بریکنگ نیوز

بیٹیوں کے کمبل اور ہمارا اخلاقی دیوالیہ۔۔۔۔ ذوالفقار خان

Zulfiqar Khan

Loading

گرمیوں کی چھٹیاں گزار کے اپنی بیٹی کے کندھے پہ ہاتھ رکھے جیسے ہی اپنے کرایے کے مکان کی دہلیز پہ پہنچا ، ساتھ کھڑی بیوی کے بڑبڑانے سے وہ پریشان ہوگیا۔ کون کم بخت دروازے کے تالے میں کچھ ڈال گیاہے، اب یہ کھُلتا ہی نہیں۔ کسی راہگیر کی مدد سے تالہ توڑا اور اللہ اللہ کرکے گھر میں داخل ہوگئے۔ دونوجوان بیٹیاں، دو معصوم بیٹے ، بیوی اور خود نابینا میاں جی۔کمروں کے ٹوٹے تالے دیکھ کے ماں، بیٹیوں کی ہائے نکل گئی۔ گھر کانابینا سربراہ بے چینی کے عالم میں حوصلہ دیتاجاتااور تفصیل پوچھتا جاتا۔ سال بھر کے لیے رکھی گئی گندم غائب، ٹی وی کا کوئی نام و نشان نہیں۔سائیکل، ٹیپ ریکارڈر، بچوں کے کپڑوں سے بھرا بکس سمیت سب کچھ چوری ہوچکا۔بچیوں کی آواز آتی ہے بابا ہمارے کمبل بھی غائب ہیں۔ اب ہم سردیوں میں کیا اوڑھ کے سوئیں گی۔ اُستادجی کا کہنا تھاکہ ظالموں نے میری داڑھی کی تراش خراش کرنے والی قینچی تک نہیں چھوڑی۔
میں نے اُستادجی سے پوچھا کہ آپ نابینا ہیں ، بیٹے آپ کے چھوٹے ہیں، بیٹیوں کے سائیکل چلانے کا رواج نہیں ۔ تو پھر یہ سائیکل آپ نے کس لیے رکھی ہوئی تھی۔ وہ گویا ہوا ۔ ۔ ۔ جناب گندم چکی پہ لے جانا ہوتی تو کسی پڑوسی یا اپنے کسی شاگرد کی منت کرتا ۔ وہ کہتے اُستاد جی ہم گندم لے تو جاتے مگر ہمارے پاس سواری نہیں۔ اس لیے اپنی سائیکل خریدنا پڑی۔
نابینا ہونے کے باوجود اللہ نے اُستاد جی کو ہمت اور صبر و استقامت کی دولت سے مالا مال کر رکھاہے۔اپنے گھر کے پانچ افراد کے ساتھ اپنے مرحوم بھائی کے خاندان کے چھ افراد کی کفالت بھی 2009ء سے کرتے آرہے ہیں۔تین بھتیجیوں کی شادی کرادی ہے۔ایک بھتیجی اوربھتیجے کواپنے بچوں کا پیٹ کاٹ کے تعلیم دلوا رہے ہیں۔یعنی اس مہنگائی کے دور میں دوگھرانوں کا نظامِ زندگی چلا رہے ہیں۔
اُستاد نے گھر میں ہونے والی چوری کی واردات کی تحریری اطلاع پولیس کودی۔ پولیس اپنی روایتی چالوں سے بات کو طول دیتی رہی اور ایف آئی آر تک لکھنے سے گریز کرتی رہی۔ افسران بالا تک رسائی پاکر آخر بعد تحقیق نامزد ملزموں کے خلاف ایف آئی آر درج کرا لی۔
