تحریر۔طلحہ عظیمی،لاہور
گزشتہ کچھ دنوں سے دو معروف کالم نگاروں کے درمیان ایک غیر صحافتی جنگ شروع ہے جسے “صحافتی جنگ”کا ٹائٹل عطا فرما کر بہت سے رائٹرزاورصحافیوں کو بھی اس میں ملوث کرلیا گیا ہے۔ایک طرف سے دلائل میں اتنا جنون اور جوش ہے جتناعمران خان کی تقاریر میں وزیر اعظم سے استعفیٰ کے مطالبہ پر تھا جبکہ دوسری طرف مکمل خاموشی، کچھ ایسی خاموشی جو طوفان سے پہلے ہوا کرتی ہے۔ اب اس یکطرفہ جنگ کا دائرہ بڑھتے بڑھتے اخبارات کے ایڈیٹرز تک جا پہنچا ہے تو مجبوراً کالم نگار نہ ہوتے ہوئے بھی راقم الحروف کو کچھ نہ کچھ لکھنا پڑا۔
دونوں فریق کافی معتبر اور معروف ہیں اس لئے ان کا نام لینا تو خود پر صحافتی غداری کا فتویٰ لگوانے کے مترادف ہو گا اس لئے ان میں سے ایک کو ہم مدعی کالم نگار اور ایک کو ملزم کالم نگار کہیں گے۔ ملزم کالم نگار پر کالم چوری کا نہیں بلکہ الزام ہے اپنے ذاتی تحریر کردہ کالم ری پبلش کروانے کا ۔چاہئے تو یہ تھا کہ پہلے کالم نگاری کی ابجد سے واقف کچھ ماہرین سے رائے لی جاتی کہ ری پبلش جیسے افعال جرائم کی لسٹ میں آتے بھی ہیں یا نہیں مگر اس کے برعکس مدعی کالم نگار نے جو اپنی ذات میں قانون دان بھی ہیں اور منصف بھی فی الفور ایک تنظیم کی داغ بیل ڈالی، عہدے اور ذمہ داریاں تقسیم کیں، سوشل میڈیا پر اپنی تنظیم کے لوگو وغیرہ کو عوام الناس کیلئے شجر ممنوعہ قرار دیا اور اپنی ذاتی عدالت میں ری پبلش کو ناقابل معافی صحافتی جرم قرار دیتے ہوئے ان ایڈیٹرز کے سامنے سراپا احتجاج ہو گئے جن کے ای میل ایڈریس بدقسمتی سے موصوف کی پہنچ میں تھے۔
دلچسپ امر یہ ہے کہ ایک طرف تو اتنا کچھ ہو گیا جبکہ دوسری طرف سے نہ تردید نہ بیان نہ کسی بات کا جواب بس پنجابی کہاوت کی طرح”ہک چپ تے سو سکھ” مکمل خاموشی ۔ہمارے ایک دور اندیش دوست نے اس پر یہ رائے بھی دی ہے کہ ملزم کالم نگار فریق دوم کو اس قابل بھی نہیں سمجھتا کہ اس کی کسی بات کا جواب دے۔جہاں تک میرے محدود علم اور ناقص معلومات کا تعلق ہے تحریر لکھنے والے کی ملکیت اور پراپرٹی ہوتی ہے۔جہاں تک تحریر کے “ری پبلش “ہونے کی بات ہے تو میں اسے صحافتی یا اخلاقی جرم ماننے پر ہرگز ہرگز تیار نہیں ہوں۔
اگر ایسا ہے تو ہمارے ملک کے مایہ ناز کالم نگار جاوید چوہدری صاحب اپنے اخبارات میں شائع ہو جانے والے کالمز کو کتابی شکل میں شائع کروا کر “ری پبلشنگ”کے مجرم ہر گز نہ بنتے۔ نہ ہی ہمارا قومی نشریاتی ادارہ پی ٹی وی ایک ہی ڈرامہ کئی بار ری ٹیلی کاسٹ کر کے “ری ٹیلی کاسٹ”کا جرم کرتا ۔ حتیٰ کہ میں نے تو کئی کتب کے ایک کے بعد دوسرا دوسرے کے بعد تیسرا ایڈیشن بھی ری پبلش ہوتے دیکھا ہے تازہ مثال میرے زیر مطالعہ راجہ انور کی کتاب “جھوٹے روپ کے درشن”ہے جس کا ساتوں ایڈیشن میرے سامنے ہے۔ حالانکہ ان کا وہی مواد، وہی موضوع اور وہی رائٹر ہوتا ہے ۔
میں اپنے محترم مدعی کالم نگار سے انتہائی معذرت کیساتھ عرض کرنا چاہتا ہوں کہ کالم صرف حالات حاضرہ پر نہیں ہوتے آپ کا یہ نظریہ بالکل غلط ہے کہ تحریر پاناما لیکس اور سندھ طاس پر ہو تو کالم ورنہ وہ کچھوے اور خرگوش کی کہانی ہے۔ کالم نگاری کی کئی اصناف ہیں اور ہر کالم نگار کا اپنا
