جب سب لکھ رہے تھے کہ دہشت گردی کا خاتمہ ہو چکا ہے اور اس کا یقین بھی دلوایاجا رہا تھا کہ 2016 دہشت گردی کے اختتام کا سال ہوگا تب میں نے لکھا تھا کہ اب بھی ملک میں لا قانونیت اور مداخلت بے جا ہے ایسے میں اس دن تک ترقی وا من خواب اور سراب ہیں جب تک ہم دہشت گردی کے عوامل ،ان کے سہولت کاروں اور دہشت گردی کے کارگزاروں کی تلاش کر کے انکا قلع قمع نہیں کر لیتے کیونکہ اس کے اصل اسباب ،وجوہات اور ذمہ داران کا سراغ نہ لگایا گیا تو ملک کی امن و سلامتی کو خطرہ لاحق رہے گا مگر وہ اقوام ہی اور ہیں جو معمولی سانحہ پر بھی پوری دنیا کو ہلا کر رکھ دیتی ہیں اوراپنی سیکیورٹی کے انتظامات کو اس قدر فل پروف بناتی ہیں کہ پھر اس کے بعد ان کی تاریخ میں کسی سانحہ یا حادثہ کی گونج سنائی نہیں دیتی بلکہ ان کی انتہا پسندی اور بر بریت کا عالم یہ کہ محض شک کی بنیاد پر ایک تہائی دنیا کو اجاڑ کر رکھ دیتے ہیں اور جواز میں اتنا کافی ہے کہ ’’دہشت گردی کا خاتمہ ضروری ہے ‘‘ جبکہ جائز حد تک کوئی بھی کام ہو تو انتہائی قابل تحسین ہے ۔مقام افسوس کہ ہم پے در پے سانحات سے نبر د آزما ہو کر ہر بار ایک پرچم تلے جمع ہوتے ہیں مگر چند دن بعد سب کچھ فراموش کر کے پھر انہی کھیل کھلیانوں میں مشغول ہوجاتے ہیں جو خاص طور پر ہماری توجہ ہٹانے کے لیے سجائے جاتے ہیں تاکہ حکومتی نا اہلیاں اور زیادتیاں اور من مانیاں نظروں سے اوجھل رہیں اسی اثنا ء میں دشمن پھر ہم پر وار کر نے آجاتا ہے مزید براں وہ مطلوبہ اہداف بھی حاصل کر لیتا ہے ۔
ہمارے ساتھ ظلم کی انتہا یہ ہے کہ اب کہ دشمن ہماری نسلوں کو نشانہ بنا رہا ہے پہلے آرمی پبلک سکول میں معصوم فرشتوں کولہو سے نہلا دیا گیا اور اب باچا خان یونیورسٹی میں خون کی ہولی کھیلی گئی تدریسی عملے اور انتظامیہ کے ارکان کے علاوہ انیس طلبا و طالبات کو شہید کر دیا گیا یہاں ایک اہم خبر یہ ہے کہ دہشت گردوں کا اصل ہدف یونیورسٹی کی سالگرہ کے سلسلے میں منعقد ہونے والی محفل مشاعرہ کے شرکا تھے مگر سیکیورٹی کے عملہ نے اپنی فرض شناسی سے اس حملے کو ناکام بنا دیا سوال یہ پیدا ہوتا ہے کہ درسگاہوں میں اگر ایسے علمی و ادبی پروگرامز منعقد کروائے جاتے ہیں تو ان کے لیے مناسب انتظامات کیوں نہیں کئے جاتے سیکیورٹی صورتحال پر ہمیشہ ہی سوالیہ نشان کا ٹھہرنا بھی المیہ ہے اس سانحہ کے بعد بھی ہمیشہ کی طرح وزیراعظم نواز شریف ،آرمی چیف جنرل راحیل شریف ،تحریک انصاف کے سربراہ عمران خان کے علاوہ تمام سربراہان اورعہدے داران نے اس کی بھر پور انداز میں مذمت کی اور آرمی چیف نے زخمیوں کی عیادت فرمائی اور متاثرین سے دلی ہمدردی کا اظہار کیا اورسب نے اس عزم کا اعادہ کیا کہ سب ملکر دہشت گردی کے مکمل خاتمے تک دہشت گردوں کے خلاف جنگ جاری رکھیں گے مزید برآں تمام تبصرہ نگاروں ،تجزیہ نگاروں اور ہمارے دانشوران نے