واہ کیامنافقت ہے دھرناختم کرنے والا بھی وضاحتیں پیش کرتا پھر رہا ہے اور وزیراعظم صاحب بھی اپنے لاڈلوں کو چپ رہنے کی تلقین اور بیان بازی سے روکتے نظر آرہے ہیں۔ ڈیل کی خبریں گرم ہیں ۔ آنے والا وقت پہلے بھی ثابت کر چکا ہے کہ ڈیل کے نتیجہ میں ہی جان خلاصی ملتی ہے وہ بھلے میاں صاحب کا ملک سے جدہ فرار تھا یا بی بی محترمہ کی ملک آمد۔ اور یہ بھی دلچسپ بات ہوتی ہے کہ وقت کے ساتھ ساتھ ایسی شرمناک ڈیلیں وقت کی ضرورت اور قابل فخرکارنامہ قرار دے دی جاتی ہیں ۔ ہوسکتا کہ چند سال بعد دھرنے کے خاتمہ کے بطن سے بھی ایسی ہی کوئی ڈیل برآمد ہوجائے لیکن کیافرق پڑے گا ۔ پھر سے وہی بے شرمی اور ڈھیٹ پن سے ملک کے وسیع تر مفاد کی خاطر ہر کالک کو سفیدی قرار دے دیا جائیگا۔ کیابرآمد ہوگا اس کا فیصلہ تو آنے والا وقت ہی کرے گا ۔ موضوع بحث یہ ہے کہ جو دونوں دھرنا پارٹیوں کے موقف تھے وہ کیا جائز تھے اور کیا کسی حکومتی عہدیدار نے موقف تسلیم کئے اور ریلیف دیا گیا جواب بھی کچھ خاصا چھپا ہوا نہیں ہے کہ قادری صاحب اپنے بندوں کے خون کا بدلہ لینے کے لئے روانہ ہوئے تھے الٹا مزید جانوں کی قربانی دے کر واپس لوٹ رہے ہیں ۔ یعنی کے ہزاروں کی تعداد میں افراد دارالخلافہ میں اکٹھے کرنے کے باوجود ان کا انصاف کے حصول کا خواب ادھورا ہی رہا ۔ اگر دھرنے کے بعد ان کو انصاف مل جاتا چلو پولیس والے ہی گرفتار ہوکر سپیڈی ٹرائل کے ذریعے اپنے انجام کو پہنچ جاتے تب بھی بات کچھ اور ہوتی چلیں یہ نا سہی کم از کم واقعہ کے ذمہ داروں کا تعین ہی ہوجاتا ۔ ایک کاغذی کاروائی ضرور ہوئی اور وہ تھا ایف آئی آر کا اندراج۔ اس کے بعد کے باقی سٹپ کیوں نہ مکمل کئے گئے اس راز پر سے بھی آنے والا وقت ہی پردہ اٹھائے گا ۔گویا اب اس ملک میں انصاف کے حصول کے لئے بھلے ہی کوئی ہزاروں افراد کا اجتماع اکٹھا کرکے ملک جام کردے معیشیت کا جتنا بھی نقصان کردے سب نقصان برداشت ۔لیکن نہ تو کوئی کرسی کی قربانی دے گا اور نہ ہی انصاف دے گا۔ یہ وہ کرسی بچاؤ مہم تھی جس کے لئے ساری پارلیمنٹ اکھٹی ہوئی تھی ۔ واہ کیا کارنامہ انجام دیا تمام پارلیامنٹرینز نے سب کو بائیس توپوں کی سلامی کا حق بنتا ہے۔ رل تو وہ بیچارے گئے کہ جو اب کسی کو بتائیں تو کیا بتائیں کہ ان کے پیارے دو بیرئیر ز کی خاطر جان کی بازی ہارگئے۔ کیا ان کے خون کے ساتھ انصاف یہ ہوگا کہ عوامی تحریک ہر طرح کے الیکشن لڑنے کا اعلان کردے ۔ پورے ملک میں جلسے جلوس کرنے کی بجائے یہ لوگ جہاں براجمان تھے وہ احتجاج ریکارڈ کرانے کی سب سے فٹ جگہ تھی ۔ اگراس جگہ بیٹھ کر انصاف نہیں ملا تو شائد ملک کے چپے چپے میں جلسے کرلینے دھرنے دینے کے باوجودبھی انصاف نہیں ملے گا۔ رہی بات لین دین کی تو وہ کبھی چھپا نہیں کرتے ۔ جلد یا بدیر سب کچھ منظر عام پر آجائے گا اس دوران جن کو جگہ جگہ احتجاج کرکے رل رل کرعوام نے اس آس پر آزادی اور بحالی دلائی تھی کہ وہ ان کو انصاف دینگے بس خاموش بنے اپنے جانے کے راستے کے کلیئر ہونے کے بارے میں فکر مند رہے یا عمارتوں سے کوسوں دور ٹنگے چند زیر جامے انہیں بے جان عمارتوں کی توہین محسوس ہوتے رہے ۔ سیاسی جماعتیں دھرنے کے ختم ہونے پر شکر کا سانس لے رہی ہیں ۔ کہ چلو پھر سے آکسیجن بحال ہوئی لوٹ مار کا کھیل ذرا اور چل سکے گا ۔لیکن اس دھرنے نے ایک بار ضروردی اور وہ تھا شعور۔ جس طرح تمام چور پارلیمنٹ کے اجلاسوں کے نام پر اکٹھے ہوئے عوام کی اکثریت اب دل سے اس بات کی قائل ہوچکی ہے کہ اس پارلیمنٹ ہاؤس نام کی بلڈنگ کے اندر جانے والے ان کے نہیں بلکہ اپنی کرسیوں اپنے اقتدار اپنے پیٹی بھائیوں کے خیر خواہ اور رکھوالے ہیں ۔کسی ایک نے یہ آواز نہیں اٹھائی کہ کیا اب انصاف لینے کے لئے دھرنے دینا پڑیں گے ۔ معذرت کے ساتھ اس جمہوریت سے تو وہ جنرل مشرف کی آمریت لاکھ گنا اچھی تھی کہ جس نے جلسے جلوسوں کے بعد سپریم کورٹ کا چیف جسٹس کی بحالی کا حکم نامہ تسلیم تو کرلیا تھا ۔ یہ ڈھیٹ جمہوریے تو عوامی دباؤ کو چند ہزار افراد قرار دے کر مسترد کردیتے ہیں ۔ کوئی ان سے پوچھے کہ چیف جسٹس صاحب کی بحالی کے دوران وکلاء اور سول سوسائٹی کے افراد کی ایک بڑی تعداد میں کتنے لوگ شامل ہوا کرتے تھے وہ تمام وڈیو کلپ بھی میڈیا کے ریکارڈ میں محفوظ ہیں ۔ ان کا موازنہ کرکے دیکھ لیں موجودہ تحریک انصاف اور قادری صاحب کے جلسوں اور دھرنا کے شرکاء کی تعداد کے ساتھ ۔ اس کے بعد اگر ضمیر نام کی کوئی چیز ہے تو اس کا عرق نکال کر ہی اس میں ڈوب مریں ۔ ہمیں یہ مان لینا چاہیے کہ جمہوری ادوار نے اس ملک کا عجیب طرح سے تماشہ بنایا ہے اسی وجہ سے آج مشرف صاحب کو بھی دھڑلے سے بیانات داغنے کی جرات ہورہی ہے ۔ ہر سیاسی لیڈر اور ہر سیاسی پارٹی بری طرح ایکسپوز ہوتی جارہی ہے ۔ اقتدار کی ہوس اگر گناہ ہے تو اس گناہ میں میاں صاحب اور زرداری صاحب بھی مشرف صاحب کی طر ح برابر کے شریک ہیں ۔ دنیا جہان کا گند اپنے چہروں پہ مل لینے کے بعد ایک ہی فقرہ بچتا ہے ہر سیاست دان کے پاس کہ جمہوریت ہی ہماری بقا ہے ۔ اگر جنرل صاحب نے ن لیگی بھگوڑوں کو اکٹھا کرکے ق لیگ نامی پارٹی بنا کر جمہوریت کا ڈھونگ رچانے کی کوشش نہ کی ہوتی تو مجھے یقین ہے کہ وہ آج بھی اس ملک پر حکومت کر رہے ہوتے ۔ ماضی پر نظر دوڑائیں تو ہماری تاریخ کا ہر آمر اسی خواہش کی موت مرا کہ کسی طرح خود کو عوامی لیڈر ثابت کردوں ۔ اس خواہش کی تکمیل کے لئے اسے سب سے پہلے سیاسی گند اپنی جھولی میں بھرنا پڑا ۔ اس کے بعد نہ وہ آمر رہا نہ ہی جمہوری عوامی لیڈر ۔ سیاسی لوٹوں کا کیا تھا وہ ق لیگ سے نکلے تو پھر سے ن لیگ ،پی پی اور پی ٹی آئی میں جا گھسے ۔ آج ہوا کا رخ بدل رہا ہے تو پھر سے ان لوٹوں کے تیور بھی بدل رہے ہیں ۔ یہ پھر سے پرانے گھونسلوں کو چھوڑنے کے لئے پر تول رہے ہیں ۔ سب کو چھوڑیں جسے آپ محسن جمہوریت کہتے نہیں تھک رہے ذرا ان کی حرکتوں پر ہی غور فرما لیں ۔ موصوف الیکشن کی آخری رات بیا ن دے رہے تھے کہ میرے پی ٹی آئی کے دوستوں مجھے ووٹ ڈالنا میں آزاد امیدوار ہی رہونگا ۔ ن لیگ میں شامل نہیں ہونگا ۔ اصول نام کے لفظ سے ہمارے سیاستدان آشنا ہی نہیں ان کے نزدیک کرسی ہی واحد حقیقت ہے ۔ تاریخ گواہ ہے کہ کرسی نے آج تک کسی کے ساتھ وفا نہیں کی ۔جانے کب تک ہم بونوں کو ان قدآور کرسیوں کی زینت بناتے رہیں گے ۔ رہے عوام تو ان کو اپنے دن پھرنے کی امید چھوڑ کر بجلی کے بلوں کو بھرنے کی فکر میں اپنی تمام فکریں اور کوششیں صرف کرنی چاہییں کیونکہ یہی ان کا بے چاروں کامقدر ہے ۔
