تلہ گنگ: متحدہ علماء مشائخ کونسل پاکستان کے مرکزی چیئرمین ملک صفدر علی اعوان نے کہا ہے کہ پاکستان نظریے اور عقیدے کے نام پر قائم رہنے کے لئے بنا ہے۔ اس کی جڑوں میں لاکھوں افراد کا خون شامل ہے۔ اس کو کمزور اور ناکام بنانے والے کبھی کامیاب نہیں ہوسکتے۔ وطن عزیز کا دفاع اور استحکام ہمارے ایمان کا حصہ ہے۔ سیاستدانوں نے اس ملک کے نام پر اپنے محلات قائم کئے لیکن ملک کو کچھ نہیں دیا۔ متحدہ علماء مشائخ کونسل کی ترجیحات میں ملک کی سلامتی اور خوشحالی اولین حیثیت رکھتی ہے۔ اس کے لئے کسی بھی قربانی سے دریغ نہیں کیا جائے گا۔ وہ یہاں کونسل کے مرکزی عہدیداروں اور اکابرین کے نمائندہ اجلاس سے صدارتی خطاب کر رہے تھے۔ اجلاس سے کونسل کے صدر پیر فرہاد علی گیلانی پیر آباد شریف مردان ، پیر سعادت علی شاہ سجادہ نشین چورہ شریف ،کے پی کے سے محمود خان بنگش ، چیف کوآرڈی نیٹر مولانا حافط محمد اقبال رضوی، بلوچستان کے صدر سید آغا سراج کانسی، سندھ کے صدر ملک سیدمحمد محسود ، مفتی ظہور اللہ ہاشمی، میاں محمد اکرم ، مولانا ظہور احمد قادری، پیر حبیب بخش اور کشمیر ی دانشور سردار محمد طاہر تبسم نے بھی خطاب کیا۔ ملک صفدر اعوان نے کہا کہ آپریشن ضرب عضب وقت کی آواز ہے اور ہم اس پر اپنی بہادر فوج کو سلام پیش کرتے ہیں ۔ پوری قوم سیسہ پلائی ہوئی دیوار کی طرح مسلح افواج کے ساتھ کھڑی ہے۔ انہوں نے کہا کہ ملک سے رشوت ، اقرباء پروری کرپشن، غربت ، جہالت اور موروثی سیاست کا خاتمہ کرنے کے لئے میدان میں آئے ہیں۔ عوام نے ساتھ دیا تو ملک میں بڑی تبدیلی لائیں گے اور حقیقی معنوں میں فلاحی اسلامی معاشرہ قائم کر کے دم لیں گے۔ کونسل کے صدر پیر فرہاد علی گیلانی سجادہ نشین پیر آباد شریف نے کہا کہ ہم تمام مذاہب اور مسالک کو ساتھ لیکر چلنا چاہتے ہیں۔ ملک کی بااثر قومی سیاسی و دینی شخصیات ہمارے ساتھ شامل ہو رہی ہیں اور گدی نشین حضرات بھی بڑی تعداد میں آچکے ہیں۔ ہم ایسا انقلاب لانا چاہتے ہیں جس سے عوام کو ریلیف ملے۔ پیر سعادت علی شاہ جورہ شریف نے کہا کہ سیاستدانوں کا گند صاف کر کے اصلی قیادت کو سامنے لانا چاہتے ہیں تاکہ ملک ترقی اور خوشحالی کے راستے پر گامزن ہوسکے۔ مقررین نے کہا ہے متحدہ کونسل مستقبل میں بڑی تبدیلی لائے گی اور انشاء اللہ عوام کے حقوق دلا کر ہی چین سے بیٹھیں گے۔ انہوں نے ملک صفدر علی اعوان کی قومی سیاسی اور اصلاحی خدمات کو سراہتے ہوئے انہیں ہر قسم کے تعاون کی یقین دہانی کرائی۔ ملک صفدر اعوان اور انکے ساتھیوں کا تھوہا محرم خان پہنچنے پر پرتباک استقبال کیا گیا ۔ علاقے کے ممتاز زمیندار ملک ممتاز حیدر نے کونسل کے صدر پیر فرہاد علی گیلانی کو عوام علاقہ کی طرف سے روایتی پگڑی پہنائی۔