ہم دونوں خاموش تھے اور ہمارے درمیان نامعلوم سی اداسی رقصاں تھی۔ہمارے سامنے میز پر میڈیکل رپورٹس پڑی ہوئی تھیں جو وہ جوان چند لمحے پہلے ہی لیب سے اٹھا کر لایا تھا۔دس ماہ پہلے یہ جوان ہنستا مسکراتا زندگی کی مسرتوں سے لبریز تھا۔لیکن اب اس کے چہرے پر خاموشی کا جنگل اگا ہوا تھا۔اس کے پاس زندگی کی ہر نعمت ہے وہ نئے ماڈل اور مشہور میک کی گاڑی پر سوار ہو کر مجھ سے ملنے آیا ہوا تھا۔تعلیم وہ مکمل کر چکا تھا اس کی جاب چند دن پہلے تک کافی سے زیادہ مناسب تھی۔سب کچھ اس نے جلد اور بہت آسانی سے حاصل کر لیا تھا۔پھر اس کی زندگی میں ایک دھماکہ ہوا جو اس کے اعصاب کو شل کر گیا۔اس کے اندر مایوسیوں کے تناور درخت اگ آئے۔اس کا دکھ بھی عجیب ہے نہ سمجھا جا سکتا ہے نہ ہی محسوس کیا جا سکتا ہے اس کا دکھ کامن نہیں ہے اس کی شناخت کھو گئی ہے۔اسے کسی نے اچانک بتا دیا کہ تم جن کو اپنا والدیں سمجھتے ہو وہ تمہارے والدین نہیں ہیں۔انہوں نے تمہیں پالا پوسا ضرور ہے مگر تمہارے ساتھ ان کا خون کا رشتہ نہیں ہے۔تم نطفہ حرام ہو۔تم کسی کی ناجائز اولاد ہو ۔کسی کے گناہوں کا بوجھ ہو۔یہ سب معلوم ہونے کے بعد اس نے زندگی کو خود پر حرام قرار دے دیا۔پہلے گھر جا کر منہ بولے والدیں سے خوب لڑا جب لڑ لڑ کر تھک گیا تو خاموشی کی چادر اوڑھ لی۔سگریٹ پینا اور نشہ کرنا شروع کر دیا۔آفس والوں نے پراپر کام نہ کرنے اور اٹینڈنس نہ ہونے کی وجہ سے جاب سے فارغ کر دیا۔زندگی میں کوئی مقصد ہی نہیں رہ گیا تھا۔اس کی کہانی سن کر اور غور کرنے کے بعد مجھے بھی لگا کہ زندگی نے اس کے ساتھ انصاف نہیں کیا۔اس کے منہ بولے والد پولیس انسپکٹر تھے۔ایک دن کچھ لوگ ایک نومولود کو اٹھا کر تھانے لے آئے جو انہیں کسی جگہ کپڑوں میں لپٹاہوا ملا تھا۔انسپکٹر صاحب کو خدا نے اولاد کی نعمت سے محروم رکھا ہوا تھا۔کانسٹیبل نے مشورہ دیا کہ آپ اس بچے کو اپنا لیں ۔آپ کی زندگی میں جو اولاد کی کمی ہے وہ پوری ہو جائے گی۔انسپکٹر صاحب دل کے اچھے انسان تھے۔ انہوں نے اپنی تمام تر کوشش کر کے بچے کو اچھے سے اچھا پڑھایا لکھایا پیار دیا ہر جرورت کو فرض سمجھ کر پورا کیا بچہ ٹیلنٹڈ تھا کامیابی قدم چومتی گئی۔جب سب کچھ حاصل کر لیا تو بلا وجہ سچ بول کر فساد پھیلانے والوں نے اس گھرانے کی خوشیاں برباد کر دیں ۔اب اس نوجوان کے لبوں پر ایک ہی سوال تھا کہ میں کون ہوں۔میرے ماں باپ کون تھے۔میں ان کو کیسے اور کہاں دھونڈوں اور کب تک ڈھونڈتا پھروں۔انہوں نے میرے ساتھ ایسا کیوں کیا ۔میں حرام کا لیبل ماتھے پر چپکا کر کب تک اور کس کے لئے جیوں ۔اس کے سوال نہیں دکھ بھرے انگارے ہیں۔ہم میں سے کسی کے ساتھ اگر اچانک یہ حادثہ پیش آجائے کہ ہماری شناخت کھو جائے تو خود سوچیں ہماری حالت شاید اس جوان سے بھی بدتر ہو۔انسپکٹر صاحب اور ان کی بوڑھی بیوی الگ صدمے سے دوچار ہیں۔ان کو اپنا قصور پتا نہیں چل رہا۔پہلے اولاد کی نعمت سے محروم رہے۔اولاد ملی تو دل و جان سے پیار نچھاور کر کے پالا پوسا بڑا کیا بڑھاپے نے شکنجے میں کسنا شروع کیا ابھی وہ جوان بیٹے کا سہارا لینے کے لئے ہاتھ تھامنے کا سوچ ہی رہے تھے کہ کسی نے جھوٹ سے بھی بد تر سچ بول کر ان کا سہارا چھین لیا۔