ہم فاروق آباد اَپ ڈیٹس کی پہلی سالگرہ پر مبارکباد دیتے ہیں ایک سال کے انتہائی مختصر عرصے میں فاروق آباد اپ ڈیٹس نے جس طرح اپنی پہچان بنائی ہے وہ قابلِ ستائش ہے۔ میڈیا کی سرعت انگیز مسابقت میں اپنی جگہ بنانا جوئے شیر لانے کے مترادف ہے لیکن فاروق آباد اَپ ڈیٹس نے جس طرح اپنے عزمِ مصمم سے اپنا وجود منوایا ہے وہ حیرت انگیزبھی ہے اور قابلِ رشک بھی ہے۔ کامیابیوں کے جھومر کو اپنی پیشانی پرسجانے کے اس یادگار لمحے میں ڈاکٹر ایم اے قیصر ؔ کی کاوشوں کی تعریف نہ کرنا حقائق سے چشم پوشی ہوگی۔سچ تو یہ ہے کہ یہ میرے دوست کی محنت،لگن اور خلوص کا کمال ہے کہ فاروق آباد اَپ ڈیٹس ہر جگہ اپنی مقبولیت کے جھنڈے گاڑ ھ رہا ہے۔ میرے کالم پچھلے ایک سال سے لگاتار فاروق آباد اَپ ڈیٹس کی زینت بن رہے ہیں لیکن مجھے یاد نہیں پڑتا کہ کبھی میرا کالم تاخیر کا شکار ہوا ہو۔میرے کالم کو چھاپنے کا اعزاز سب سے پہلے جس ویب سائٹ کے حصے میں آتا ہے وہ فاروق آباد اَپ ڈیٹس ہے۔ میری جانب سے کالم بھیجے جانے کے فورا بعد وہ کالم فاروق آباد اَپ ڈیٹس کی پیشانی پر جگمگ جگمگ کر رہا ہوتا ہے اور کارکردگی کا یہی معیار فاروق آباد اَپ ڈیٹس کی مقبولیت کی بنیاد ہے جس تک پہنچنا دوسروں کیلئے آسان نہیں ہے۔ کامیابی کے اس سفر میں فاروق آباد اَپ ڈیٹس کی اِنتظامیہ کو مبارک باد نہ دینا بخیلی ہو گی کیونکہ اِنتظامیہ کی دلچسپی اور سرپرستی کے بغیر اِس طرح کی کامیابی کو اپنی جھولی میں ڈالنا ممکن نہیں ہوتا۔ اِس اہم موڑ پر میری نیک تمنائیں فاروق آباد اَپ ڈیٹس کے ساتھ ہیں لہذا میری دعا ہے کہ فاروق آباد اَپ ڈیٹس کامیابی کی جانب اپنا موجودہ سفر نئے جذبوں اور نئی امنگوں کے ساتھ جاری و ساری رکھے اور صحافت میں مثبت رحجانات کی آبیاری کرے۔آمین!

مولانا محمدصدیق مدنی (کالمسٹ)۔
مرکزی صدر شمشاد رائٹرز فورم پاکستان، چمن

QR Code: