چھے جنوری 2017 صبح چھے بجے ایک ماں کی آنکھ کھلی اور اس نے سردی کی پرواہ نا کرتے ہوے اٹھ کر اپنے بچوں کے لیے پانی گرم رکھا ان کو سکول جانے کے لیے تیار کیا ناشتہ بنایا اور اپنے لخت جگر کو لنچ بنا کر دیا۔ جاتے ہوے سب بچوں کو پیار کیا ان کے منہ پر لوشن لگا کر خود باہر رکشے تک چھوڑ کر گئی ۔ ماں کی چھٹی حس اپنے بچوں کے لیے بہت تیز ہوتی ہے اس لیے بہت دیر تک وہ جاتے ہوے اپنے بچوں کو دیکھتی رہی اور پھر اندر آکر ایک دم افسردہ ہو گئ ایسا اس کے ساتھ پہلی بار ہو رہا تھا مگر تب تک ایک ماں بے خبر تھی ۔
سکول کے راستے میں ایک ریلوے پھاٹک پڑتا تھا جس کو تقریباً روز ہی عبور کرکے سکول جاتے تھے مگر آج دھند اور سردی کی لہر نے راستے کو کچھ زیادہ ہی لمبا بنا دیا تھا ۔رکشے والا روز ہی اس جگہ سے گزرتا تھا اگر کبھی ٹرین کے آنے کا وقت ہوتا تو ریلوے پھاٹک بند کر دیا جاتا تھا اس لیے وہ اپنی موجودہ رفتار کے ساتھ اپنی منزل کی طرف گامزن تھا ۔بچے ایک دوسرے سے باتوں میں مصروف تھے کہ اچانک ایک اندھی۔۔ قاتل ۔۔۔ٹرین نے ان کو ٹکر دے ماری ۔۔افف۔۔۔۔اس کے بعد کا منظر بیان کرنا بہت مشکل ہے اتنی دھند اور ٹھنڈ میں سات پھولوں کی لاشیں، ان کے رونے کی آواز ،ان کے سسکنے کی تڑپ،ان کے بدن کے ٹکڑے ، میں کیسے بیان کروں ؟ نہیں مجھ سے یہ سب نہیں ہو سکتا وہ ماں جو گھر میں پریشان تھی اب اس تک اطلاع جانے والی ہے کہ اس کے لخت جگر اب اس دنیا میں نہیں رہے وہ ماں جو ابھی تک ناشتہ بھی نہیں کر پائی ماتم کیسے کرے گی ۔
افف میرے خدایا سات قوم کے معماروں کا جنازہ ایک ساتھ کیسے اٹھایا جائے گا ؟ یہ کیسے لکھوں کہ اب وہی ماں غم سے بے ہوش ہو چکی ہے اس کی پوری کائنات اجڑ چکی ہے ۔ ماں بس روتے ہوے یہی پوچھ رہی ہے میرے بچوں کا کیا قصور تھا ہماری کیا دشمنی تھی ٹرین سے ،میں نے تو اپنے بچوں کو پڑنے بھیجا تھا ۔یہ کیا واپس لاے ہو ؟ ۔۔۔۔ مجھے میرے بچہ لا کر دو ۔
درد اور منظر کشی میں فرق ہے . آج میں منظر کشی نہیں کر رہا آج میرا قلم ماتم کر رہا ہے ان بچوں کا ماتم جو ریلوے ملازمین کی غفلت کی بھینٹ چڑھ گئے ۔
پاکستان میں سب سے زیادہ سرکاری عراضی پر قبضہ پاکستان ریلویز کا ہے ۔ ہمارے ملک کی ہر حکومت نے بلواسطہ یا بلاواسطہ پاکستان ریلویز سے فائدہ اٹھایا ہے وہ لیزنگ کے بہانے ہو یا سرکاری سطح پر فنڈز کی مد میں ہر حکومت پاکستان ریلویز کو چونا لگا چکی ہے ۔شیخ رشید صاحب بھی اسی ریلویز کی بدولت آج تک سیاستدانوں میں شامل ہیں .