ملزمان چھپ چھپا کے وقت گزارتے رہے۔ شہر کے کئی سفید پوش اُستاد کا باتوں باتوں میں مذاق اُڑاتے رہے۔ نصیحتیں کرتے نہ تھکتے ۔حافظ جی آپ اپنابھرا گھر چھوڑ کر آبائی گھر کیوں چلے گئے۔اُستاد جی کے چہرے پہ طنزیہ ہنسی پھیل گئی اور بڑبڑائے ۔۔بھرا گھر۔۔ اب گندم ،ٹی وی ، دوکمبل ،کپڑوں کاایک بکس اور میری تراش خراش والی قینچی سے یہ ۔ ۔ بھرا گھر ہوگیا۔کوئی سفید پوش کہتاکہ ملزمان صفائی دینا چاہتے ہیں ، آپ ان سے صفائی لے لیں۔ کوئی کہتاکہ دس بیس ہزار لے لیں اور معاملہ کوختم کردیں، کہاں دھکے کھاتے پھرو گے۔جتنے منہ ا تنی باتیں۔ مگر حافظ جی ڈٹے رہے۔ آخر پولیس اور سفید پوشوں نے مل کر فیصلہ کیا کہ ملزمان چالیس ہزار روپے دیں گے۔
وکیل کا اللہ بھلا کرے اُس نے مفت میں ہی سپرداری کے مراحل کرا دیئے البتہ ضمانتی اور میانوالی کے چکروں میں اُستاد جی کے پانچ چھ ہزار خرچ ہوہی گئے۔ راقم خود اُستادجی کے ساتھ تھانہ گیا اور وہاں سے پورے چالیس ہزار روپے گن کے اُستادکے حوالے کیے۔ اُستاد کا کہنا تھاکہ میرا نقصان تو ستر اسی ہزار روپے سے بھی زیادہ کا ہوگیا اور مجھے صرف پچیس ہزار بچے ہیں۔ میں حیران رہ گیا کہ پچیس ہزار کیسے۔ بعد میں انکشاف ہوا کہ جو اے ایس آئی صاحب اس کیس کی تفتیش پر معمور کیے گئے اُس نے پہلے ہی دورے پر اُستادجی سے ایک ہزار روپے لے لیے کہ ہمیں کوئی خرچہ ورچہ عنایت فرمائیں۔ پھر ایک دن میانوالی اس تفتیشی کا ہمرکاب ہونا پڑا تو دوپہر کا کھانا اور کرایہ خرچ پہ پندرہ سو روپے خرچ کرنا پڑے۔ خدا کاکرنا ایسا ہوا کہ جب چالیس ہزار روپے دینے کا وقت آیا تو اُس وقت وہ تفتیشی تبادلے کی زد میں آیاہوا تھا۔ مگر اپنی سیاسی پہنچ سے پھر واپس پہنچ گیا۔ سب سے پہلا انقلابی قدم یہی اُٹھایاکہ چوری کے مارے نابینا اُستاد کو فون کیا ۔ آپ چالیس ہزار روپے لے گئے اور ہمارا خرچہ تک نہیں دیا، ہمارا تو اِ س میں سے پانچ ہزار روپے حق بنتا تھا۔ہم نے ہی تو بڑی کوشش سے آپ کو یہ پیسے دلوائے ہیں۔ اُستاد نے منت سماجت کی کہ بادشاہو میں تو غریب انسان ہوں۔ میں پہلے ہی لُٹ چکا ہوں، ستر اسی ہزار کے بجائے مجھے نصف رقم ملی ہے۔ بہرحال تھانے دار صاحب نے حکم دیاکہ قصبے میں فلاں میرا رشتہ دار رہتاہے اُس کو جا کے میرا چائے پانی دے آؤ۔ اُستاد نے چار و ناچار پانچ تو نہیں البتہ ایک ہزار روپیہ خدمت میں پیش کردیا۔
گزشتہ کئی دن سے اُستاد بہت پریشان دکھائی دیتا ہے اور کبھی کبھی بُڑبڑاتا بھی ہے۔ ایک دن کہنے لگا کہ آپ کو کیا بتاؤں، بچیوں کے لیے رکھے گئے کمبل تو چور لے گئے۔ مجھے جو رقم ملی اُس سے بمشکل گندم خرید سکا ہوں۔ اب بچیاں پرانی رضائیوں میں گزارہ کرنے پر مجبور ہیں۔ وہ کمبل کمبل کرتی رہتی ہیں۔ شام کو دِ ل بہلانے کے لیے ٹی وی دیکھ لیتی تھیں، اب یہ تفریح بھی اُن کو میسر نہیں۔ میں دیکھ تو نہیں سکتامگر خبریں وغیرہ سُن لیتا تھا ، اب میں بھی حالاتِ حاضرہ سے محروم ہو چکاہوں۔
