تحریر: ایم سرورصدیقی
ان دنوں بہت سی اہم خبریں عوام میں ڈس کس ہورہی ہیں وفاقی کابینہ میں ردو بدل اور وزیرِ خزانہ اسدعمر کے مستعفی ہونے کی ڈرامائی صورتِ حال سے تحریکِ انصاف کی حکومت اب تک نہیں سنبھل سکی ،عمران خان کی ٹیم بلند بانگ دعوؤں کے برعکس ایک ہی جھٹکے میں زمین بوس ہو گئی ملک میں مہنگائی نے عوام کی کمر تھوڑ دی ہے اسد عمر سمیت دیگر وزراء کی سبکدوشی کپتان کی ناکامی کا ثبوت ہے اور بہت جلد ملک میں بڑی تبدیلی آ سکتی ہے اس تناظر میں کچھ لوگوں کا خیال ہے تحریک انصاف کی مرکزی ہ صوبائی حکومتیں جام ہو چکی ہیں یہی وجہ ہے کہ عمران خان کو بار بار کہنا پڑرہاہے کہ و ہ پنجاب اور خیبر پی کے کے وزرائے اعلیٰ کو تبدیل نہیں کرینگے اور لوگ ہی کہ اس بات پر یقین ہی نہیں کررہے ایک خبر اور بھی ہے کہ سینئر سیاست دان چوہدری نثار نے سیاست میں پھر سے متحرک ہونے کا فیصلہ کر لیا۔ چوہدری نثار اور شہباز شریف کی لندن میں ملاقات متوقع ہے۔ن لیگ میں مزاحمتی سیاست کا بیانیہ رد ہونے پر چوہدری نثار نے پھر سے ن لیگ سے رابطوں کا فیصلہ کیا۔چوہدری نثار انتخابات میں راولپنڈی کی صوبائی نشست پر کامیاب ہوئے تھے غالب خیال ہے کہ چوہدری نثار شہباز شریف سے ملاقات کے بعد حلف اٹھائیں گے۔جبکہ چوہدری نثار کا 24 اپریل کے بعد صوبائی اسمبلی کی سیٹ سے حلف اٹھانے کا امکان ظاہر کیا جا رہا ہے۔بتایا جا رہا ہے کہ چوہدری نثار چونکہ نواز شریف کے بیانیے سے اختلاف کرتے تھے لیکن اب پارٹی میں شہباز شریف کا بیانیہ مقبول ہورہا ہے اس وجہ سے انہوں نے پھر سے ن لیگ کے ساتھ رابطہ کرنے کا فیصلہ کیا ہے چودھری نثار علی خان نے پارٹی قیادت سے اختلافات کی وجہ سے آزاد حیثیت میں عام انتخابات 2018ء میں حصہ لیا تھا۔ عام انتخابات سے قبل مسلم لیگ ن کے رہنما چودھری نثار علی خان نے پارٹی قیادت کے خلاف علم بغاوت بلند کرتے ہوئے آزاد حیثیت میں الیکشن لڑنے کا اعلان کیا تھاچودھری نثار علی خان نے عام انتخابات 2018ء میں چار نشستوں سے حصہ لیا جس میں دو نشستیں قومی اسمبلی جبکہ دو صوبائی اسمبلی کی تھیں۔ چودھری نثار علی خان کو قومی اسمبلی کی دو نشستوں این اے 59 اور این اے 63 سے اور صوبائی اسمبلی کی نشست پی پی 12 سے شکست کا سامنا ہوا، جبکہ صوبائی اسمبلی کی نشست پی پی 10 سے چودھری نثار علی خان کامیاب قرار پائے لیکن چودھری نثار علی خان نے پنجاب اسمبلی میں حلف نہیں اْٹھایا اور نہ ہی اسپیکر ، ڈپٹی اسپیکر اور وزیراعلیٰ کے انتخاب میں حصہ لیا تھا۔ اور اب ایک اور خبرمیں کہا گیاہے کہ وفاقی کابینہ میں اہم تبدیلیوں کے بعد وزیراعظم عمران خان کی زیر صدرات ہونے والے کابینہ کے پہلے اجلاس میں سبکدوش ہونے والے کسی وزیر نے شرکت نہیں کی۔ منظرِ عام پر آنے والی اندرونی کہانی یہ ہے کہ مطابق اجلاس میں شریک اراکین حالیہ تبدیلیوں سے خوش نہیں تھے اور انہوں نے وزیراعظم سے سوال کیا کہ اسد عمر کو وزارتِ خزانہ سے کیوں ہٹایا گیا ہے جس پر عمران خان نے جواب دیا کہ ملک میں موجود معاشی بحران بہت شدیدہے جبکہ لوگوں کا خیال ہے کہ اسد عمر بڑے ماہرِ معاشیات نہیں ہیں جبکہ حفیظ شیخ عالمی معاشی معاملات اور ملکی معاشی امور کا ادراک رکھتے ہیں، اسحاق ڈار نے اس ملک کو بحرانوں کے سوا کچھ نہیں دیا لیکن انہیں ہٹایا نہیں گیا اس لیے بحران حل نہیں ہو سکے۔عمران خان نے وزارتِ خزانہ کی نئی ٹیم کو ہنگامی بنیادوں پر کام کرنے کی ہدایت دیتے ہوئے کہا ہے کہ وزراء اور مشیر پرموشن کے لئے نہیں عوام کی خدمت کے لیے کام کریں اور کارکردگی بہتر بنائی جائے، انہوں نے دوٹوک انداز میں کہا کہ کہ جو وزیر یا مشیر صحیح کام نہیں کرے گا وہ گھر جائے گا اور اس کی کابینہ میں کوئی جگہ نہیں ہو گی تاہم میری خواہش ہے کہ اسد عمر کابینہ میں واپس آ جائیں۔ اس حوالے سے مشیراطلاعات فردوس عاشق اعوان کہہ چکی ہیں کہ اسد عمر پارٹی کا حصہ ہیں اور خاندان کے لوگوں کو منانا نہیں پڑتا جبکہ وفاقی وزیرِ ریلوے شیخ رشید احمد نے قوم کو یقین دلانے کی کوشش کی ہے کہ وہ خواد اسد عر کو واپس لانے کراچی جائیں گے اور دورہ چین سے پہلے اسد عمر کو واپس لے آئیں گے۔ وزیراعظم نے عامر کیانی کو ہٹانے کی وجہ بتاتے ہوئے کہا کہ وہ بہتر انداز میں کام نہیں کر سکے اس لیے انہیں ہٹا دیا گیا۔وزیراعظم عمران خان نے وفاقی کابینہ میں وزراء کے قلمدانوں میں بڑے پیمانے پر تبدیلیاں کر دی ہیں ، وزارت خزانہ کیلئے ڈاکٹر حفیظ شیخ کو مشیر مقرر کیا گیاہے جبکہ فواد چوہدری کو بھی دوسرا محکمہ دیدیا گیاہے۔ ایک دھماکے دار خبر سینئر صحافی کامران خان نے ٹویٹر پر پیغام جاری کرتے ہوئے کہاہے کہ وزیراعظم عمران خان نے پاکستانی معیشت سے جڑے تمام تر امور سدھارنے کیلئے پانچ ماہرین پر مبنی ایک بورڈ تشکیل دیا ہے جس میں شوکت ترین ، شبر زیدی ، سابق گورنر سٹیٹ بینک سلیم رضا ، صادق سید اور شیر اعظم مزاری شامل ہیں جبکہ پارٹی کے سینئر رہنما جہانگیر ترین اس فورم کے کنوینئر ہوں گے اور یہ فورم وزیراعظم عمران خان کو رہنمائی فراہم کرے گا۔سید شبر زیدی پاکستان کے معروف ترین چارٹرڈ اکاؤنٹنٹ ہیں جو کہ سندھ حکومت میں بطور صوبائی وزیر بھی خدمات سرانجام دے چکے ہیں ، اس کے علاوہ سید سلیم رضا جو کہ 2009 سے 2010 سٹیٹ بینک کے گورنر بھی رہے ہیں۔