تحریر: پروفیسر محمد عبداللہ بھٹی
حاجی شفیع محمد حج کرنے کے بعد تبرکات کے ساتھ مُجھ سے ملنے آئے تو چہرے پر سفید داڑھی مبارک کا اضافہ دیکھ کر مجھے بہت خوشی ہو ئی ویسے تو داڑھی ہر چہرے پر بہت سجتی ہے لیکن کچھ چہروں پر تو بہت ہی نورانی روپ میں روشن ہو تی ہے حاجی شفیع محمد بھی اُن خوش قسمت لوگوں میں شامل تھا جس کو اللہ تعالی نے زندگی میں ہی توبہ کی تو فیق دی پھر حج اور حج سے واپسی پر سنت رسول ﷺ کا تحفہ لے کر مجھے بہت خوشی ہو ئی حاجی صاحب نے مختلف قسم کی لذیذ کھجوریں آب زم زم ٹوپی اور نرم گداز جائے نماز کے ساتھ حاضر تھے حاجی صاحب میرے پسندیدہ لوگوں میں شامل تھے ایسے انسان جن سے مل کر پاس بیٹھ کر باتیں کر کے عجیب باطنی روحانی حقیقی خوشی کا احساس ہو تاہے۔ مُردوں کے اِس بانجھ معاشرے میں چند ہی حاجی صاحب جیسے زندہ انسان موجود ہیں جن سے مل کر آپ کو احساس ہو تا ہے آپ کسی زندہ انسان سے ملے ہیں ورنہ ہمارا معاشرہ اور لوگ جانوروں کا روپ دھار چکے ہیں ہر بندہ شکاری ہے جو اپنی مچان پر تیر سجائے بیٹھا ہے جیسے ہی کوئی مجبور اُس کی زد میں آتا ہے بیچارہ شکار ہو جاتا ہے حاجی صاحب یہ اس پوزیشن مقام پر تھے کہ روز انہ جتنے انسانوں کا چاہے شکار کر تے ان کا قیمہ بناتے طاقت اختیار عہدہ اِن کے پاس تھا جس کا ظالمانہ استعمال کر کے یہ دولت کے ڈھیر میں اضافہ اور وسیع و عریض جائیداد بنا سکتے تھے لیکن من کے اندر دبی ایمان کی چنگاری کام کر گئی اوریہ صراط مستقیم پر آگئے میری حاجی صاحب سے چند سال پہلے ایک پو لیس سٹیشن میں ہوئی مُجھ جیسے شریف لوگوں کا پولیس تھانے سے کوئی تعلق نہیں تھا لیکن میرے مرحوم دوست کے بیٹے کو اہل محلہ نے بے گناہ تھانے میں بند کر وایا تو بھابھی نے مدد کے لیے مجھے فون کیا تو میں ایک بااثر دوست کے ساتھ متعلقہ پولیس اسٹیشن پہنچا ہم وہاں پر پیسے دینے کو تیار تھے کیونکہ پاکستان پولیس کلچر سے کون واقف نہیں ہے اِن کے مزاج کا اندازہ اِس بات سے لگا لیں کہ میرے ایک بہت بڑے پولیس آفیسرسے باتوں میں جب پولیس تفشیشی افسران کی بات ہوئی تو وہ کہنے لگے میرے گھر چوری ہو گئی تو میں نے اپنے کیس کے لیے تفتیشی افسر کو رشوت بھجوائی کیونکہ پاکستان میں پولیس اور پھر تفتیشی افسران بغیر پیسے کے ایک لفظ بھی نہیں لکھتے اِن سے انصاف کے لیے بھی پیسے دینے پڑتے ہیں لہذا میں مرحوم دوست کے بیٹے کو آزاد کروانے کے لیے بیوہ عورت کے آرام کے لیے یہ کڑوا گھونٹ پینے کو تیار تھا بڑی مشکل سے حاجی صاحب سے ملاقات ہوئی اوپر سے تھانہ کلچر باتوں کے دوران میں نے کہا صاحب جی یہ میرا ذاتی کیس نہیں ہے مرحوم دوست کا یتیم بیٹا ہے اُس کی مدد اور خوف خدا کے تحت آیا ہوں مرحوم اور یتیم کا ذکر سن کر شفیع صاحب الرٹ متوجہ ہو گئے ہماری بات دھیان سے سنی پھر کہا آج کے بعد آپ بے فکر ہو کر جائیں میں آج رات ہی حق کا فیصلہ کروں گا اب آپ کو اِس کیس کے سلسلے میں سفارش یا رشوت دینے کی بلکل بھی ضرورت نہیں ہے پھر واپسی