تحریر: عرفان صفدر دھوتھڑ
ٹیلی ویژن پر دو معصوم بچوں کی ہلاکت کے واقعہ کی خبر سنی تو دل دہل کے رہ گیا کراچی میں پیش آنے والے اس واقعے نے ایک درد ناک منظر کی تصویر کشی کی واقعے کے مطابق دونوں بچوں کی ہلاکت زہریلا کھاناکھانے کی وجہ سے ہوئی ۔ سوال یہ پیدا ہوتا ہے کہ کراچی جو پاکستان کا سب سے بڑا شہر ہے جس کی آبادی تقریبا دو کروڑ نفوس کے قریب ہے وہاں کے پوش ایریا میں اس جیسے واقع کا پیش آنا بہت سارے سوالات کو جنم دے رہا ہے ۔ابتدائی رپورٹ کے مطابق جب اس ریسٹورنٹ پر چھاپہ مارا گیا تو انتہائی مضر صحت گوشت کے پائے جانے کا انکشاف ہوا جہاں پر وہ گوشت موجود تھا جو 2014 ء میں امپورٹ کیا گیا تھا اور وہ 2015ء میں Expireہو چکا تھا پھر بھی اس زائدالمعیاد گوشت کاتین سال بعد بھی وہاں موجود ہونا خود اپنے اندر بہت سارے سوال سموئے ہوئے تھا ۔اس تہلکہ خیز انکشاف کے بعد جس کو کروڑوں ناظرین نے اپنے ٹیلیویژن کی سکرین پر دیکھا تو ہر آنکھ اشکبار تھی وہ معصوم بچے جس ماں کے لخت جگر تھے اس ماں پر کیا قیامت ٹوٹی ہوگی وہ کیا رقت آمیز مناظر ہونگے جب ایک باپ نے اپنے دو معصوم بچوں کو قبر کی آغوش میں سلایا ہو گا ہزاروں سوگواروں کی موجودگی میں ان بچوں کو سپرد خاک کر دیا گیا لیکن یہ سانحہ اپنے پیچھے بہت سارے سوالات چھوڑ گیا ۔ کیا ہمارے حکمرانوں نے مضر صحت کھانوں کی روک تھام کے لئے کوئی پلاننگ نہیں کی ہوئی ؟فوڈ اتھارٹی کا ادارہ کس مقصد کے لئے کام کر رہا ہے ؟کراچی جو پاکستان کا بہت بڑا شہر ہے وہاں کے پوش ایریا کے وسطی علاقے میں بنے اس ریسٹورنٹ میں اس واقع کا وقوع پذیر ہونا حکمرانوں کی حکومت پر سوالیہ نشان ہے ۔ اس واقعے کی بازگشت سندھ اسمبلی کے ایوان میں بھی سنائی دی گئی جہاں فنگشنل لیگ کی راہنما نصرت سحر عباسی نے نا صرف اس واقعے کی شدید الفاظ میں مذمت کی بلکہ حکمرانوں کی کارکردگی کا پول بھی کھول کر رکھ دیا انہوں نے کہا کہ پیپلز پارٹی کی گورنمنٹ نے اپنے پچھلے دس سالہ دور اقتدار میں کچھ نہیں کیا اس کا واضح ثبوت یہ ہے کہ سندھ میں کوئی فرانزک لیبارٹری موجود ہی نہیں ہے جہاں سے ٹیسٹ کروائے جا سکیں ۔ سندھ حکومت نے اس کے اوپر کوئی حکمت عملی نہیں بنائی با امر مجبوری فرانزک ٹیسٹ لاہور بجھوائے گئے تاکہ واقعے کی فرانزک ٹیسٹ رپورٹ حاصل کی جا سکے ۔سوال یہ پیدا ہوتا ہے کہ سندھ فوڈ اتھارٹی کا محکمہ کیا کام کر رہا ہے ؟ اس کی کارکردگی کیا ہے ؟اگر وہ اپنا کام نہیں کر سکتے تو سندھ حکومت اس محکمے کو بند کر دے خوامخواہ حکومتی خزانے پر اضافی بوجھ ہے ۔ اس واقعے کے بعد کراچی میں والدین اپنے بچوں کو کسی اچھے ریسٹورنٹ میں کھانا کھلانے سے گھبرا رہے ہیں ان کا کہنا ہے کہ اچھے ریسٹورنٹ میں یہ حال ہے تو ہم اپنے بچوں کی زندگیوں سے نہیں کھیل سکتے ۔