حافظ صاحب اچانک پریشانی کے عالم میں چوروں کو بددُعائیں دینے لگتے ہیں اور تفتیشی افسر کے لالچی پن اور معاشرے کی بے حسی کا بھی رونا روتے ہیں۔ اُستاد جی کی پریشانی دیکھ کے جب میں کہتاہوں کہ آپ کی کہانی اخبارمیں دینی چاہیے توفوراََ ناں ناں کرناشروع کردیتے ہیں۔ مگر کئی روز کی ذہنی کشمکش کے بعد حافظ صاحب کی اجازت کے بغیر ہی یہ ساری روداد لکھنے بیٹھ گیاہوں کیونکہ میں سمجھتا ہوں کہ ایسے واقعات کو لوگوں کے سامنے لانا چاہیے تاکہ ہم سب کو پتا چلے کہ ہمارا سماج کس مقام پر کھڑا ہے، ہمارے ادارے کہاں کھڑے ہیں۔
قابلِ غور اور افسوس ناک پہلو یہ ہے کہ حافظ صاحب جہاں کرائے کے مکان میں رہائش پذیر ہیں ، اِسی قصبے کے ہائی سکول میں وہ پچھلے بائیس سال سے قصبے کے بچوں کو تعلیم کی روشنی سے منور کررہے ہیں۔میرے خیال میں ان کے گھر میں چوری کرنے والے نوجوانوں کی عمر بھی اُستاد جی کے شاگردوں جتنی ہوگی اور ہوسکتاہے شاگرد بھی ہوں۔ اگر شاگرد نہ بھی ہوں تو کم ازکم ان کو یہ تو ضرور پتا ہوگا کہ یہ گھر ایک نابینا اُستاد کا ہے۔ ہمارا معاشرہ کس رُخ پہ چل نکلاہے۔ایک نابینا اُستادکا گھر بھی محفوظ نہیں۔ عبدالستار ایدھی کے گھر پر ڈاکا کے بعد تو میرے خدشے کو مزید تقویت ملی کہ ہمارا معاشرہ بے حسی و بے شرمی کی طرف گامزن ہے۔
پولیس کے رویے میں بھی تبدیلی کا عنصر بہت کم ہی دکھائی دیتاہے۔نامزد ملزم سے نصف رقم لے کر حافظ صاحب کو مجبور کردینا کہ یہ پیسے لے لو،یہ بھی بہت ہیں۔ آپ خوش قسمت ہیں کہ آپ کو چوری شدہ مال کا کم ازکم نصف تو مل رہاہے ورنہ تو چوری کے بعد مال کہاں واپس ملتاہے۔اگر آپ نے یہ چالیس ہزار نہ لیے تو کل ان سے بھی محروم ہوجاؤ گے۔ اس کا مطلب کیاہے؟ کیا پولیس چوروں سے مال برآمد کرانے کی صلاحیت نہیں رکھتی یا پھر ابھی تک ہمارے عدالتی نظام میں ایسے سقم ہیں کہ لوگ عدالت کے بجائے تھانہ میں ہی مک مکا میں عافیت سمجھتے ہیں۔ میرے خیال میں تو عدالتی نظام سے زیادہ ہمارے ایسے تفتیشی مسئلہ خراب کردیتے ہیں۔ جو دونوں طرف سے مال بٹورنے کے چکر میں ہوتے ہیں۔ اگر کیس میرٹ پر تیار کرکے تفتیشی عدالت کو بھیج دیں تو پھر ان کے پَلے کیا پڑے گا۔ اس لیے تو یہ مدعی کو اس حد تک ذلیل اور مجبور کر دیتے ہیں کہ وہ ادھر ہی تصفیہ کرنے پر تیار ہوجاتاہے۔ پھر رشوت خور تفتیشی احسان کرتاہے کہ میں نے آپ کو عدالتوں کے دھکوں سے بچا لیا ۔ آپ عدالت جاتے تو شاید یہ رقم بھی نہ ملتی ،تاریخوں پہ تاریخیں چلتیں اور اپنی رقم کے ملتے ملتے بہت سی رقم خرچ بیٹھتے، وقت کا ضیاع اور تکالیف کا سامنا الگ سے کرتے۔ دوسری طرف ملزم پر احسانِ عظیم کرتے ہیں کہ اگر تم چاہتے ہو کہ جج کے غضب سے بچ جاؤ تو ہم کوشش کرتے ہیں کہ معاملہ یہاں ہی رفع دفع ہوجائے۔ مگر اس کے لیے پیسہ خرچ کرناپڑے گا۔ بس ان حالات میں ا یسے تفتیشیوں کا دھندا چل رہاہے۔لوٹ مار نے ان کو بے حس کردیاہے۔اسی وجہ سے تھانہ جا کر اکثر ملزم عافیت اور مدعی وحشت محسوس کرتے ہیں۔
اس بے حسی کا شکار صرف ملزم اور پولیس نہیں بلکہ بحیثیت مجموعی پورا معاشرہ ہے۔اگر ایک نابینا اُستاد کے گھر چوری پر اگلے جمعہ قصبہ کی ہر مسجد میں اس واقعہ کو بیان کیاجاتا اور ملزمان کی اس گھٹیا حرکت کا نوٹس لیاجاتا۔ عوام کو اس بداخلاقی کے انجام سے ڈرایا جاتا اور پولیس بجائے ففٹی ففٹی پر معاملہ ختم کرانے کے ملزم کو کڑی سزا دلواتی تو ایسے واقعات کے سدِباب میں مدد ملتی۔ اچھے اور قابل تفتیشی آفیسر کے میرٹ پر لکھے گئے مقدمے اورضمنی پر ملزمان کبھی بچ نہیں پاتے۔
اگر نوجوان نے بے روزگاری سے تنگ آکر ایک اُستاد کو لوٹنے سے بھی گریز نہیں کیا تو پھر حکومت روزگار کے مواقع زیادہ سے زیادہ پیدا کرے تاکہ نوجوان خودکشی کریں نہ خود کُش بنیں۔ لیکن میں اس کیس کے تفتیشی کے رویے پر ابھی تک شاکی ہوں کہ وہ تو بے روزگار نہیں ہے۔ اُسے حکومتِ پنجاب اچھی خاصی تنخواہ دیتی ہے۔ معاشرے اور خاندان میں تھانے دار کی عزت ہوتی ہے۔ توپھر ایک چوری کے مارے نابینا اُستاد پر یہ تفتیشی کیوں دن دیہاڑے ڈاکہ مارنے سے باز نہیں آیا؟؟؟ یہ ہم سب کے لیے سوال ہے۔ ہمارے اُن سیاستدانوں کے لیے بھی جومیرٹ پہ کام کرنے اور اداروں پر چیک رکھنے کے بجائے ایسے تفتیشی افسران کے تبادلے رُکواتے ہیں۔اُس مولوی سے بھی سوال ہے جو ہرجمعہ قوم سے مخاطب ہوتااور سماجی مسائل کے بجائے فروعی اختلافات کو موضوع بناکے بیٹھ گیاہے۔ اُس این جی او کے سربراہ سے بھی ہے جو صرف ترقیاتی فنڈز کے چکر میں پڑ کے سماج کی اعلیٰ اقدار کا جنازہ نکالنے میں مصروف نظر آتاہے۔ اُن والدین سے بھی سوال ہے جو اولاد تو پیدا کرنے میں اپنا ثانی نہیں رکھتے مگر تعلیم و تربیت کے بجائے اُس سے لاپرواہی برتتے ہیں۔سکول کے ہر اُس اُستاد سے ہے جس کو نئی نسل کی تعلیم و تربیت کی ذمہ داری سونپی گئی ہے مگر وہ محلے کا سفید پوش توہے، سیاست دان بھی ہے لیکن اُستاد کی حقیقی ذمہ داریوں سے غافل ہے۔

اپنا تبصرہ لکھیں