وہی روایتی تبصروں کے ساتھ اس عزم کا خیر مقدم کیا اور درد و غم میں ڈوبے ہوئے کالم لکھے چونکہ’’ضرب عضب ‘‘ پہلے سے ہی جاری ہے اورپاک افواج شب و روز اس ناسور کا خاتمہ کرنے کے لیے برسر پیکار ہیں اور سربراہان مملکت کو یقیناًقومی ایکشن پلان کی گھتیاں سلجھانے میں ابھی کچھ اور وقت درکار ہے اسی لیے خواجہ آصف نے اپنے بیان میں کہا کہ ہم ہاتھوں سے لگائی گئی گرہیں دانتوں سے کھول رہے ہیں بلاشبہ اکثر داشوران نے ان کی تائید کی جبکہ سچ تو یہ ہے کہ یہ نا اہلی کا خراج ہے جوکہ عام آدمی ادا کر رہا ہے
ایسے ہی جب پاکستانی قوم اس گمان میں تھی کہ تاریکیوں اور خونی ہولناکیوں کی رات ڈھل چکی ہے تو کچھ بیانات میری نظر سے گزرے جو اس بات کا عندیہ تھے کہ لے اڑی بوئے گل راز چمن بیرون چمن
کیا قیامت ہے کہ خود پھول ہیں غماز چمن
امریکی صدر اوبامہ نے کہا کہ پاکستان دہائیوں تک عدم استحکام کا شکار رہے گا پھر شیو سینا کے متنازعہ بیانات اورپھر تسلسل سے منوہر پارکر کے بیانات کہ حملہ کس وقت اور کہاں کرنا ہے اس کا تعین ہم خود کریں گے جہاں چاہیں گے جب چاہیں گے حملہ کریں گے ایسے ہی متنازعہ بیانات سرحد پار سے اکثر سننے میں آتے رہتے ہیں درحقیقت آپ کوئی توجیح بھی پیش کر لیں دہشت گردی کے تانے بانے ملک دشمنی سے ہی ملیں گے یہ الگ بات کہ آپ ذاتی مفادات اور مصلحت کی بنیاد پر مجرمانہ خاموشی اختیار کر لیں اور ذمہ داران کو نظر انداز کر دیں مگر اس کا خمیازہ وطن عزیزگذشتہ تیرہ برس سے بھگت رہا ہے اور بھگتتا رہے گا جب تک کہ اس کی فصیلوں کا پہرہ اتنا مضبوط نہ کر دیا جائے کہ دشمن اس طرف آنکھ اٹھانے کی جرات تو درکنار تصور میں بھی اس کانقصان نہ سوچے مگر کیا کیا جائے کہ میرے وطن کا المیہ ہی یہی ہے کہ اس کے باسیوں کی یاداشت بہت کمزور ہے غم چاہے کتنا ہی اندوہناک کیوں نہ ہو جلد بھلا دیا جاتا ہے اورویسے بھی یہاں کا وطیرہ ہے کہ
جسے دیکھو اضافہ ہی کرے گا
یہاں کس نے کسی کا غم اٹھایا
اسی پیش نظر حکمران بھی اپنی من مانیوں میں مصروف عمل رہتے ہیں کیونکہ وہ اس راز کو پا چکے ہیں کہ سوئے ہوئے ضمیروں کو جگانا ممکن ہے مگر مردہ ضمیروں کو نہیں ۔۔مگریہ تو طے ہے کہ مذمتی اور دکھی بیانات دہشت کے عفریت کا خاتمہ نہیں کر سکتے ہمیشہ لکھا اور آج کا سچ بھی یہی ہے کہ دہشت گردی کاخاتمہ سب کی مشترکہ ذمہ داری ہے کیونکہ دہشت گردی کا شکار صرف مسلم ممالک ہیں تو مسلمان اپنے ہی بھائیوں کا خون کیوں کرکریں گے اور دوسراتوجہ طلب پہلو یہ ہے کہ جب ہم واقف ہیں کہ ہم خطرناک جنگ لڑ رہے ہیں تو ہم مدہوش کیونکر ہیں اسے مجرمانہ غفلت نہ کہا جائے تو کیا کہا جائے کہ درس گاہیں قتل گاہیں بن گئیں اورآپ ایکشن پلان ہی بناتے رہ گئے اور جب بن گیا تو آپ اورآپ کے اتحادی اپنی اپنی کرسی اور مفادات میں الجھ کر رہ گئے اپنے سیاسی استحکام سے نکل کر فرصت ملے تو