اس نوجوان کا خیال تھا کہ اس کا دکھ دنیا کا سب سے بڑا دکھ ہے ۔میں نے اس کے کندھے پر ہاتھ رکھا کہ یار ایک بار شیخ سعدی ننگے پاؤں جوتی سے محروم جا رہے تھے ۔خدا سے شکوہ کیا کہ یا باری تعالی ننگے پاؤں ہوں سامنے کیا دیکھتے ہیں ایک شخص نظر آیا جس کے پاؤں ہی نہیں تھے ۔تمام شکوے دور ہو گئے۔نوجوان نے میری طرف دیکھا میں نے اسے بتایا کہ یار چلو منہ بولے ہی سہی تمہارے پاس پیار کرنے والے ماں باپ تو ہیں۔کئی لوگ ایسے بھی ہیں جن کے ماں باپ زندگی کا کھیل شروع ہوتے ہی بچھڑ گئے۔کئی ایسے بھی ہیں کہ جن کے ماں باپ کو ان کی ذرا برابر پرواہ نہیں بچوں سے بیگانہ اپنی دنیاؤں میں مگن ہیں۔اگر ہر کوئی تمہاری طرح زندگی کا میدان خالی چھوڑ کر دکھوں کی بانسری بجانے لگ جائے تو ہر طرف قیامت سے پہلے ہی قیامت برپا ہو جائے۔خدا نے تمہیں ہر طرح کی نعمت سے نوازا ہے ایک ذرا سا سچ سن کر تم نے ہتھیار ڈال دئیے۔اس سچ کی آنکھوں میں آنکھیں ڈال کر زندگی کے سامنے سینہ سپر ہو جاؤ۔خدا کی نعمتوں کا شمار کرو اور پھر شکر ادا کرنا شروع کر دو۔جوان کو تو میں نے جیسے تیسے لفظوں کی جنگ میں الجھا کر زندگی کے محاذ پر دوبارہ لڑنے کے لئے بھیج دیا ۔آپ سب لوگوں سے بھی التماس ہے کہ کسی کے گناہوں کی سزا کسی کو مت دیں ۔لوگ ایدھی ہومز سے بشے اس لئے Adopt نہیں کرتے کہ یہ بچے حرام کے ہوتے ہیں ۔بچے تو صرف معصوم ہوتے ہیں ۔ہماری سوچ میں گندے جراثیم ہوتے ہیں جو ہمیں ان کے سر پر ہاتھ رکھنے سے روکتے ہیں۔اگر کوئی ایسے کسی بچے کو لے کر پال لے تو ہم اس کوشش میں جٹ جاتے ہیں کہ کب یہ شعور کی منذل پر قدم رکھے اور کب ہم اس پر اپنی بیہودہ اور گھٹیا انفارمیشن کی بدبودار دنیا مسلط کریں۔ایدھی صاحب کہاں تک اپنا فرض نبھائیں۔یہ ان لاوارث بچوں کے سر پر سایہ تو ارینج کر سکتے ہیں لیکن یہ ان کی شناخت چھیننے والوں کے منہ نہیں بند کر سکتے۔ایسی کئی کہانیاں ہمارے ارد گرد بکھری ہیں۔کسی کے ہاں اولاد نہیں تو بھائی نے رحم کھا کر اپنا بچہ بھائی کو تحفے میں دے دیا۔دیالو بھائی کا کیا دیالو پن بچہ تمام زندگی بھگتتا رہتا ہے۔کیسا ظلم ہے کہ آپ بچے کے لئے اس کے تمام رشتے بدل دیں ۔اس کی ماں کو اس کی چچی بنا دیں باپ کو چچا بھائیوں کو کزنز بنا دیں ۔آپ کی ذرا سی وقتی محبت اور جذباتی پن کی وجہ سے آپ کے اپنے لخت جگر کی زندگی عذاب بن جاتی ہے۔یہ خدا کے قانون اور تقسیم میں بھی مداخلت ہے۔خدا جسے اولاد کی نعمت سے محروم رکھے جسے چاہے نوازے یہ اس کا اپنا فیصلہ اور تقسیم ہے۔ہم کون ہوتے ہیں اس کی تقسیم میں ردوبدل کرنے والے۔ہمیں کوئی حق نہیں کسی کی شناخت چھیننے کا ۔اور جو میرے دوست سوچوں کے بھنور میں پھنسے اپنی شناخت ڈھونڈ رہے ہیں ان سے عرض ہے کہ ہم کون ہیں اس جواب کا حتمی اختیار صرف اور صرف ہمارے پاس ہے۔ہمارا ماضی ہمارے حال یا مستقبل کا فیصلہ نہیں کرتا ۔مستقبل کا فیصلہ تو ہماری جدوجہد اور ہماری شناخت کرتی ہے۔آج ہی بھر پور جوش و خروش سے اپنی شناخت کا اعلان کیجئے ۔نئی چناخت کو خوشآمدید کہئیے اور پرانی شناخت کو گیٹ سے باہر پھینکوا دیجئے۔حضرت علیؓ فرماتے ہیں”جس نے اپنی قدر نہ جانی تو دوسرے بھی اس کی قدر نہیں کریں گے۔”
