تحریر: یاسین یاس
بڑے بڑے ہالز میں سوٹڈ بوٹڈ لوگ مل بیٹھتے ہیں جن میں مرد و عورت کی تمیز نہیں۔روکھے پھیکے لیکچر جھاڑنے کے بعد بلائے گئے مہمانوں کو چائے بسکٹ پر ٹرخا کر خود ایک دوسرے کی بانہوں میں بانہیں ڈالے کسی فارم ہاؤس میں موج مستی کے لیے چلے جاتے ہیں اور دل کھول کر عورتوں کا عالمی دن مناتے ہیں۔اگلے دن اخباروں کے فرنٹ پیج پر دو دو کالمی خبریں لگتی ہیں فلاں تنظیم نے فلاں جگہ پہ سیمینار کروایا اور انہی خبروں کو دکھا کر لاکھوں کروڑوں روپے بٹورے جاتے ہیں اور انہی پیسوں سے پورا سال حوا کی بیٹیوں کو ہوس کا نشانہ بنایا جاتا ہے خدارا ان چونچلوں سے نکلیں اور عورت کو اس کے وہ حقوق دیجیے جو سرورِ کونین حضرت محمد صلی اللہ علیہ وآلہ وسلم نے آج سے چودہ سو سال پہلے دیے ہیں عورت کی عزت کیجیے کیونکہ وہ ہرحال میں قابلِ احترام ہے وہ بہن ہو، بیٹی ہو، ماں ہو یا بیوی ہو جب آپ اس کو جائز حقوق دیں گے تو آپ کو سال میں ایک دن منانے کی نوبت ہی نہیں آئے گی ہر دن عورت کا ہوگا ہر پل عورت کا ہوگا کیونکہ اس کے دم سے ہی تو یہ رنگینیاں ہیں تو آؤآج سے وعدہ کریں کہ ہم عورت کو اس کا جائز حق دیں گے چاہے وہ وراثت کا ہو یا پسند کی شادی کا اور توبہ کریں کہ آج کے بعد کوئی بھی عورت کو ونی نہیں کرے گا، کلام پاک سے عورت کی شادی نہیں کرے گا، بیٹوں کی طرح بیٹیوں کی بھی پسند پوچھیں گے، وراثت میں جتنا حصہ اللہ تعالی نے مقرر کیا ہے اس کو دیں گے، جہیز جیسی لعنت کے لیے عورت کو قتل نہیں کریں گے، بچوں اور بچیوں کی تعلیم و تربیت میں تفریق نہیں کریں گے یہ وہ باتیں ہیں جو ہمیں ہمارے پیارے نبی صلی اللہ علیہ وآلہ وسلم نے بتائی بھی اور کر کے بھی دکھائیں آپ صلی اللہ علیہ وآلہ وسلم تو حضرت بی بی فاطمہ الزہرہ کے آنے پر اپنی کالی کملی بچھا دیا کرتے تھے.سبحان اللہاگر آپ بھائی ہیں تو بہنوں کو عزت و تحفظ دیجیے اگر آپ باپ ہیں تو بچیوں کو شفقت سے نوازیے اگر آپ خاوند ہیں تو عورت کو پیار دیجیے چھٹی والے دن بیوی کا گھر کے کام کاج میں ہاتھ بٹائیے اس میں کوئی برائی نہیں ہے بلکہ ایسا کرنے سے آپ بیوی کا دل جیت لیں گے حضور اکرم صلی اللہ علیہ وآلہ وسلم بھی ایسا کیا کرتے تھے۔اگر آپ بیٹے ہیں تو ماں کی خدمت کریں ماں باپ کو ایک دفعہ خوش ہوکر دیکھ لینے سے قبول حج کا ثواب ملتا ہے اور جتنی بار دیکھو گے اتنی بار ملے گا کیونکہ مالک کے خزانوں میں کسی چیز کی کمی نہیں ہے جن کو خوش کر دیکھ لینے سے اتنا ثواب ملتا ہے آپ اندازہ کریں کہ ان کی خدمت کرنے پر کتنا اجر ملتا ہوگا دوستو کجھ باتیں کرتے ہوئے میرا لہجہ کڑوا ضرور ہوگیا ہے لیکن کیا کروں سچ کڑوا ہوتا ہے.
