تحریر: احمر اکبر
دولت کی اہمیت سے کوئی بھی ذی روح انکار نہیں کرتا انسان کی بنیادی ضرورت بن چکی ہے یا بنا لی گئی ہے ۔ آج کل دولت کوٹھی بنگلہ کار نہ ہو تو انسان کو لگتا ہے وہ غریب ہے اس کی معاشرے میں عزت نہیں ہے ۔اب عزتوں کا دارومدار پیسہ ہے اس لیے ہر کوئی امیر ہونے کے لیے اپنی پوری کوشش کرتا ہے ۔جائز ناجائز ہر راستہ اپناتا ہے۔ ہر کوئی چاہتا ہے اس کا اپنا ایک عالیشان محل ہو اور اس میں دنیا کی ہر نعمت موجود ہو ۔بے شک وہ حرام کی کمائی کا ہی کیوں نہ ہو اس سے کوئی فرق نہیں پڑتا مطلب اب اہمیت پیسے کی ہے معاشرتی اقدار کو اب دولت کی کسوٹی پر رکھ کر پرکھا جاتا ہے ۔
ہمارے سیاستدانوں نے اتنا کچھ جمع کر لیا ہے کہ ان کی اولاد ان کی زندگی میں ہی آپس میں اس ناجائز دولت کے پیچھے لڑتی مرتی ہے مگر پھر بھی ہم لوگ باز نہیں آتے ۔ہم آج بھی اپنی روش پر گامزن ہیں جبکہ ہمارے نبی حضرت محمد صل اللہ ؑعلیہ والہ وسلم نے اپنی پوری زندگی ہمارے لیے بہترین مثال قائم کی ۔ایک واقعہ آپ کی خدمت میں پیش کر رہا ہوں ۔
ایک مرتبہ حضرت فاطمہ رضی اللہ عنہا بیمار ہوئیں ان کا حال پوچھنے کیلئے آپ صلی اللہ علیہ وسلم تشریف لائے ،ایک صحابی عمران بن حصین جو کہ قریش کے سردار تھے وہ بھی ساتھ تھے ،
دروازے پر جاکر پوچھا کہ بیٹی اندر آئوں میرے ساتھ ایک اور آدمی بھی ہے ،تو حضرت فاطمہ رضی اللہ عنہا نے عرض کیا کہ یارسول اللہ صلی اللہ علیہ وسلم میرے گھر میں اتنا کپڑا نہیں کہ میں پردہ کرسکوں چادر کوئی نہیں چہرہ چھپانے کیلئے.
تو آپ صلی اللہ علیہ وسلم نے اپنی چادر مرحمت فرمائی کہ میری چادر سے پردہ کرلو ،
آپ اندر تشریف لائے اور پوچھا بیٹی کیا حال ہے ،انہوں نے عرض کی اباجان بھوک بھی ہے اور بیماری کے علاج کے پیسے بھی نہیں.
تو حضور اکرم صلی اللہ علیہ وسلم نے گلے لگایا اور آپ بھی رونے لگے. اللہ اکبر!
آپﷺ نے فرمایا اے بیٹی غم نہ کر اس ذات کی قسم جس نے تیرے باپ کو نبی بنایا ہے آج تیسرا دن ہے میں نے بھی ایک لقمہ تک نہیں کھایا. تیرے گھر میں فاقہ تو تیرے باپ کے گھر میں بھی فاقہ ہے۔
یہ اُس نبی اور اس کی بیٹی کے گھر کی حالت ہے
جسے اللہ تعالیٰ نے فرمایا تھا:کہ اگر آپ چاہیں تو سارے عرب کے پہاڑ کو سونا بنا دوں ،
عرب کے پہاڑ مکہ اورمدینہ کے پہاڑ سونا بن جائیں ۔پھر یہ سونا بن کر کھڑے نہیں رہیں گے
بلکہ! آپ کے ساتھ چلیں گے۔
آپ کو توڑنے کی اور کاٹنے کی مشقت میں نہیں ڈالوں گا جتنا فرمائیں گے اتنا ہوکر سامنے آئیں گے ۔
اے بیٹی میں نے انکار کیا اللہ تعالیٰ نے فرمایا :پھر کیا چاہیے ؟میں نے عرض کیا :مجھے یہ چاہیے “اجوع یوما واشبع یوما” ایک دن بھوکا رہوں اور ایک دن کھانا کھائوں.