حکومت اور اپوزیشن کا دشنام ترازی کا سلسلہ تو ہم روز دیکھتے اور سنتے رہتے ہیں لفظی جنگ کی بمباری کا ایک نہ ختم ہونے والا سلسلہ ہر روز ایوان کی زینت بنا ہوا ہوتا ہے اپوزیشن حکومت کی کارکردگی پر تنقید کرتی ہوئی دکھائی دیتی ہے اور حکومت اپوزیشن کی پچھلے دور کی کرپشن کا ذکر کر رہی ہوتی ہے ۔روز ایوان مچھلی منڈی کا سما پیش کر رہا ہوتا ہے تمام پارٹیاں یہ ثابت کرنے کی کوشش کرتی ہیں کہ وہ عوام کے لئے اچھی ہیں انہوں نے اچھے کام کئے ہیں تنقید برائے تنقید کاایک نہ ختم ہونے والا سلسلہ اسمبلیوں میں گونجتا رہتا ہے ۔ بحیثیت ایک عام شہری کے میرا یہ فرض بنتا ہے کہ میں اپنے عوامی نمائندوں جو ہزاروں نہیں بلکہ لاکھوں ووٹ لے کر اسمبلیوں میں جاتے ہیں کیا انکا کام صرف الزام کی سیاست کرنا ہے عوامی مسائل کی نشاندہی پھر کون کرے گا ؟ عوام کس سے اپنے مسائل کے حل کے بارے میں پوچھیں گے ؟ ضرورت اس امر کی ہے کہ تنقید برائے تنقید کا یہ سلسلہ اب ختم ہونا چاہئے تنقید برائے اصلاح اور تاکید ہونی چاہئے اور کراچی میں جو واقع پیش آیا ہے اس کے سد باب کے لئے کوئی حکمت عملی بنانی چاہئے اس کے اوپر قانون سازی ہونی چاہئے تاکہ اس طرح کے مزید واقعات منظر عام پر نہ آئیں کسی اور ماں کی گود نہ اجڑے کسی اور باپ کو اپنے جگر کے ٹکڑوں سے محروم نہ ہونا پڑے اولاد کے دکھ کو ماں ،باپ کے علاوہ کوئی نہیں سمجھ سکتا ۔پچھلے دور حکومت میں پنجاب فوڈ اتھارٹی کی دبنگ آفیسر عائشہ ممتاز کا ذکر کرنا چاہوں گا جنہوں نے اس محکمے کی کارکردگی کو بہتر بنانے کے لئے اپنا بھرپور کردار ادا کیا کسی حکومتی پریشر کو خاطر میں نہ لاتے ہوئے بہت سے دلیرانہ فیصلے کئے موقع پر ایسے ریسٹورنٹ جہاں مضر صحت اشیاء سرعام فروخت ہو رہی تھیں نہ صرف انہیں سیل کروایا بلکہ ان کے خلاف قانونی چارہ جوئی بھی کی لیکن شائید اس وقت کی حکومت کو ان کے یہ اقدام اور فیصلے پسند نہ آئے تو انکو اس محکمے سے ہٹا دیا کیونکہ محترمہ عائشہ ممتاز نے بہت سارے مافیہ کو بے نقاب کر دیا تھا اس صلے میں انہیں منظر سے ہی ہٹا دیا گیا ۔ اولاد کے دنیا میں آتے ہی والدین انکے مستقبل کے سہانے خواب آنکھوں میں سجانے لگتے ہیں گزرتے وقت کے ساتھ انکی اولاد سے امیدیں بڑھنے لگتی ہیں کراچی کے دو معصوم والدین نے بھی اپنے بچوں کے مستقبل کے سہانے سپنے دیکھے ہونگے کیسی کیسی امیدیں ان سے وابستہ کر رکھی ہونگی جن کو ٹوٹنے میں ایک پل بھی نہ لگامضر صحت کھانا انکی ہلاکت کا موجب بنا بچے تو اس دنیائے فانی سے چلے گئے لیکن ان کے والدین حکومت وقت سے یہ سوال کرتے ہیں کہ وہ اپنے بچوں کے لہو کا حساب کس سے مانگیں ۔دیکھنا یہ ہے کہ کیا حکومت اس واقعے سے کوئی عملی سبق سیکھے گی ایسے ریسٹورنٹ جہاں پہ ایکسپائرڈ کھانے کی کھلے عام ترسیل جاری ہے انکے خلاف قانونی چارہ جوئی کرتی ہے یا نہیں یا اس مرتبہ پھر مضبوط مافیہ بچ نکلے گا اور یہ واقع چند دن خبروں کی زینت رہنے کے بعد ماضی کا حصہ بن جائے گا ؟