اسلوب ہوتا ہے۔ کچھ کالم نگار فکاہی کالم لکھتے ہیں تو کچھ سیاسی، معاشرتی،اقتصادی اور حالات حاضرہ پر لکھتے ہیں، کچھ کا عنوان نفسیات ہوتا ہے تو کچھ کالم نگار مذہبی موضوعات منتخب کرتے ہیں، وکلاء حضرات عموماً قانونی کالم لکھتے ہیں حتیٰ کہ فیشن بھی کالم نگاروں کا موضوع دیکھنے میں آیا ہے۔ مدعی کالم نگار صاحب نے اپنی تازہ ترین میل میں ایڈیٹرز کو اپنی تنقید برائے تنقید کا نشانہ بنایا ہے جو بہت تکلیف دہ امر ہے۔ عرض کرتا چلوں کہ ایڈیٹوریل پیج ذاتی پسند ناپسند یا تعلقات پر ترتیب نہیں دیئے جاتے۔
ایک چھوٹے یا بڑے اخبار کے ایڈیٹر کو آپ جتنی نہ سہی مگر اتنی سمجھ بوجھضرور ہوتی ہے کہ وہ درست، معیاری اور موضوع کے اعتبار سے حالات سے مطابقت رکھتی تحریر کا درست انتخاب کر سکے، اگر تحریر کسی ایسے معاشرتی مسئلے کو اجاگر کررہی ہے جو تاحال حل نہیں ہوا اور خل طلب ہے تو ایسی تحریر کا دوبارہ شامل اشاعت ہونا کوئی جرم نہیں۔ کالم ، کالم نگار کا موقف اور مقدمہ ہوتا ہے جسے وہ ایک اخبار کی وساطت سے قارئین اور ارباب اختیار کے سامنے رکھتا ہے اور جب تک اس کا موقف سنا اور سمجھا نہیں جاتا اس کو حق حاصل ہے کہ وہ اپنا موقف بار بار دہرائے۔
سوشل میڈیا پر تو آپ اپنے ایک غیر منطقی موقف کو نہ صرف بار بار پوسٹ کرتے ہیں بلکہ احباب سے التجا بھی کرتے ہیں کہ اس کو شیئر کرکے ثواب دارین حاصل کریں تو وہاں پرآپ کے نام نہاد”اینٹی ری پبلش” قوانین کیوں آڑے نہیں آتے۔ عدلیہ میں جاتے ہیں تو اپنا موقف سول کورٹ سے عدالت عظمیٰ تک لے جاتے ہیں ،نہ آپکا موقف بدلتا ہے نہ مدعی،وہاں اپنا ایک ہی موقف بار بار دہراتے اخلاقیات اور مذہب کیوں نہیں روکتا، تو پھر کالم نگار پر آپ کونسے ذاتی قانون کے تحت اپنا موقف قارئین کے سامنے دوبارہ پیش کرنے پر پابندی لگاتے ہیں اور اسے قابل تعزیر جرم قرار دیتے ہیں۔
اگر آپ کے صحافتی فتوے سے امان پاؤں تو عرض کروں کہ آپ جناب تو پانامہ لیکس پر لکھیں تو بھی کالم اور مہندی کے نئے ڈیزائن متعارف کروائیں بہر صورت اس کو کالم تصور کیا جائے مگر دوسروں کیلئے صرف حالات حاضرہ پر لکھنے کی حدود و قیود کیوں؟؟؟ نہ صاحب نہ!!! آپکا کتا ٹائیگر اور ہمارا کتا کتا؟؟؟ یہ دوہرا معیار نہیں چلے گا ۔آخر میں صرف اتنا عرض کرونگا کہ یہ آپ کی غیر صحافتی اور ذاتیات پر مبنی جنگ ہے ، التجا ہے کہ اس میں ایڈیٹرز کو نہ گھسیٹیں، آپ کی یہ نام نہاد تنظیم کسی صحافتی جرم کے خلاف نہیں بلکہ ایک مروت پسند کالم نگار کے خلاف ہے جس کو چھوٹا ثابت کر کے آپ خود کو بڑا بنانا چاہتے ہیں۔ کیا ہی بہتر ہوتا اگر آپ متوازی لکیر مٹانے کی بجائے اپنی لکیر بڑی کرکے دوسری کو چھوٹا کرتے۔
خیر یہ آپ کی اور ملزم کالم نگار کی ذاتیات کی جنگ ہے التجا بس اتنی ہے کہ ایڈیٹرز کو کم فہم ثابت کرنا بند کیجئے جیسا کہ اپنی تازہ ترین میل میں آپ نے کیا ۔ ایڈیٹوریل میں ایڈیٹرز کے چاچے مامے کے کالم نہیں ہوتے بلکہ آپ جیسے ہی قلمکاروں کی تحریریں ہوتی ہیں جن کو اللہ رب العزت نے لکھنے کی صلاحیت سے نوازا اب یہ آپ پر منحصر ہے کہ آپ اس خداداد صلاحیت کو مثبت اور فلاحی انداز میں صرف کرتے ہیں یا ذاتیات کی جنگ میں اس صلاحیت کو ضائع کرتے ہیں ۔