اے اُمت کے غریبو !اگر تمہیں روٹی نہیں ملی تو تمہارے نبی کو بھی کئی کئی دن روٹی نہ ملی ، تمہارے بیٹے کے علاج کیلئے پیسے نہیں مل رہے تو تمہارے نبی کی سب سے محبوب بیٹی کی دوا کیلئے بھی پیسے نہیں ملے تھے تمہارے بیٹوں کو پہننے کیلئے کپڑے نہیں مل رہے تو تمہارے نبی کی کی سب سے پیاری پیٹی کو بھی پردہ کرنے کیلئے کپڑے نہیں تھے ۔
اب یہاں ہماری عقل برباد ہوگئی اور ہم نے ان گاڑیوں اور کوٹھیوں کو عزت کا معیار بنالیا اگر یہی ہے تو پھر قارون سب سے بڑا عزت والا تھا ۔فرعون جو خدا ہونے کا دعویٰ کرتا تھا وہ بہت دولت مند اور طاقتور تھا کیا وہ سب پر افضل تھا ؟
پوری تاریخ ہمارے پاس موجود ہے پھربھی ہمارے پاس ان باتوں کو پڑنے تک کا وقت نہیں ہے کیونکہ ہم کو دولت اکٹھا کرنی ہے ۔ہم سب کو اپنی اولاد کے لیے کسی بھی قیمت پر محل بنانا ہے اس کے لیے ہم سیاستدان ، ڈاکٹر، پٹواری، پولیس آفیسر ،کلرک بزنسمین یا گدی نشین کچھ بھی بن جائیں کوئی فرق نہیں پڑتا بس دولت ہو تو سب اچھا ہے کا نعرہ لگانے والے اپنی زندگی میں ہی انجام دیکھ چکے ہیں ۔
اگر پیسہ اتنا اہم ہوتا تو ہمارے نبی ؐ ﷺ دولت جمع کرتے اور ہم سب کو بھی تلقین کرتے کہ یہ بنیادی ضرورت ہے اس کے بنا گزارا مشکل ہو جاے گا مگر ایسا کہیں بھی نہیں ملا بلکہ انھوں نے خود تمام عمر سادہ گزاری اور ان کے بعد خلفاے راشدین نے بھی اس کی اعلیٰ مثال قائم کر کے ثابت کیا کہ دولت محض ایک وقتی راحت کا نام ہے
یہاں تو دولت کی خاطر آئین میں ترمیم کر دی جاتی ہے اقتدار کے لیے نئی شق بنا لی جاتی ہیں دولت مل جاے تو ملک میں ڈراون مارنے کی اجازت دے دی جاتی ہے پورے ملک میں پہلے سیاستدان کو پہلے قرضے دیئے جاتے ہیں پھر این آر او بنا کر معاف کر دیا جاتا ہے دولت کے حصول کے لیے کسی بھی قومی ادارے کو ملک کے خلاف استعمال کیا جاتا ہے ۔ہم قرضوں کی قسط اتارنے کے لیے نیا قرضہ لے کر ملک کا کچھ حصہ گروی رکھ کر بھی شرمسار نہیں ہوتے کیونکہ ہم کو اپنے کمیشن سے غرض ہے ملک و قوم گئی تیل لینے اور ہم ان کی پرواہ کیوں کریں اس ملک نے ہم کو دیا ہی کیا ہے ۔یہ وہ الفاظ ہیں جو پاکستان کے سب سے امیر لوگ کہتے ہیں ۔میں پوچھتا ہوں آپ لوگ کسی اور ملک میں جا کر اپنی عزت چیک کریں آپ کو کوئی منہ نہیں لگاے گا اور یہاں کوئی لغاری ہے کوئی مخدوم ،کوئی بھٹو ہے کوئی شریف ،کوئی مولانا ہے کوئی چوہدری ہے ۔مگر انسان کون ہے اس کا فیصلہ عوام خود کرے ۔۔
اسلام ایک مکمل ضابط حیات ہے مگر ہم نے اپنے عدالتی قانون کو اولین ترجیح دے کر اسلامی قوانین کو بہت پیچھے چھوڑ دیا ہے یہ وہی قانون ہے جو انگیز کا بنایا ہوا ہے آج تک وہی چل رہا ہے اس کی خامیوں کی وجہ سے انصاف کی فراہمی میں بہت سی رکاوٹیں ہیں جن کو نظر انداز کر دیا جاتا ہے اور اس طرح ہر کوئی اپنے آپ کو سپریم سمجھ بیٹھا ہے اور دولت کی ہوس نے ان کو آخرت تو بھلا ہی دی تھی اب پاکستان کا نام بھی ان چند لوگوں کی وجہ سے خراب ہو رہا ہے ۔
آپ کبھی ان کی پریس کانفرنس دیکھیں تو دکھ ہوتا ہے کہ اس ملک کے حکمران کیسے لفظ استعمال کرتے ہیں ۔بس دعا ہے خدا ہم سب میں شعور پیدا کر دے کہ ہم اپنے ارد گرد کے لوگوں کو پہچان سکیں اور دولت کے پجاریوں سے اس ملک کا پیچھا چھڑوا سکیں ۔
