ایک مشہور کہاوت سے شروع کرتا ہوں جو کہ اکثر مجھ پر حرفِ آخر کی طرح مثبت ثابت ہوئی ہے :” جو انسان ہر وقت سب کی خوشی چاہتا ہے۔ سب کے بارے میں اچھا سوچتا ہے سب کا خیال رکھتا ہے وہی انسان زندگی میں ہمیشہ سب سے اکیلارہ جاتا ہے”
انسانی زندگی کھٹن اور دشواریوں سے لبریز ہے جو لوگ اس مصافت سے تھک جاتے ہیں انہیں منزل نہیں ملتی مگر کچھ لوگ ایسے ہوتے ہیں جنہیں اپنی ناکامیوں سے کام لینے کا بہتر ہنر آتا ہے وہی لوگ بالآخر اپنی منزل حاصل کرنے میں کامیاب ہو کر مایوس لوگوں کے لیے ایک زندہ مثال قائم کر جاتے ہیں۔مرد ہو یا عورت، کوئی بھی زندگی کے ہر لمحے میں بہادر نہیں رہ سکتا، بہت ساری چیزین ہوتی ہیں جو ہمیں کمزور کرتی ہیں اورایسے ہی کمزور لمحوں میں تسلی و دکھ کے دو الفاظ بولنے والا دل کے اکثر قریب ہو جایا کرتا ہے اور ان ہی لمحات میں ساتھ کھڑا رہنے والا یا چھوڑ جانے والا ہمیشہ اپنی یاد کی کرن اجاگر کرتا رہتا ہے۔زندگی اور پانی دونوں اپنی رفتار سے بغیر کسی کا انتظار کیے بڑی تیزی کے ساتھ اپنی منزل کی طرف بڑھتے ہیں۔ دونوں کسی کی پروا نہیں کرتے اس طرح زندگی اور وقت کا بھی آپس میں بہت گہرا رشتہ ازل سے چلتا آرہا ہے، وقت بھی کسی کی قدر نہیں کرتا۔ وقت انسانی زندگی کے ساتھ ایک نہ ہٹنے والا سایہ کی مانند ہے جس طرح سایہ گرفت میں نہیں آتا اسی طرح وقت بھی زندگی کی گرفت میں نہیں آتا۔ انسان جب وقت کی قدر نہیں کرتا تو وقت بھی کسی کی قدر نہیں کرتا اور اسی نہ قدری کی وجہ سے انسان بہت سے دکھوں کا سامنا کرتا ہے۔ اور وہ ہی شخض وقت کا سکندر ہوتا ہے جو وقت پر وقت کی قدر کرتا ہے۔
زندگی کبھی کسی کے لیے نہیں رکتی، کبھی کسی کے لیے نہیں ٹھہرتی، لمہے کبھی پل بھر کے لیے نہیں تھمتے، ہوا ہر وقت چلتی ہے۔ کیونکہ اگر یہ تسلسل قائم نہ رہے تو زندگی کی سانسیں رک جائیں۔ زندگی کی آنکھوں میں آنکھیں ڈال کر جینا ہی اصل جینا ہے، زندگی میں نشیب و فراز، اونچ نیچ، تو آئے دن ہوتی رہتی ہے۔ کیونکہ زندگی کا دوسرا نام ہی تغیر ہے۔ کائنات کا سارا حسن تبدیلی میں ہے انسان کے لیے کسی ایک جگہ پر ٹکِ کر بیٹھنا مشکل ہے ، اصل میں انسان کی فطرت یکسانیت سے اکتا جانے والی ہے۔ اور ہم لوگ بھی کتنے عجیب ہیں، ہم زندگی میں آنے والی خوشیوں کا استقبال تو بڑے شوق سے کرتے ہیں مگر غموں اور دکھوں سے جلد از جلد فرار ہونے کا راستہ تلاش کرتے ہیں۔ آخر ہم یہ کیوں نہیں سوچتے کہ جس پروردگار نے ہمیں زندگی میں بے شمار خوشیاں دی ہیں وہ ہی غموں کی راتیں ختم کر کے پھر سے خوشیوں کی نئی شمعیں روشن کرے گا۔ زندگی پھر سے کروٹ بدلے گی۔ غم اور خوشی ایک ہی تصویر کے دو پہلو ہیں جو کہ زندگی ہے۔ دونوں کا اپنا اپنا حسن اور اپنی اپنی کشش ہے۔ آؤ آج ہم سب مل کر عہد کریں کہ ہم زندگی کی تمام تر حقیقتوں اور رعنائیوں میں خوشی کے ساتھ زندگی کو بسر کریں گئے۔
خوشی کیا ہے۔۔۔؟ اور خوشی کا زندگی میں کیا کردار ہو سکتا ہے۔۔۔؟ایک واقعہ سناتا ہوں کہ مقبول میوزک بینڈ کے بانی سے ان کی زندگی کے بارے میں سوال کیا گیا تو انھوں نے بڑا خوبصورت جواب دیا۔”جب میں پانچ سال کا تھا تو میری ماں مجھے کہا کرتی تھی کہ خوشی زندگی میں کلیدی کردار ادا کرتی ہے،پھر جب مجھے سکول میں داخل کروایا گیا تو وہاں مجھ سے پوچھا گیا کہ میں بڑا ہو کر کیا بننا چاہتا ہوں تو میں نے لکھا “خوش”مجھے کہا گیا کہ تم سوال نہیں سمجھ پائے۔ میں نے کہا ، آپ خود زندگی کو نہیں سمجھ پائے”۔
ہر انسان خوش رہنا چاہتا ہے، کون ہے جو اُداسی اور ناخوشی میں جینا چاہتا ہو، زندگی کے مشاہدے میں ایسے لوگوں سے بھی سامنا ہوتا ہے جو زندگی کی تمام تر اذیتوں اور تلخیوں کے باوجود بھی خوش رہتے ہیں۔ ایسا نہیں ہوتا کہ یہ لوگ دکھ، غم، اور اداسی جیسی کیفیات سے بالاتر ہوتے ہیں۔ فرق صرف اتنا ہوتا ہے کہ یہ لوگ ان کیفیات کو خود پر غلبہ نہیں پانے دیتے۔ اب آتا ہے اصل سوال کہ دنیا میں جدھر اس قدر غم ہیں ، اُدھر کس طریقے سے غموں کو بھلا کر خوش رہا جا سکتا ہے۔ خوش رہنے کے واسطے بہت سی تحقیقات ہوتی ہیں اور آخر نتیجہ یہ ہی نکلتا ہے کہ خوش رہنے کے لیے نہ ہی تو ڈھیر سارے پیسے کی ضرورت ہے۔ اور نہ ہی یہ کہ آپ جسمانی خوبصورتی کے حامل ہوں۔
مگر یہ بھی ایک ناقابل تردید حقیقت ہے کہ جدید زمانے میں جینے والوں کی زندگی اضطراب، ذہنی تناؤ اور ناخوشی سے خالی نہیں ہو سکتی کیونکہ جدید معاشرے میں زندگی بسر کرنے والوں کے لیے منفی کیفیات اکثر اوقات چیلنجوں سے نمٹنے پر مائل کرنے والے عامل کا کام بھی کرتی ہیں۔ بہر حال حد سے زیادہ اضطراب ، ذہنی تناؤ اور ناخوشی کے بغیر جینا ہر انسان کا بنیادی حق اور ضرورت ہے۔ اگر منفی سوچ اور کیفیات حد سے بڑھ جائیں تو انسان کی ذہنی اور جسمانی صحت کے لیے خطرناک ہو جاتی ہے۔ تحقیقوں ، مقالموں ، بحثوں اور تجزیوں سے خوشی کو تلاش اس قدر کیا گیا ہے کہ خوشی خود ایک بھید خزانہ بن گئی ہے۔ اور اب تو جدید دور کے فلسفی یہ کہتے ہیں کہ خوشی آپ کا اپنا انتخاب ہے آپ اس کو خود حاصل کرنا چائیں تو حاصل کر سکتے ہیں۔ اور جب ماہرینِ نفسیات کہتے ہیں کہ انسان کے کچھ خاص رویے اور عادتیں اسے ہر حال میں خوش رکھنے کا باعث ہوتی ہیں۔یہ ہی بات ہیکہ جب ہم کسی کو خوش دیکھتے ہیں جواپنے سارے غم بھلا کر پھر سے خوش ہو تو ہم سوچنے پر مجبور ہو جاتے ہیں کہ اس کے پیچھے کیا اور کون سا راز چھپا ہوا ہے۔ ذیل میں کچھ ایسے ہی راز بیان کر رہا ہوں کہ جو آپ کو خوش رہنے میں مدد دے سکتے ہیں۔
۱۔ زندگی میں چاہے خوشی آئے یا غم ہمیشہ اپنے خاک حقیقی کا خلوص کے ساتھ شکر ادا کر کے اس کو خوشی سے قبو ل کیا کرو،
۲۔ لوگوں کی تلخ اور سخت باتو ں پر زیادہ توجہ دینے کے بجائے ان کو معاف کر دیا کرو۔
۳۔ کوئی بھی بے سہار ا او ر مجبور دیکھوں تو اس کی مدد کیا کرو۔ دل کو اندرونی راحت و خوشی نصیب ہو گی۔
۴۔ دوستو ں کے ساتھ تعلقات کو پر جوش بنائیں اور دوستی کو غیر اہم نہ ہونے دیں۔
۵۔ محبت: انسان اکثر کسی دوسرے سے محبت اس قدر کرنے لگتا ہے کہ خود کو نظر انداز کرنے لگتا ہے ، اپنی ذات کے ساتھ محبت کرو، اپنے آپ کو اہم اور خاص شخص بنانے کی کوشش کرو۔
۶۔ کار آمد بننے کی کوشش کریں تاکہ لوگ آپ کو دیر تک یاد کریں۔ مقبول ہونے سے تو وقتی لوگ یا د رکھتے ہیں پھر بھول جاتے ہیں۔
۷۔ “ہاں “۔۔۔”ہاں “۔۔۔”ہاں “۔۔۔!Yes”…”Yes”…”Yes” کہنے کی عام عادت کو کم سے کم کریں اور اپنی ذا ت پر تھوڑا سا رحم کرتے ہوئے تھوڑی دیر کے لیے فری ہو کر اپنی زندگی کو بھی Enjoy کریں۔
۸۔ خوش رہنے والے لوگ کبھی نا امید نہیں ہوتے جو لو گ سب سے زیادہ خوش ہوتے ہیں وہ حالات و واقعات کے مطابق زندگی بسر نہیں کرتے بلکہ وہ چند خاص رویے اپناتے ہیں اور ہر طرح کے حالات و واقعات میں ان رویوں کے مطابق زندگی بسر کرتے ہیں۔
۹۔ سب سے اہم بات کہ کسی بھی ناکامیابی کا ذمہ دار خود اکیلی ذات کو سمجھو اور کسی بھی کامیابی کا ذمہ دار خود کو ٹھہر ا کر زیادہ فخر و غرور میں نہ آیا کرو۔
۱۰۔ خوشی سے معموز زندگی اور بامعنی زندگی میں فرق ہے۔ ژمثال کے طور پر جب کوئی المیہ ہو ، تب خوش رہنا ناممکن ہوتا ہے۔سوال یہ ہے کہ کون لوگ زیادہ لمبی عمر پاتے ہیں اور مسائل ختم ہو جانے کے بعد بہتر انداز میں جیتے ہیں ۔۔۔؟ وہی لوگ لمبی عمر پاتے ہیں جو کوشش کرنے سے لطف اندوز ہوتے ہیں۔