مگر افسوس آج تک نہ ہی ریلوے کا خسارہ کم ہوا اور نہ ہی ان کے عملے کی غفلت میں کوئی کمی واقع ہوئی بلکہ اب تو ان کے حوصلے اور بھی بلند ہیں کیونکہ ان کے افسران ان کی پشت پناہی کرتے ہوئے نظر آتے ہیں جیسا کہ آج ایک افسر نے بیان داغا کہ حادثے سے قبل ایک مال گاڑی گزری تھی اس کے بعد ٹریفک کا رش بڑھ گیا اور ڈیوٹی پر تعینات شخص ریلوے پھاٹک بند نہیں کر سکا۔
مطلب یہ ہوا قصور عملے کا ہے نا ٹرین کا بلکہ سارا قصور ان معصوم بچوں اور ان کے والدین کا ہے جو اتنی دھند میں سکولوں میں جاتے ہیں ۔
پورے پاکستان میں ریلوے لائن کا جال تو ہم کو ورثے میں ملا تھا اس کی بہتری کے لیے ہمارے حکمرانوں نے کیا کچھ کیا وہ تو آپ کو ریلوے کی زبوں حالی اور خسارے سے اندازہ ہو جاے گا مگر ہماری ہر ٹرین قاتل ہے کیونکہ قیام پاکستان سے لے کر آج تک ہمارے سیاستدانوں نے پورے پاکستان میں بہت سی جگہوں پر ریلوے پھاٹک ہی تعمیر نہیں کروایا اگر تعمیر ہو بھی گیا تو عملہ غائب ہو جانا معمول کی بات ہے ۔
لودھراں کی عوام سراپا سراپا احتجاج ہیں ان کو میاں نواز شریف صاحب کا وہ وعدہ آج بھی یاد ہے جس میں انہوں نے کہا تھا کہ ہم عوام کی سہولت کیلئے ایک پل تعمیرکریں گےمگر پل تو بہت دور کی بات ہے اب عملے کی غفلت سے ایک ناقابل تلافی نقصان ہو چکا ہے مگر مجال ہے سیاستدانوں کے سر پر ایک جوں بھی رینگی ہو ۔
اظہار افسوس کرنے کے علاوہ ٹرین کو اپنے اگلے ٹارگٹ کی طرف رواں دواں کر دیا گیا۔ ریلوے افسران اور عملہ ان ننھے قوم کے معماروں کے والدین کا غم غلط نہیں کر سکتے کوئی بھی مزمت اور اظہار افسوس ان کے بچوں کو واپس نہیں لا سکتی مگر آج کے بعد اگر ایسے واقعات ہی نہ ہوں تو شاید ان بچوں کی شہادت کسی کے کام آ سکے آج تک لاکھوں لوگ ریلوے کی زد میں آچکے ہیں مگر آج بھی پاکستان کے بائیس ہزار ریلوے کراسنگ پھاٹک کے بغیر ہیں جو روز کہیں نہ کہیں حادثے کا باعث بنتے ہیں ۔
پاکستان ریلوے کے پاس ایسا کوئی سسٹم نہیں جس کی بدولت آنے والی ٹرین کی پیشگی اطلاع عملے کو مل سکے اور آن ڈیوٹی عملہ الرٹ ہو سکے ۔
دھند کے دنوں میں ٹرین کے فرنٹ پر لیزر ٹیکنالوجی کا استعمال آج تک نہیں ہو سکا ۔جبکہ یہ ٹیکنالوجی بیس سالوں سے بہت سے ممالک استعمال کر چکے ہیں
ریلوے کے عملے کے پاس جو ٹیلیفون لائنز ہیں وہ تقریباً بند ہی رہتی ہیں اس وجہ سے ڈیوٹی پر موجود عملے کی بھی کوئی خیر خبر نہیں ہوتی ہے ۔
تقریباً روز ہی کوئی نا کوئی حادثہ رونما ہوتا ہے اور میڈیا والے ایک دو گھنٹےاپنا رولا ڈال کر چپ ہو جاتے ہیں اور تمام کارروائیاں ،رپورٹس ردی بن جاتی ہیں اس طرح ریلوے پر لاکھوں لوگوں کے قتل کو نا صرف معاف کر دیا جاتا ہے بلکہ اگلے حادثے کے لیےعملے کو احتیاطی تدابیر بھی دی جاتی ہیں کہ اگر ایسا واقعہ ہو تو کیسے مسلہ حل کیا جاتا ہے .
پاکستان ریلوے اللہ کے آسرے پر چل رہی ہے ورنہ ان کی کارکردگی صفر ہے خدا ان کو اپنا اپنا فرض ادا کرنے کی توفیق عطافرماے ۔
میری وزیر اعظم صاحب سے اپیل ہے کہ پورے پاکستان میں جتنے بھی ریلوے کراسنگ پھاٹک کے بغیر ہیں ان کے لیے حفاظتی اقدامات کئے جائیں تاکہ لوگوں کی بد دعائیں لینے سے بہتر ہے آپ دعا لیں ۔