پوچھئیے ان معصوم بچوں سے جن کی آنکھیں ہمیشہ دروازے کو تکتی رہیں گی مگر ان کا باپ کبھی نہیں آئے گا پوچھئیے اس تین بچوں کی ماں سے کہ وہ کیسے جوان بیوگی کے دن گزارے گی کاش آپ ان ماؤں کا درد جان سکتے جن کے لخت جگر منوں مٹی تلے جا سوئے ہیں مگر نہیں آپ کے نزدیک تو یہ صرف قربانی ہے صرف شہادت ہے اور ’’ضرب عضب ‘‘ کا ردعمل ہے یہی وجہ ہے کہ جب باچا خان یونیورسٹی میں آپریشن جاری تھا نونہالان وطن کے لہو سے ہولی کھیلی جا رہی تھی تو پی ٹی وی پر خادم پنجاب کو کسی منصوبے کی افتتاحی تقریب سے خطاب کر تے ہوئے دکھایا جا رہا تھا۔۔اس ملک کا یہی المیہ ہے کہ ہم حالت جنگ میں ہیں تو لڑے گا عام آدمی ،وطن مصیبت میں ہے توقربانی دے گا عام آدمی ،خدائی آفات ہیں تو متاثر ہوگا عام آدمی غرض ہر طرح سے متاثر عام آدمی ہی ہوتا ہے اس لیے کسی بھی تدارک کے لیے ترجیحی بنیادوں پر اقدامات نہیں کیے جاتے جبکہ اس وقت تحفظ پاکستان کے لیے سیاسی بیداری ناگزیرہو چکی ہے اپنا گھر انتشار اور خوف کی گرداب میں ہچکولے کھا رہا ہے اور دوسروں کی حفاظت کا ذمہ ہم لے چکے ہیں جو اپنا گھر نہیں سنبھال سکتے وہ دوسروں کے گھر کو آگ سے کیسے بچائیں گے ؟دوسرا مقام فکر یہ ہے کہ جب ہم واقف ہیں کہ ہم حالت جنگ میں ہیں توہما ری ترجیحات میں میلے ٹھیلے اور کھیل کھلیان کیوں ہیں ہمارے پیسے مٹی گارے پر کیوں خرچ ہو رہے ہیں ہمیں میٹرو بس ،اورنج ٹرین اور فلائی اوور اور بنیادی سہولتیں ضرور دیں ۔مگر۔خدارا ہماری امن و سلامتی یقینی بنائیں ہمیں تحفظ چاہیئے یہ کیسی ریاست ہے کہ جس میں امن کے لیے معصوم قربانیاں دینی پڑتی ہیں ‘‘یہ قربانیاں نہیں ہیں یہ قتل عام ہے ! ہمارا گلشن اجاڑ ا جا رہا ہے یہ وہ نا قابل تلافی نقصان ہے جو وطن عزیز کی پیشانی کا داغ بن رہا ہے ہماری صدیاں اور نسلیں اجڑ رہی ہیںآپ اسے صرف شہادت کہتے ہیں؟ یہ حق ہے کہ ہم حق و صداقت کی راہ میں شہادت کو اعزاز سمجھتے ہیں ،ہم زندہ قوم ہیں مصیبتوں سے گھبرانے والے نہیں ہیں مگر ذمہ داران کی غفلت بھی ہمیں برداشت نہیں ہے ۔کاش ہمارے حکمران خود کو آرمی چیف جنرل راحیل شریف کی طرح مخلص ،بے لوث اور دیانتدار ثابت کر سکیں کہ جن کے اس اعلان نے کہ’’ وہ اپنی مدت ملازمت کے بعد ریٹائر ہو جائیں گے ‘‘نے ہماری پوری قوم کے دلوں پر مکمل طور پر راج کر لیا ہے اور یہ ثابت کر دیا ہے کہ آج بھی اگر حرص و ہوس چھور کر خدمت وطن کی جائے تو پوری قوم نگاہ فرش راہ کرتی ہے اور آج بھی ایسے لوگ موجود ہیں کہ اپنے من کے اتنے سچے ہیں کہ وہ اوج ثریا پر مقیم ہیں مگر کیا کیا جائے کہ اس طرح کا کردار پیش کرنے کے لیے اپنی بھوک اور لالچ ختم کرنا پڑتا ہے جس کا نقشہ دنیا کمانے والے نہیں پیش کر سکتے کیونکہ وہ آخرت بھلا کر دنیا کا سودا کر چکے ہیں مگر ہمیں یقین ہے کہ بالآخر باطل قوتیں مٹ جائیں گی اور حق غالب آئے گا ۔۔!
