چترال سے تعلق رکھنے والی ایک بہن اور بیٹی کے بارے کچھ پڑھنے کو ملا لکھنے والے نے یوں لکھا تھا کہ وہ انسانیت کی خدمت کو عبادت سمجھ کر کرتی ہیں ۔وہ غالباً چترال کی واحد وکیل خاتون ہیں جو غریب اور نادار لوگوں با لخصوص خواتین کو مفت انصاف فراہم کرنے میں مصروف عمل ہیں ۔ماشا اللہ سے اس کے ایک بھائی بھی وکیل ہیں جبکہ ان کے والد ایجوکیشن اآفیسر کے عہدے سے سبکدوش ہیں ۔چترال کی یہ بیٹی غریب اور نادار لوگوں کیلئے مفت قانونی جنگ لڑتی ہیں ۔شائد یہ تحریر آپ بھی پڑھ چکے ہوں یا آپ کی نظر سے ضرور گزری ہوگی۔میں چترال کی اس عظیم بیٹی کو خراج تحسین پیش کرتا ہوں کہ وہ ایک عظیم کام کو سر انجام دے رہی ہیں ۔یہاں تمہید باندھنے کا مقصد یہ ہے کہ اب بھی اس دنیا میں ایسے لوگ موجود ہیں جو دوسروں کے لئے جیتے ہیں ۔وہ اپنا یہ کام کیسے سر انجام دیتی ہیں اس کی تفصیل آپ کو اس لنک سے حاصل ہو سکتی ہیں
(https://plus.google.com/+SostToday/posts/YXBH1fmLx4Y)
آپ کو اندازہ ہو جائیگا کہ ایسے کام کسی بھی تنہا آدمی کی بس کی بات نہیں ہوتی ہے اس کو انجام دینے کے لئے باقائدہ ایک منصوبہ بندی کی ضرورت ہوتی ہے۔اسے اتفاق کہئیں کہ اسی شام گلگت میں موجود الخدمت فونڈیشن کے دفتر میں ایسی ہی تقریب میں شامل تھا اور میرے ذہن کے دریچوں میں چترال سے تعلق رکھنے والی وہ بہن بھی گردش کر رہی تھی ۔وجہ اس کی یہی تھی کہ یہاں بھی دکھی انسانیت کی خدمت کا درد موجود تھا ۔اور اسی کے ساتھ ہی الخدمت فونڈیشن کی خدمات بھی ذہن کی بالکونیوں میں نظر آنے لگیں۔ زلزلہ طوفان، سیلاب، اور دیگر قدرتی آفات کے موقعوں پر یا گلگت بلتستان میں کسی بھی ناگہانی صورت حال میں الخدمت کے رضاکار پیش پیش دکھائی دیتے ہیں اور یہ خدمات بغیر کسی رنگ و نسل کے (خدمت سب کے لئے) کے جذبے سے سر شار دکھی انسانیت کے تکالیف اور مشکلات کے حل کے لئے سرگرم عمل ہے۔بریفنگ کے دوران یہ جان کر اور بھی خوشی حاصل ہوئی کہ تعلیمی میدان میں ان کا ایک جامعہ پروگرام ہے ۔اور ان بچوں کی تعلیم و تربیت کا انتظام جو ان کے والد کے دنیا سے پردہ فرمانے کے بعد منقطع ہویا کوئی بھی یتیم پرئمری سے ثانوی اور پھر ہائیر سکینڈری ایجوکیشن کے حصول میں مشکلات سے دوچار ہیں ان کی کفالت کا ذریعہ ہے۔ اس پروگرام کو الخدمت فونڈیشن نے شائنگ سٹار کفالت سکیم کا نام دیا ہے ۔ گلگت بلتستان کے حوالے سے لگ بھگ سو بچے اس وقت الخدمت فونڈیشن کی اس سکیم سے فائدہ اٹھا رہے ہیں ۔اچھے کاموں کی حوصلہ افزائی اور ان کی تعریف سے ایک فائدہ یہ ہوتا ہے کہ معاشرے میں اچھائیاں جنم لیتی ہیں الخدمت فونڈیشن گلگت بلتستان کی ان خدمات کی تعریف نہ کرنا نہ صرف زیادتی ہوگی بلکہ ایک قسم کی خیانت بھی تصور ہوگی ۔آنے والے سال کے لئے بھی الخدمت فونڈیشن نے اپنے اس نیک کام کو جاری رکھتے ہوئے مزید سو یتیم بچوں کی ایک فہرست مرتب کی ہے جس میں تمام مکاتب فکر سے تعلق رکھنے والے بے سہارا اور یتیم بچے اور بچیاں شامل ہیں ۔جیسے پہلے ذکر ہوا ہے کہ انفرادی طور پر یا کسی بھی ادارے کے لئے یہ ممکن نہیں کہ بغیر کسی تعاون کے ایسے فلاحی کام جاری رکھ سکیں ایسے اداروں کی سرپرستی صاحب ثروت اور مالدار جنہیں اللہ تعالیٰ نے بہت کچھ نعمتوں سے نواز رکھا ہے وہی اس کار خیر کو اآگے بھڑانے کا موجب بنتے ہیں ۔اور اسی سے ہی اللہ ان کی دنیا اورآخرت سنوارنے کا ساماں پیدا کرتا ہے۔مستقبل میں الخدمت فونڈیشن کے اس خود کفالت تعلیمی سکیم کے لئے ایسے ہی اللہ والے لوگوں نے کچھ یتیموں کی تعلیمی کفالت کا ذمہ اٹھایا ہوا ہے اور اب بھی بہت سارے یتیم بچے اپنی تعلیمی ضروریات کے لئے اللہ تعالیٰ کی طرف سے بھیجے ہوئے ایسے ہی فرشتوں کے انتظار میں ہیں ۔۔کیا اس نیک کام میں آپ ہی انسان کے روپ میں وہ فرشتہ ثابت نہیں ہو سکتے۔ آگے بڑھیں اللہ کی دی ہوئی نعمتوں میں سے دکھی انسانیت کی سوکھی ہوئی کھیتی کو سیراب کرنے میں اپنے حصے کا پانی ضرور لگائیں۔اگر کسی بھائی نے اس بارے تفصیل جاننی ہے یا کسی یتیم کی کفالت کرنے کا ارادہ کیا ہے تو وہ الخدمت فونڈیشن کے دفتر واقع کونوداس گلگت سے رابطہ کر سکتا ہے۔
