ہوگئی۔کوئی ان سیلابوں سے بچنے کے لئے کنکریٹ اسٹیپ لینے کی نہیں سو چ رہا۔ ڈنگ ٹپاؤ پروگرام پر ہر کسی کی توجہ ہے اپنے اباؤ اجداد کے ہم خالی نام لیوا ہیں کیوں کہ اگر یقین ہو کہ جان اوپر والے کی امانت ہے اور یہ لوٹانی ہے تو بڑے بڑے محلوں والے گاڑیوں کے جھرمٹ میں گھومنے والے بھی دن رات آزردہ ہوں ۔ کوئی وزیراعظم بننے کو تیار نہ ہوتیسری دفعہ تو کجا لوگ اس ذمہ داری کا احساس سوچ کر ہی متفکر ہوجائیںیہ عوامی خدمت نہیں اقتدار کا ٹھرک ہے جو بار بار ایک ہی شخص کو وزیراعظم بننے پر اکساتا رہتا ہے ۔ عوامی خدمت کو عوام دشمنی سمجھ کر حکمرانوں نے شو آف پالیسز شروع کر رکھی ہیں کوئی کتنا ہی جی لے کتنی ہی دفعہ وزیراعظم بن جائے کتنا ہی اس زمین پر اکڑ اکڑ کر چل لے کتنا ہی عوام کو حقیر کیڑے مکوڑے سمجھ لے وہ ایک حقیقت نہیں بدل سکتا۔ وہ تلخ حقیقت موت اور حیات کا خاتمہ ہے ۔ انسان کے بعد اس کے کارنامے ہی اسے زندہ رکھتے ہیں۔ کتنے سیاستدان ہیں جن کو یہ احساس ہے کہ انہیں عوام کی خدمت کے لئے چنا گیا ۔ سیاست ایک کاروبار بن چکا ہے ۔ انویسٹ کرو اور جیت کر دگنی فصل کاٹو۔ کم از کم دگنی زیادہ کی کوئی حد ہی نہیں ۔ سائیں مر گئے آں کی صدا ئیں ہر طرف بلند ہور ہی ہیں۔یہ صدا ئیں بتا رہی ہیں کہ ہمارے حکمران خود کو مٹی کے انسان کی بجائے فرعون سمجھ بیٹھے ہیں ۔ پندرہ سو افراد گرمی سے سڑکوں پر ایڑھیاں رگڑ رگڑ کر مر گئے وزیراعظم موصوف ان کی روحوں کے ایصال ثواب کے لئے خانہ خدا جا پہنچے ۔معصومیت کی انتہا ہے ایسی سفاک معصومیت کے بعد ہی لوگ سلفیوں پر کمنٹ لکھتے ہیں کہ ذرا “نور”ملاحظہ فرمائیں ۔ ہم جتنا چاہے اڑلیں جتنا مرضی اکڑ لیں ہماری حقیقت چاند صاحب نے کیا خوب بیا ن کی ہے۔
نہ کوئی ساتھ تھا میرے، نہ کوئی ساتھ ہے میرے
میں تنہا تھا ،میں تنہا ہوں ،مجھے تنہا ہی رہنے دو
میری یہ ذات بھی مٹی، میری اوقات بھی مٹی
میں مٹی تھا، میں مٹی ہوں، مجھے مٹی ہی میں رہنے دو
زندگی اور موت اللہ کے ہاتھ میں ہے۔ بے مقصد زندگی سے کیا بہتر نہیں کہ انسان پیدا ہوتے ہی مرجائے ۔کبھی کبھی یہ سوچ دماغ میں آجاتی ہے کہ وہ لوگ شائد خوش نصیب ہیں جن کی قومی حس مردہ ہوتی ہے ۔جن کا کوئی کردار نہیں ہوتا۔ بڑے مزے سے جئے اور آئی پر مر جاتے ہیں ۔