پر میرے دوست نے جب رشوت کے پیسے دینے کی کو شش کی تو شفیع محمد نے سختی سے انکار کر دیا اور کہا میں اتنا ظالم خود غرض بھی نہیں ہوں کہ یتیم کے پیسے کھاؤں آپ بے فکر ہو کر گھر جائیں اگر آپ کا لڑکا بے قصور ہے تو کل گھر آجائے گا ہم بے یقینی کے عالم میں واپس آگئے لیکن حیرت اُ س وقت ہوئی جب رات کو ہی لڑکا واپس گھر آگیا اگلے دن میں مٹھائی لے کر شفیع محمد کے پاس پہنچا تاکہ شکریہ بھی ادا کر وں تو شفیع محمد بولا پروفیسر صاحب آپ کل ٹھیک کہہ رہے تھے آپ کے دوست کا بیٹا واقعی ہی بے قصور ہے مخالف پارٹی کا بہت پریشر پیسے کی آفر بھی تھی لیکن اللہ کو جان دینی ہے جیسے ہی مجھے یقین ہوا کہ آپ کا لڑکا بے قصور ہے میں نے رات کو ہی اُس کو چھوڑ دیا ہم لوگ شکریہ اور اچھی یاد لے کر واپس آگئے یہ میرا حاجی شفیع سے پہلا تعارف تھا حاجی صاحب کو جب پتہ چلا میں روحانی علاج کر تا ہوں ذکر اذکار بتاتا ہوں تو اپنی بھابی بھائی اور بیوی کو لے کر میرے پاس آئے میں نے روحانی وظائف بتائے اللہ نے برکت ڈال دی تو حاجی صاحب اور میرے تعلقات کا آغاز ہو گیا اب حاجی صاحب بچوں خاندان کے کسی مسئلے پر میرے پاس چکر لگا جاتے میں نے ایک دن حاجی صاحب سے پوچھا آپ سب سے رشوت نہیں لیتے تو شرمندہ ہو کر بولے صرف بیوہ اور یتیم سے نہیں لیتا کیونکہ میں بچپن میں ہی یتیم ہو گا اِس لیے بیوگی اور یتیمی کے درد سے واقف ہوں میں جس محکمے میں کام کر تا ہوں وہاں رشوت کے بغیر گزارہ نہیں اِس لیے میں بھی عام لوگوں سے لیتا ہوں لیکن جہاں مجھے پتہ چلے بیوہ یا یتیم ہے تو میں ایک روپیہ بھی نہیں لیتا اس بات کی تصدیق بعد میں مختلف لوگوں سے بھی ہوئی حاجی صاحب کے دل میں ایمان اور خوف خدا کی چنگاری سلگ رہی تھی جو وہ یتیم اور بیوہ کے نام پر لرز جاتے تھے اِس نیکی اور خوف خدا کی وجہ سے میں حاجی صاحب کو پسند کرتا تھا دو سال پہلے اچانک حاجی صاحب کہنے لگے اب میں نوکری چھوڑنے لگا ہوں تو میں نے حیران ہو کر کہا حاجی صاحب نوکری چھوڑ کر کیا کریں گے تو بولے بڑے بیٹے نے ماموں کے ساتھ ہوٹل کا کام شروع کیا جو بہت چل گیا تو اب ماموں کی اجازت سے نئی برانچ میرے بیٹے کو کھول دی ہے وہ ہماری ہے جو خوب چل پڑی ہے تو بیٹے نے مجھے کہا اباجان اب آپ کو رشوت والی نوکری کرنے کی بلکل بھی ضرورت نہیں ہے لہذ ا میں نے نوکری چھوڑ دی اب ہوٹل پر جاتا ہوں دل میں شرمندگی رشوت کی تھی وہ بھی ختم ہو گئی اِس سال حاجی صاحب حج کرنے کے بعد میرے پاس آئے تو سنت رسول ﷺ کا تحفہ لے کر میں نے حاجی صاحب کی شخصیت کا مطالعہ غور کیا تو یہ حقیقت سامنے آئی کہ آپ اگر زندگی میں ایک نیکی چھوٹی سی اچھی بات پکڑ لیں تو اللہ کی برکت سے ایک دن وہ چنگاری آگ کا بھانبھڑ بن کر کے آپ کی ساری کثافت کو لطافت میں اِس طرح ڈھال دے گی جس طرح تانبے کو آگ کندن بنا کر ساری کثافت صاف کر کے سونا بنا دیتی ہے ہمیں اپنے اندر جھانکنے کی ضرورت ہے کیا ہمارے اندر نیکی اچھائی کی کوئی چھوٹی سی چنگاری موجود ہے۔