ایک خبر یہ بھی ہے کہ سینئر سیاستدان جاوید ہاشمی نے کہا کہ عمران خان کی جرأت نہیں تھی مجھے نکالتے میں نے تو خود ہی پارٹی چھوڑی جن کو خود عمران خان پسند نہیں کرتا ان کو بھی اہم وزارتیں دینا پڑی ہیں۔اعظم سواتی کو سپریم کورٹ نے رد کیا تھا وہ بھی آج کابینہ کا حصہ بن گئے ہیں جو نام پیپلزپارٹی، ق لیگ اور مشرف نے مسترد کیا وہ آج کابینہ کا نیا چہرہ ہیں۔ وفاقی کابینہ میں آدھے نان الیکٹڈ ٹیکنو کریٹس آ چکے ہیں عامر کیانی پر اگر کرپشن کا الزام ہے تو اس سے عمران خان الگ نہیں۔ جاوید ہاشمی نے کہا کہ پارٹی کی چیف آرگنائزر علیمہ خان تھیں ،علیمہ خان پر الزام عمران خان پر الزام ہے۔موجودہ کابینہ کے بعد عمران خان کی وقعت شوکت عزیز جیسی ہی رہ گئی ہے عمران خان کی 90 فیصد کابینہ اس سے نفرت کرتی ہے، وہ پاکستان کو کیا دے گا جاوید ہاشمی نے مزید کہا کہ 4 ماہ بعد عمران خان کے پاس استعفے کے سوا کوئی چارہ نہیں ہوگا، عمران خان پہلے بھی 3 دفعہ استعفیٰ دے چکا ہے، عمران خان کے پاس پارلیمنٹ میں اکثریت بھی نہیں ہے۔ واضح رہے کہ وفاقی کابینہ میں حالیہ رد و بدل کے بعد وزیراعظم عمران خان کے مستعفی ہونے سے متعلق بھی کئی دعوے سامنے آئے ہیں۔اس حوالے سے معروف تجزیہ کار حامد میر کا تبصرہ ہے وزیراعظم کو چاہئیے کہ وہ اپنی فکر کریں کیونکہ جس طریقے سے عمران خان بات کر رہے ہیں کہ میں اس وزیر کو بھی بدل دوں گا اْس کو بھی بدل دوں گا میرے خیال سے وزیراعظم کو اپنی فکر کرنی چاہئیے کہ کہیں وہ خود تبدیل نہ ہو جائیں۔ حامد میر نے کہا کہ وزیراعظم عمران خان جس راستے پر چل رہے ہیں جیسا کہ اعظم سواتی کو وزیر بنا کر وہ جلسے میں جاکر کرپشن پر تقریر کر رہے ہیں اس کا مطلب یہ ہے کہ انہیں سمجھ نہیں آرہی کہ میں کیا کر رہا ہوں۔ اگر وزیراعظم عمران خان اعظم سواتی جیسے بندے کو وزیر بنا کر دوسروں کو کرپشن پر درس دیں گے تو اس سے ان کی اپنی قابلیت پر سوالات اْٹھنے لگ جائیں گے۔اس تمام تر صورتِ حال میں عوام کیا کریں جن کی سمجھ میں کچھ نہیں آرہا لگتاتو یہی ہے کہ عمران خان کی سمجھ میں بھی کچھ نہیں آرہا جومسلم لیگ ن اور پیپلز پارٹی کے ادوار کے چہرے وزیر بناکر سمجھ رہے ہیں وہ ملک میں کوئی تبدیلی لے آئیں گے ان گھمبیرحالات کے پیشِ نظر یہ ان کی سوچ ہے تو پھر ان کا اللہ ہی حافظ ہے وہ وزیروں مشیروں کو بدلتے بدلتے تھک جائیں اور کچھ نہیں بدلے گا ہمارا مشورہ ہے وزیر اعظم اس اکھاڑ بچھاڑ کی بجائے اپنی ترجیحات کا تعین کریں اس کے تناظر میں وزیروں مشیروں کو کارکردگی کا ٹارگٹ دیں تو شاید عوام کو ریلیف مل جائے ورنہ نئے نئے تجربے کرنے کا کوئی فائدہ نہیں ہوگا وہ سیاسی طور پر بلیک میل ہوتے رہیں گے پھر حکومت ،تبدیلی اور ملک کا اللہ ہی حافظ ہوگا۔
