خراب مدافعتی نظام بھی ڈپریشن کی وجہ ہو سکتا ہے

Print Friendly, PDF & Email

سائنسدانوں کے اندازوں کے مطابق دنیا بھر میں 35 کروڑ افراد ڈپریشن کے مرض کا شکار ہیں اور اب طبی ماہرین کا کہنا ہے کہ انھوں نے اس مرض کو سمجھنے اور اس کے علاج کے سلسلے میں ایک اہم دریافت کی ہے۔

ڈپریشن کے مریضوں کا علاج عموماً مسکّن ادویات اور نفسیاتی علاج سے کیا جاتا ہے اور اس سے مریضوں کی اکثریت کو فائدہ بھی ہوتا ہے۔

تاہم کچھ مریض ایسے بھی ہیں جن پر کوئی بھی موجودہ علاج اثر نہیں کرتا اور سائنسدان اب یہ جاننے کی کوشش کر رہے ہیں کہ آیا ان کا مدافعتی نظام ہی تو ڈپریشن کی وجہ نہیں بن رہا۔

ڈاکٹروں کا کہنا ہے کہ ڈپریشن کا گہرا تعلق انسانی جسم کے مدافعتی نظام سے ہے اور جن افراد کا دفاعی نظام ہی ان کے دماغ کو بدلنے کی کوشش کرتا ہے وہ بھی ممکنہ طور پر ڈپریشن کا شکار ہو جاتے ہیں۔

 اس تحقیق کے روحِ رواں اور برطانیہ کی کیمبرج یونیورسٹی کے سائکیاٹری ڈپارٹمنٹ کے سربراہ پروفیسر ایڈ بلمور نے بی بی سی سے بات کرتے ہوئے کہا کہ توجہ کا مرکز وہ خراب مدافعتی نظام ہے جو جسم میں سوجن پیدا کرتا ہے اور موڈ بدل دیتا ہے۔

ان کے مطابق ’یہ ایسی چیز ہے جس سے ہم سب کا واسطہ پڑتا ہے مثلاً آپ یہ سوچیں کہ آخری بار جب آپ کو نزلہ اور زکام ہوا تو آپ کا موڈ کیسا تھا۔‘

پروفیسر بلمور کا کہنا ہے کہ ’ڈپریشن اور انفلیمیشن کا گہرا تعلق ہے۔ اگر آپ کو فلو ہے تو آپ کا مدافعتی نظام ردعمل ظاہر کرتا ہے اور اکثر لوگ اس کا اثر اپنے موڈ میں بھی محسوس کرتے ہیں۔

آرتھرائٹس کا علاج کرنے والے ڈاکٹروں نے بھی اس سلسلے میں ایک عجیب تعلق دریافت کیا ہے۔

اس بیماری کی ایک قسم ریوماٹوائیڈ آرتھرائٹس میں انسانی جسم کا مدافعتی نظام اس کے جوڑوں کو نشانہ بناتا ہے اور جب اس کے مریضوں کو ایسی ادویات دی گئیں جس نے ان کے مدافعتی نظام پر اثر کیا تو ان کا موڈ بھی بہتر ہوگیا۔

اس مرض کے ایک معالج پروفیسر ایئن مکائنز کا کہنا ہے کہ ’جب ہم یہ طریقۂ علاج استعمال کرتے ہیں تو ہم مریضوں کا موڈ تیزی سے بحال ہوتے دیکھتے ہیں جبکہ اس کا اثر ان کے اعضا اور جوڑوں پر اتنا نہیں دکھائی دیتا۔‘

ان کے مطابق اس کا مطلب یہ ہے کہ مریض جوڑوں کے درد میں کمی کی وجہ سے بہتر موڈ میں نہیں ہوتے بلکہ اس کی اصل وجہ کچھ اور ہوتی ہے۔

پروفیسر مکائنز کے مطابق ’جب ہم نے ایسے مریضوں کے دماغ کی سکیننگ کی تو معلوم ہوا کہ اس طریقۂ علاج سے ان کے دماغ کے نیورو کیمیکل سرکٹ میں بڑی تبدیلیاں آتی ہیں۔‘

کنگز کالج لندن سے تعلق رکھنے والی بایولوجیکل سائکیاٹری کے پروفیسر کارمین پریانتے کا کہنا ہے کہ انسان کے مدافعتی نظام میں تبدیلیوں کی وجہ اس کی زندگی میں پیش آنے والے پریشان کن واقعات بھی بنتے ہیں جو مستقبل میں ڈپریشن کی وجہ بھی بن سکتے ہیں۔

952 total views, 2 views today

Short URL: http://tinyurl.com/gphvfap
انٹرنیٹ پہ سب سے زیادہ پڑھے جانے والے مضامین
loading...