محمد حفیظ کی بھارت روانگی میں تاخیر

Print Friendly, PDF & Email

پاکستانی آل راؤنڈر محمد حفیظ، جنھیں اپنے بولنگ ایکشن کے بائیو مکینک ٹیسٹ کےلیے منگل کے روز چینئی جانا تھا، ویزا نہ ملنے کے سبب بھارت روانہ نہیں ہو سکے۔ پاکستان کرکٹ بورڈ کے ترجمان کے مطابق محمد حفیظ کو ویزے کا انتظار ہے۔ امید ہے کہ منگل کی شام تک انھیں ویزا مل جائےگا اور وہ بدھ کی صبح چینئی روانہ ہوجائیں گے اور اسی روز چینئی کی لیبارٹری میں ان کے بولنگ ایکشن کا بائیو مکینک ٹیسٹ ہو گا جس کے بعد واپس سری لنکا چلے جائیں گے۔ پاکستان اور سری لنکا کے درمیان تیسرا اور آخری ٹیسٹ میچ تین جولائی سے پالیکیلے میں شروع ہو گا۔ لیکن بظاہر تیسرے ٹیسٹ میں حفیظ کی شرکت کا امکان کم دکھائی دے رہا ہے۔ محمد حفیظ کے بولنگ ایکشن کے قواعد و ضوابط کے خلاف ہونے کے بارے میں گال ٹیسٹ کے امپائروں نے رپورٹ دی تھی تاہم وہ کولمبومیں دوسرا ٹیسٹ کھیلے تھے۔
آئی سی سی کے قوانین کے مطابق اگر کوئی بولر سال میں دو مرتبہ مشکوک بولنگ ایکشن کی زد میں آ جائے تو وہ ایک سال تک بین الاقوامی کرکٹ میں بولنگ نہیں کر سکتا۔ محمد حفیظ کے بولنگ ایکشن کے مشکوک ہونے کے بارے میں پہلی رپورٹ گذشتہ سال نومبر میں پاکستان اور نیوزی لینڈ کے درمیان ابوظہبی میں کھیلے گئے ٹیسٹ کے امپائروں نے دی تھی۔ محمد حفیظ کے بائیو مکینک تجزیے کی رپورٹ 14 دن میں آئے گی اس دوران وہ بین الاقوامی کرکٹ میں بولنگ کر سکتے ہیں۔

 (بشکریہ: بی بی سی اُردو)

Short URL: http://tinyurl.com/j39cczc
QR Code:


Leave a Reply

Your email address will not be published. Required fields are marked *